Zɔɔbu 6 - Bibeli do fee

Zɔɔbu wa yɛ taalei kpaasiɛ ŋau

¹ Ŋɔi Zɔɔbu í jɛ í ni,

² bii í jɛ á ce a wã kuwoi mii iyi wa dede idɔɔkɔ̃m wo, walakɔ inɔ kufɔ iyi wa bam fei si kiloo,

³ aa wo nsɛiu ihɛ̃ a re sãai tenku. Na ŋɔi í jɔ̀ ǹ wa n fɔ ide iyi ǹ ba fei.

⁴ Ntɔ ntɔ Ilaaɔ̃ ilu gbugbã fei í tam afa í lu í faata, nɔ ǹ wa n gbɔ ara kuroi acĩɛ. Zigiida nla nlai í naa sim hai bi Ilaaɔ̃.

⁵ Sɛnga á maa kpata bii í wa inɔ fɔfɔ tũtũ? Mà kɛtɛ á maa dɔ̃ anu bii à timbiaa kpaafo?

⁶ Amanɛ á yɔkɔ ku jɛ mii iyi kù nɛ imu nɔ kù nɛ cikã kãma? Mà cikã yoomai fũfũi njɛ í nɛ.

⁷ Mii iyi n kù bi ku lu wo, nŋui í jɛ sɔndam bɛ nnyi, baa bii í jɛ wa nu sim konkombi.

⁸ Ilaaɔ̃ de kú gbɔ kutɔɔm, nɔ kú jɔ̀ mii iyi ǹ biu ku ce.

⁹ Bii í yɔkɔ Ilaaɔ̃ ku lɔlɔm nɔ ku lesim awɔ ku tambɔm,

¹⁰ an nɛ inɔ didɔ̃ nɔ n fo n dingaa do ara kurom nɔu ihɛ̃ si na iyi í jɔ̀ n kù kɔ̀si idei Ilaaɔ̃ nŋu iyi í má.

¹¹ Gbugbã yoomai ǹ nɛ iyi an maa n degbeò ngɔgɔ má. Mà mii an ba má hee ku jɔ̀ n maa n temua si kuwɛɛm.

¹² Ǹ nɛ gbugbã bɛi kutai? Aram í yɛ bɛi isɔ nkpai?

¹³ Gbugbã iyi ǹ nɛ fei í tã, n kù nɔ n kù nɛ inɛ gɔ iyi wa naa ku sobim.

¹⁴ Inɛ iyi wa wahala, í nɛ kpaasiɛ kú sobiɛi wo baa bii í jɛ í fũsi Ilaaɔ̃ ilu gbugbã fei ku jirima awɔi.

¹⁵ Kpaasim ŋa à fɔ inɔm bɛi acãi inyi iyi í gbɛ.

¹⁶ Inyi nŋa í ya fɔi si na iyi í jɔ̀ í tũ í ce bɛi kuta, amma í ya riisii bii í na wa yɔ wa.

¹⁷ À ya gbɛi sukui koko. Anu akãi à ya gbɛ bii inya gbãai inunu í naa si ŋa.

¹⁸ Woo nya sĩa ŋa à ya sindai a too kpãa mmu, a dasi sako a koo a ce nfe.

¹⁹ Aŋai woo nya sĩai Temaa ŋa à ya maa kãsi iju wa, nɔ aŋai woo bɔ ilui Saba ŋa à ya maa kaaba wa.

²⁰ Amma bii à to wa anyɔ í ya mu ŋai si na iyi í jɔ̀ à dasi acãi inyi ŋau naanɛ wa nɔ à na à ba à gbɛ.

²¹ Bɛɛbɛi ǹ wa n cɔ ŋɛ bɛ nsɛiu ihɛ̃. Ì to wa ì yɛ wahalam ŋa, nɔ zigi nŋɛ í da.

²² Ǹ sɔ̃ ŋɛ ǹ ni i ceem amuai ngɔgɔ wa ŋai? Mà ǹ ni i ce amua ŋa do amani nŋɛ ŋau na irim.

²³ Ǹ ni i faabam hai si awɔi mbɛɛm ŋai? Mà ǹ nɔ ǹ ni i yám hai si awɔi woo kpã inɛ ŋa iju ŋaui.

²⁴ I kɔm wa ŋa nɔ n coko. I jɔ̀ n mà si mii iyi ǹ nyɔ.

²⁵ Ide ntɔ ci ya dɔ̃ inɛ kãma. Amma si iwoi ì waa yɛò taalem ŋa.

²⁶ Mà ì waa bi i yɛ taalem si ide ku fɔm ŋai. Ide ŋa iyi ǹ fɔ wa si fufu, idei inɛ iyi kù nɛ kpãa ku cɔ kãmai.

²⁷ Aa ya ta kpasa ŋa ku ba i mà inɛ iyi á so kɔyɔ ku jɛ aruɛ, nɔ aa ya ta baa kpaasi nŋɛ ŋa.

²⁸ Bɛbɛi i sinda i cɔm wa ku sĩa ŋa. An sɔ nŋɛ ibo ijuò ijui?

²⁹ Ǹ wa n tɔɔ ŋɛi i sinda wa ŋa. I maà ti i jɛ muafiti ŋa. N kù ce taale kãma.

³⁰ Ǹ ce taale si ide ku fɔm nii? Mà n kù mà ide sãmi ku wũa mái.