Zɔɔbu 4 - Bibeli do fee

Elifazi í ni, ilu inɔ didɔ̃i inɛ iyi Ilaaɔ̃ wa kpã iju

¹ Ŋɔi Elifazi inɛi Temaau í so ide í ni,

² bii inɛ gɔ í fɔ ide á bitandiɛ? Do nŋu fei, yooi á yɔkɔ ku coko.

³ Awɔ ì kɔ inɛ nkpɔ. Ì jɔ̀ inɛ nkpɔ iyi í gbɛɛji wo í ba gbugbã.

⁴ Ideɛ ŋa à dede inɛ nkpɔ iyi wa cuku wo. Nɔ ì mua inɛ ŋa iyi ilugũ nŋa ŋa à waa mɔngɔ ŋau gbugbã.

⁵ Nɔ bɛbɛi iyi í jɛ siɛ, ì waa mɔngɔ. Bɛbɛi iyi í to siɛ nɔ ì waa biti.

⁶ Si bɛi ì mà bɛɛrɛi Ilaaɔ̃, nɔ isɛɛnɛɛ kù nɛ lɛɛfi kãma, i kaa jɔ̀ naanɛɛ do kpãa ku cɔɛ ku wa si Ilaaɔ̃?

⁷ Jɔ̀ i ye gigi. Tengi iwoi ì yɛ bii hai nɛ taale í ce nfe, walakɔ bii inɛ dee dee ŋa à ku.

⁸ Bɛi ǹ yɔɔ, woo gbɛ̃ laalɔ ŋa, do woo taa inɛ ŋa gbugbã ŋa, ribai kuce nŋai à ya da.

⁹ Fufui Ilaaɔ̃i í ya ce nfe nŋa. Fufui idɔɔkɔ̃ɛi í ya kpa ŋa.

¹⁰ Bii à dɔ̃ anu bɛi muusu nla ŋa, Ilaaɔ̃i í ya jɔ̀ a coko, nɔ nŋui í ya cɛ inyí nŋa.

¹¹ Aa ya kui bɛi muusu nla iyi í kua iŋa, nɔ amaɛ ŋau à fangaa.

¹² Ide gɔi í to wa sim bɛi asii. Itĩm í gbɔɔi si gundu.

¹³ Waati iyi inɛ í ya maa lasabu do zigiida si kuyɛ ŋa iyi í ce idũ, do si waati iyi amanɛ ŋa à waa sĩ njoo,

¹⁴ zigim í da hee ǹ wa n yaya, nɔ kũkũm ŋa fei à yaya.

¹⁵ Í ceem bɛi ǹ yɛ hunde gɔ wa lɔ wajum, ŋɔi ntoi aram fei í dede.

¹⁶ Inɛ gɔ wa leekĩ bɛ n kù mà yooi, ǹ wa n yɔɔi bɛi ayai amanɛ. Nɔ ǹ gbɔ imuɛ hee ilɛ ilɛ wa ni,

¹⁷ amanɛ á jɛ ku ni nŋu í jɛ inɛ dee dee si wajui Ilaaɔ̃? Amanɛ á yɔkɔ ku maaju si wajui Ilaaɔ̃ iyi í takaɛ?

¹⁸ Bii Ilaaɔ̃ í ya kɔ̀ woo ce icɛɛ ŋa iyi à wa lele naanɛ, nɔ í ya yɛ kurarai amalekaɛ ŋa,

¹⁹ aa fɔ ti amanɛ ŋa iyi í taka do sãa má? Amanɛ nŋu iyi mɔm à cooi do sãa nɔ à ya kpaai bɛi danfɛlɛ.

²⁰ Hai daakɔ hee alɛ ku maa lɛ fei à kpa ŋa tã, à nɔ à ce nfe nŋa mbɛ hee do ajɔ fei, nɔ inɛ kãma ci ya ce laakai.

²¹ Hunde nŋa í da mbɛ, nɔ à ya kui, a ci ya nɛ laakai kãma.