Zɔɔbu 40 - Bibeli do fee

Zɔɔbu í jɛa Ilaaɔ̃

¹ Ŋɔi Aɔ̃ Lafɛ̃ɛ í bee Zɔɔbu í ni,

² awɔ iyi ì waa ce ide ku kɔ̀ ì waa kakɔɔ amu Ilaaɔ̃ ilu gbugbã fei? Aa jɛ i yɛ taalem? Ì nɛ ide iyi aa jɛɛm?

³ Ŋɔi Zɔɔbu í jɛa Aɔ̃ Lafɛ̃ɛ í ni,

⁴ n kù jɛ ngɔgɔ, mii n mà an jɛɛ. Ǹ bii gɛlɛm do awɔ nɔ ǹ coko.

⁵ Ǹ tako ǹ fɔ ide wo, n kaa n dɔ̃ ide kãma má. Ǹ fɔ ide í kpɔ, nsɛi, n kaa n fɔ ide má.

Zɔɔbu wa cɔ araɛ Ilaaɔ̃i?

⁶ Ŋɔi Aɔ̃ Lafɛ̃ɛ í ba Zɔɔbu ide ku fɔ wa hai si inɔ fufu nla nla í ni,

⁷ jɔ̀ i tã sɔɔlu nɔ i ce wɔɔkɔ. An beeɛ ide wa nɔ i jɛɛm.

⁸ Do ntɔ aa jɛ i ni kiitim kù jɛ dee deei? Ì waa bi i yɛ taalem nii ku ba i nyisi iyi ì nɛ ntɔ?

⁹ Gbugbãɛ í to ti amu Ilaaɔ̃i? Imuɛ á yɔkɔ ku to titom?

¹⁰ To, bɛbɛi, nyisi bɛi kulaɛ do bɛɛrɛɛ í to, nɔ i nyisi bɛi inya kumáɛ do amboeɛ í to.

¹¹ Jɔ̀ idɔɔkɔ̃ɛ ku dikã si amanɛ ŋa, nɔ do iju kãmɛɛ akã i kɛkɛ ilu faau ŋa.

¹² Cɔ ilu faau ŋau do iju nɔ i jɔ̀ a dasi anyɔ, nɔ i tɛɛsɛ inɛ laalɔ ŋau anu akã.

¹³ Si aŋa fei ajɔ si sãa. Cĩmbo aŋa fei si bi kuwai iku ŋa.

¹⁴ Na nŋu, amu mɔ an maa n cĩɛi domi do gbugbãɛi ì ba faaba.

Kpaakpata

¹⁵ Cɔ kpaakpata iyi ǹ taka bɛi awɔ mɔ. Fɔfɔi ǹ jɔ̀ wa jɛ bɛi kɛtɛ.

¹⁶ Amma cɔ zaka bɛi bũuɛ í nɛ gbugbã í to, cɔ zaka bɛi bãasĩi caakaɛ í nɛ gbugbã í to.

¹⁷ Akpaamuɛ í nɛ gbugbãi bɛi jĩi ndii sɛɛdi, itãɛ ŋa à nɛ atĩ ku nɛ gbugbã ŋa.

¹⁸ Kũkũɛ ŋa à nɛ gbugbãi bɛi isɔ nkpa ku nɛ iwo, nɔ kũkũi kpakpaa cingaaɛ ŋa à nɛ gbugbãi bɛi isɔ.

¹⁹ Nŋu akãi í re si mii ŋa iyi ǹ taka fei, nɔ amu iyi ǹ takaɛ amu akãi ǹ ya n nɔɔ.

²⁰ Iri kutai í jɛ bi ku jɛɛ, nɔ bɛi mɛɛmui sako ŋa fei à ya maa cɛi.

²¹ Í ya koo sũi si abɛ jĩi ndii itĩi inyi ŋa do si inɔ njee ŋa.

²² Si abɛ jĩjĩi jĩi ŋa iyi à waa kaako ido ŋaui í ya koo sĩmi.

²³ Bii inyi wa cã do gbugbã, zigiɛ ci ya da, baa bii inyi í kɔ̃ wa muu, idɔɛ ci ya dede.

²⁴ Bii í cĩ ijuɛ, yooi á jɛ koo muu. Aa yɔkɔ a gɛɛ a luaa imɔ?

Annyɛi

²⁵ Annyɛi mɔ ni, aa yɔkɔ i muu do kootia? Aa yɔkɔ i muu do ikũ si amɛ i fa i fitaò?

²⁶ Aa yɔkɔ i daa si ikũ si imɔ? Mà aa yɔkɔ i lu kɛkɛlɛɛ do afa.

²⁷ Mà ì waa tamaa á tɔɔɛ suurui, walakɔ ku sɔ̃ɛ ide didɔ̃.

²⁸ Ì waa tamaa á dĩ akabuu do awɔi ku ba ku jɛ aruɛ hee do ajɔ fei?

²⁹ Aa maa cɛiòɛ bɛi ì ya cɛiò yɛi? Mà aa ba i muu i soo ku ba ama mudɛ̃ɛɛ ŋa a maa cɛiòi.

³⁰ Sɔɔkɔ ŋa aa jɛ a tɔtɔɔ a bɔ ku taɛ? Mà aa jɛ a koo a kpɛ̃a sĩa ŋa iŋaɛ.

³¹ Aa yɔkɔ i cã bataɛ i gaa? Mà aa yɔkɔ i gũ iriɛ i luu do sakai.

³² Baa bii awɔ nŋu akãi ì lesiɛ titã, ala, i kaa sisi má.