Zɔɔbu 41 - Bibeli do fee

¹ Ì waa sɔa araɛ iboi bii ì waa cɔ awɔ i kãmiaɛ, baa bii ì hɔ̃nnɛɛ titã, njo á muɛ hee i cuku kaiya.

² Yooi wɔɔkɔɛ í to hee bɛi á dɛdɛ anuɛ. Yooi wɔɔkɔɛ í to bɛi á maa ba amu Ilaaɔ̃ kakɔɔ ku ce.

³ Gbesei yooi ǹ wa n mu ku ba n sãa lafɛ̃ɛ. Mii ndii andunya fei, titom nii.

⁴ An nyi n fɔ idei arai annyɛi má, do gbugbãɛ do jĩnɛ ku jaɛ.

⁵ Yooi á jɛ ku bɔ bataɛ. Mà yooi á jɛ ku lɔ kɛkɛlɛɛ.

⁶ Yooi á jɛ ku la cãnge minjiɛ ŋau ajɔ gɔ. Inyíɛ ŋa à to njo.

⁷ Batai bũuɛ í nɛ kpaka ku nɛ gbugbã fii fii iyi wa bii anyiɛ nɔ wa jɛ tɛliɛ. Nɔ à waa gusi njɛi.

⁸ À waa mási njɛi í jɔ̀ baa fufu kaa ba bii á lɔò baa keeke.

⁹ À mási njɛi bɛi kpaasi do kpaasi, à tɔtɔɔ si njɛ nɔ nkãma kaa yɔkɔ ku fɛɛfɛ ŋa.

¹⁰ Bii í tisãa gbakã, inya kumá í ya cei. Ijuɛ í ya maa daanai bɛi inya kumái daakɔ.

¹¹ Ina sasai í ya maa fita wa hai si gɛlɛɛ.

¹² Imɔɛ í ya maa fo ilului bɛi caka iyi wa gba.

¹³ Fufu iyi wa fita wa í ya maa gbãai. Í ya jɔ̀ kanjũa ŋa a mu ina.

¹⁴ Kɔ̃ɔɛ í nɛ gbugbã, nɔ zigii inɛ ŋa í ya da bii à wa kɔkɔɛ.

¹⁵ Bataɛ í nɛ sisima, nɔ iŋai araɛ í kitigba hee í jɔ̀ baa bii à tɔɔ, nkãma ci ya yaga.

¹⁶ Idɔɛ í lei bɛi kuta, í lelei bɛi alɔ.

¹⁷ Bii í dede, zigii ilu wɔɔkɔ ŋa í ya dai, nɔ njo í ya jɔ̀ lasabu nŋa ku fɔtɔtɔi.

¹⁸ Taakuba kaa fɔ siɛ nkãma hee má jɛ saka walakɔ kaka walakɔ afa.

¹⁹ Wa cɔ isɔi bɛi fɔfɔ nɔ wa cɔ isɔ danya mɔi bɛi jĩi muka.

²⁰ A kaa yɔkɔ a leleɛ do afa. Nɔ bii à waa taa do atavim, kuta ŋau a ya cei bɛi fɔfɔ ŋa.

²¹ Wa cɔ goloi bɛi akpa kaa. Baaɛ ci ya wa si do ibai kaka.

²² Abɛ gɛndɛɛu í nɛ pɔ̃ɔti ŋa bɛi kaakoi kɛtɛ ku logoo fɔfɔ ŋa. Í ya ce akpai si pɔkɔdɔ.

²³ Bii í dasi inɔ inyi gbakã, inyiu í ya maa gbai bɛi caka, nɔ ku jɔ̀ ido ku maa fo ilulu bɛi caka ku tɛkɛ tuae.

²⁴ Do anyiɛ wa, akpaɛ í ya maa daanai si bua bɛi ntoi iri fũfũ.

²⁵ Nkãma kù too si ilɛ. À takaɛi ku maà ce njoi nkãma.

²⁶ Í ya maa cɔ mɛɛmu nla nla ŋa ilɛ ngbɛi. Nŋui í jɛ ilaalui iŋa kugaabu ŋa fei.