Zɔɔbu 42 - Bibeli do fee

Zɔɔbu í tuuba nɔ í kaye araɛ

¹ Ŋɔi Zɔɔbu í jɛa Aɔ̃ Lafɛ̃ɛ í ni,

² ǹ mà iyi aa yɔkɔ i ce mii fei, nɔ nkãma ci ya ganji mii iyi ì dasi idɔ ku ce.

³ Ì fɔɔ tã, amui ǹ bi n bɛjɛ yaase bɛi ì jilɛ si bɛi ǹ wasi ku fɔ idei mii iyi n kù mà. Ntɔi, ǹ fɔ idei mii iyi í rem n kù mà baa bɛirei mɔm.

⁴ Ì ya ni wo n sotĩ n gbɔ awɔ i fɔ ide. Awɔ aa beem ide nɔ n jɛɛ.

⁵ À tako à sɔ̃m ideɛi wo. Amma bɛbɛi, ijum nii í yɛɛ.

⁶ Na ŋɔi í ce iyi ǹ fɔ wo n kù fɔ má. Nɔ ǹ kaye aram ǹ koo ǹ wa n buba si sãa do si ilúlu.

Aɔ̃ Lafɛ̃ɛ í teese kuwɛɛi Zɔɔbu

⁷ Waati iyi Aɔ̃ Lafɛ̃ɛ í sɔ̃ Zɔɔbu ide ŋau í tã, ŋɔi í sɔ̃ Elifazi inɛi Temaau mɔ í ni, idɔm í kɔ̃ si awɔ do kpaasi minjiɛ ŋau, si na iyi í jɔ̀ i kù fɔ idem dee dee bɛi Zɔɔbu woo ce icɛm í ce ŋa.

⁸ Nsɛi iŋɛ fei i dɛdɛ kɛtɛ kombo mɛɛje do angudã kombo mɛɛje i bɔò bi Zɔɔbu ŋa, nɔ i ce kuwee iyi à ya jo si ina fei sãa sãau na iri nŋɛ ŋa. Zɔɔbu woo ce icɛm nɔu ku ce nŋɛ kutɔɔ. An gba kutɔɔi nŋu Zɔɔbu, nɔ do saabuɛ n kaa n kpã ŋɛ iju na ide hai nɛ yaase nŋɛ, domi i kù fɔ idem dee dee bɛi Zɔɔbu ŋa.

⁹ Ŋɔi Elifazi inɛi Temaau do Bida inɛi Suau do Sofaa inɛi Naamau à koo à ce bɛi Aɔ̃ Lafɛ̃ɛ í sɔ̃ ŋau. Nɔ Aɔ̃ Lafɛ̃ɛ í gba kutɔɔi Zɔɔbu.

¹⁰ Waati iyi Zɔɔbu í cea kpaasiɛ ŋau kutɔɔ í tã, ŋɔi Aɔ̃ Lafɛ̃ɛ í teese kuwɛɛɛ. Í jɔ̀ í ba mii ŋa iyi í tako í nɛu ikɔ minji bɛbɛi.

¹¹ Ifɔɛ ŋa do wecĩɛ ŋa do kpaasi nwoɛ ŋa à naa ku cɔɔ, nɔ à baa ku jɛ si inɔ kpasɛ̃ɛ. Ŋɔi à nyisiɛ kubi nɔ à tũ inɔɛ na laalɔ ŋa iyi Aɔ̃ Lafɛ̃ɛ í jɔ̀ í baa fei. Nɔ inɛ akã nŋa fei í muaa isɔ fũfũ kpɛkɛlɛ akã do lɛlɛawɔi wura akã.

¹² Si kuwɛɛi Zɔɔbu iyi í gbeu ihɛ̃, Aɔ̃ Lafɛ̃ɛ í weeaa í re ti hai sinteu wa. Nɔ Zɔɔbu í nɛ angudã dubu maatɛ̃ɛ (14.000) do kpookpo dubu mɛɛfa (6.000) do kɛtɛ dubu minji (2.000) do gbankɛlɛ zãu dubu akã (1.000).

¹³ Nɔ í bí ama inɛmɔkɔ mɛɛje do ama inaabo mɛɛta.

¹⁴ Nɔ í sɔ ama inaabo sinteu Yemima, minjisiau mɔ Kɛsia, mɛɛtasiau mɔ Kerɛnihapuku.

¹⁵ Ama inaaboi Zɔɔbu ŋau à ce abo kusĩa iyi saa nŋa kù wa si ilɛu bii kãma má. Nɔ baa nŋa í jilɛ nŋa tubu zaka akã do wecĩ nŋa ŋau.

¹⁶ Si anyii nŋu, nɔ Zɔɔbu í ce adɔ̃ cĩɔ do ciiji (140) má. Nɔ í ba í yɛ amaɛ ŋa do tɔkuɛ ŋa hee tɔku gbɛ̃ɛsia.

¹⁷ Zɔɔbu í gbo ntɔ ntɔ í bɛi í ku.