Zɔɔbu 8 - Bibeli do fee

Bida í ni, woo ce laalɔ í ya ba ijuukpãɛi

¹ Ŋɔi Bida inɛi Suau í so ide í ni,

² hee waati yoomai ì waa degbe i bɛi i jɔ̀ ide dimi bɛɛbɛ ku fɔ. Hee waati yoomai aa jɔ̀ ideɛ ŋa iyi à jɔ fufu dabii ŋau bɛ ku fɔ.

³ Ilaaɔ̃ ci ya too ntɔi? Mà nŋu iyi í jɛ ilu gbugbã fei ci ya kiiti si ntɔi.

⁴ Bii í jɛ amaɛ ŋa à ce dulum bi Ilaaɔ̃i, ribai dulum du ŋai í sã nŋa bɛ.

⁵ Amma bii ì sinda wa si Ilaaɔ̃, nɔ ì tɔɔ nŋu ilu gbugbã fei ku ce araareɛ,

⁶ bii i kù nɛ taale kãma nɔ ì jɛ inɛ dee deei, kaa kpɛ ku gbɔɔɛ nɔ ku baaò dee dee kú jɛɛ wa mam mam.

⁷ Kuwɛɛi takoɛ á jɛ mii keeke mɔm do bɛi kuwɛɛ titɔ̃ɛ á sĩa hee ku caa.

⁸ Koo i bee inɛ ŋa iyi à cua wa, nɔ i gbɔ bɛi bala nŋa ŋa à ce,

⁹ domi awa amai ana ŋai nɔ a kù mà nkãma. Ajɔ nwa ŋa si andunyau ihɛ̃ í yɛi bɛi jĩjĩ.

¹⁰ Aŋa aa yɔkɔ a kɔɛ nɔ a sɔ̃ɛ mii iyi à mà si lasabu nŋa.

¹¹ Njee á fita bii kù jɛ si fatamai? Mà mɔɔmɔɔcã á fita bii inyi kù wai.

¹² Aa yɛ í wɛɛ tũtũ wa so iri, inɛ kãma kù logooɛ nɔ i ba wee í tako fɔfɔ kpaasi ŋa í gbɛ.

¹³ Bɛɛbɛi í ya na ku jɛa inɛ ŋa iyi à sinda à toa Ilaaɔ̃ anyi fei. Nɔ bɛɛbɛi kpãa ku cɔi inɛ laalɔ á ce nfe.

¹⁴ Naanɛɛ í ya na ku ce nfei. Kpãa ku cɔɛ í ya kua gbugbãi bɛi ikũi dadaa.

¹⁵ Bii í koo í lɔkɔsi idĩi ileɛ, idĩu í ya mɔngɔi. Ŋɔi í ya nyangala si, amma ci ya nɔɔ.

¹⁶ Í yɛi bɛi jĩi tũtũ iyi í wa si inunu nɔ amaawɔɛ ŋa à bii lambo.

¹⁷ Í ya mile icãɛ ŋai si inɔ kuta ŋa nɔ ku wongoo si ŋa.

¹⁸ Amma bii à tuu hai tengi bii í wau, inyau í ya ni nŋu kù yɔɔ ajɔ kãmai.

¹⁹ Do yaase bɛɛbɛi inɛ ŋau à ya kpaò iri, nɔ ama jĩi mmuɛ ŋa a fita wa si agbɛ nŋa má.

²⁰ Aawo, Ilaaɔ̃ ci ya kɔ̀si inɛ dee dee pai, nɔ ci ya sobi woo ce laalɔ ŋa.

²¹ Kaa kpɛ ku jɔ̀ i dɔ̃ anu do inɔ didɔ̃, nɔ gɛlɛɛ ku maa nyaanyi.

²² Amma anyɔ á mu inɛ ŋa iyi à jɛ mbɛɛɛ ŋa, nɔ bi kuwai inɛ laalɔ ŋa á ce nfe.