Zɔɔbu 7 - Bibeli do fee

Zɔɔbu wa weewea si Ilaaɔ̃

¹ Kuwɛɛi amanɛ si ilɛ í gaabui bɛi ti sooge do bɛi ti woo ce gaanɔɔma.

² Í yɛi bɛi aru iyi í wa si inunu nɔ wa bi ku bɔ jĩjĩ, walakɔ bɛi woo ce icɛ iyi wa degbe a sãa fiai cukpaɛ.

³ Amu, cukpa nkpɔ nkpɔ do idũ nkpɔ nkpɔ wahala do ara kuroi í jɛ titom.

⁴ Hai ǹ lɔ ǹ sũ gbakã, iju kumá í ya maa kpɛɛm nii nɔ n maa n ni, hee waati yoomai iju á má. Nɔ hee iju koo máò, ǹ ya n maa n kakaai do ara kuro.

⁵ Kokoo ŋa do agbɛi kumɛɛ ŋa iyi à ce kpaka ŋai à ya bii aram fei. Batai aram í ŋɔ wa koo nɔ wa sãmi.

⁶ Ajɔm ŋa à sɛi à waa lɔ gbãa gbãa, nɔ à gbãa à re baa gomboi caacɛ. À waa bɔ kɔɔ nɔ n kù nɛ kpãa ku cɔ kãma má.

⁷ Ilaaɔ̃, jɔ̀ i ye gigi iyi hundem í yɛi bɛi fufu, nɔ n kaa n ba ididɔ̃ má.

⁸ Do ntɔ, awɔ iyi ì waa cɔm nɔu i kaa yɛm má. Aa na i dɛdɛm, amma n kaa n wɛɛ má.

⁹ Bɛi bii ijĩ í dũ í ya fangaa a ci ya yɔɔ má, bɛɛbɛ mɔi bii amanɛ í ku à suu ci ya dede wa má.

¹⁰ Kaa baa inɔ kpasɛ̃ɛ má nɔ bi kuwaɛu, à ya gbɛjɛ ideɛi.

¹¹ Na ŋɔi í ce n kaa n coko. An fɔ ide do ara kuro. An weewea domi inɔm í fɔ.

¹² Amu tenkui de, mà amu akandamai inɔ tenkui hee i jɔ̀ a maa degbem.

¹³ Bii ǹ lɔ ǹ sũ si daayim ǹ ya n tamaa bɛi an sĩmi nɔ ara kurou á daamai,

¹⁴ amma waati nŋui ì ya dede idɔm do àla sãmi ŋa, nɔ ì ya jɔ̀ zigim ku da do kuyɛ ŋau.

¹⁵ Á sĩa a tɛ kɔ̃ɔm a kpam mɔm. Ntɔ ntɔ, iku í sĩa do kũkũ iyi í gbeem n wa n wɛɛò ihɛ̃.

¹⁶ N kù bi kuwɛɛ má. Hundem kaa sɔ má. Jɔ̀m domi kuwɛɛm kù jɛ nkãma.

¹⁷ Mii amanɛ í jɛ hee i maa gbɔa bɛi ihɛ̃, hee í to ì waa kaasãɛ do zaka bɛi ihɛ̃.

¹⁸ Mii amanɛ í jɛ hee i ya maa kaakoɛ daakɔ fei nɔ i ya maa cɔ laakaiɛ waati kãma fei.

¹⁹ Hee waati yoomai ì waa degbe i bɛi i fa ijuɛ sim. Hee waati yoomai aa jɔ̀ n mi antɔ.

²⁰ Bii í jɛ ǹ ce dulum nii, mii dulum nɔu á ceɛ awɔ woo degbe amanɛ. Na mii í ce amui ì kãsi iju. Na mii í ce ǹ baa ǹ jɛ asoɛ.

²¹ Na mii í ce i kù waa bi ku kpa idei dulum dom nɔ i gbɛjɛ kuraram, domi, ntɔ ntɔ bɛbɛi an nɛ nɔ i dɛdɛm i kaa yɛm.