Zɔɔbu 5 - Bibeli do fee

¹ Nsɛi ǹ ni, sɛ̃ɛ inɛ gɔ i cɔ mà aa jɛɛ. Amaleka yoomai aa sabuu ide má.

² Idɔɔkɔ̃i í ya kpa inɛ iyi í ce nnyɛi, nɔ igu ku jai í ya kpa hai nɛ yaase.

³ Do ntɔ ǹ yɛ kuwɛɛi nnyɛi gɔ í ce icu, nɔ anu akãi ǹ ceekpe kpasɛ̃ɛ.

⁴ Ǹ ni, amaɛ ŋa a maà ba sobi hai bi inɛ kãma. A yɛ taale nŋa bi ku ce kiiti.

⁵ Woo ce ari ŋa a jɛ amaajɛɛ ŋa iyi í da. A ko amaajɛɛ ŋau baa bii í jɛ si inɔ agũi à wa. Ilu kɔdɛɛ ŋa a ko amaniɛ ŋa fei.

⁶ Laalɔ ci ya fita wa hai si inɔ sãa, nɔ wahala ci ya fita wa hai si ilɛ.

⁷ À bí amanɛ wai na ku wahala bɛi ina í ya maa fo bii wa kpaakpaa.

⁸ Bii amui wo, an dɛdɛ Ilaaɔ̃ nɔ nŋui an sɔ̃ wahalam.

⁹ Nŋui í ya ce mii jiida nla nla ŋa iyi amanɛ ci ya mà yaaseɛ. Mii ŋau à ya mu inɛ ŋa biti nɔ a kù nɛ jia.

¹⁰ Í ya jɔ̀ ijĩ ku maa wɔ si ilɛ, nɔ ku naaò mandi wa si iko ŋa.

¹¹ Nŋui í ya so inɛ ŋa iyi à kere lele, nɔ ku faaba inɛ ŋa iyi à wa si inɔ kufɔ.

¹² Nŋui í ya kɛkɛ mii iyi ilu bisi ŋa à waa ce nɔ icɛ nŋa ci ya to kɔɔ má.

¹³ Í ya mu ilu bisi ŋa si bisi nŋa, nɔ ikɔi woo zamba inɛ ŋau ci ya nɛ gbugbã kãma.

¹⁴ Aŋai à ya nɛ a koò ilu kuku dasã nkpa nɔ a maa koosɛ waatii inya kumá bɛi idũ.

¹⁵ Amma Ilaaɔ̃i í ya faaba ilu are hai si ide sãmi nŋa. Nŋui í ya nya hai nɛ gbugbã hai si awɔi ilu gbugbã.

¹⁶ Hai nɛ gbugbã njɛ de í nɛ kpãa ku cɔ, amma Ilaaɔ̃ í ya bii gɛlɛi inɛ laalɔ ŋa.

¹⁷ Ilu inɔ didɔ̃i inɛ iyi Ilaaɔ̃ wa kpãa iju na ku nyisiɛ kpãa jiida. Na nŋu, kù sĩa i kɔ̀si ijuukpãi Ilaaɔ̃ ilu gbugbã fei,

¹⁸ domi nŋui í ya mɛɛ amanɛ nɔ nŋui í ya wiaa jujuu má. Nŋui í ya dasi inɛ wahala nɔ nŋui í ya nyaa hai si wahalau má.

¹⁹ Tuuba nkpɔ nkpɔi á nyaɛ hai si wahala. Nɔ waati kãma fei á ya nyaɛi hai si mbiisi, kaa jɔ̀ laalɔ ku baɛ.

²⁰ Nŋui á nyaɛ si andɛi iku sukui ari do si waatii igũ.

²¹ Ikpei gɛlɛ kaa muɛ, nɔ zigiɛ kaa da bii nfei inɛ ŋa ku ceu í to wa.

²² Zigiɛ kaa da si waatii ari do wahala, nɔ i kaa ce njoi mɛɛmui sako ŋa,

²³ domi i kaa nɛ kuta ŋa si ikoɛ, nɔ mɛɛmui sako ŋa a kaa bitandiɛ.

²⁴ Waati bɛɛbɛi aa yɛ iyi laakai ku sũ í wa kpasɛ̃ɛ, aa ya koo i kaako gaaɛ ŋa, nɔ nkãma kaa ya gaiziaɛ.

²⁵ Aa yɛ nyaanzeɛ á la ku maa kooi, nɔ tɔkuɛ ŋa a na a kpɔ bɛi fɔfɔ.

²⁶ Aa gboi i bɛi i ku, bɛi waati iyi à ya da amaajɛ ŋa iyi à jĩa.

²⁷ Mii iyi à koo à ba mbɛ si kudɛdɛ sisɔ nwa iyi à ce. Nɔ bɛɛbɛi í nɔ í ce. Awɔi ì nɛ i gbɔɔ nɔ i màa na aranfãaniɛ.