Zɔɔbu 39 - Bibeli do fee

¹ Ì mà sukui kubíi iwoi ido ŋa? Ì yɛ bii iye nŋa wa bí ŋa?

² Ì mà cukpa fɛloi iye nŋa í ya so asĩ nŋa? Mà ì mà waatii kubí nŋa.

³ Bii wa bí, í ya gulɛi ku ba ku jilɛ amau si ilɛ.

⁴ Nɔ amaɛ ŋau à ya dede a la a ce gbugbã si gbugbãa. Si anyiɛ nɔ a jɔ̀ fitii iye nŋa ku too a nɛ a kaa nyi wa bi tɛɛ má.

⁵ Yooi í jɔ̀ sɛnga í nɛ araɛ. Mà yooi í fũaa kpatiɛ ŋa í jɔ̀ɔ í nɛ.

⁶ Amui ǹ cea bi kuwaɛ si gbaa do si inya ku da imu.

⁷ Baaɛ kù wa si zamaai ilu do wakataɛ, nɔ ci ya gbɔ imu kãma iyi wa la siɛ wa.

⁸ Si iri kuta ŋai í ya dabii ku maa dɛdɛ bi kujɛ. Bɛi í ya maa dɛdɛ mii iyi í yɛ tũtũ fei.

⁹ Zɔɔbu, ifã á jɛsi ku ceɛ icɛ? Mà á nɔ ku jɛsi nŋu ku sũ si inɔ aroɛ.

¹⁰ Aa yɔkɔ i dĩaa zuugu i faò ilɛ? Mà á jɛ ku faɛ mii ku lɛgɛ kanga ŋa si lɔɔmau.

¹¹ Aa jɛ i naanɛɛ do gbugbã nla nla iyi í nɛu bɛ nɔ i jɔ̀aa icɛ iyi ì nɛ ku ce?

¹² Nŋui ì waa kaaba ku na ku baaò amaajɛɛ ŋa iyi ì dau wa bi ku kpokpoɛ?

¹³ Taataa í ya fũ ikpaɛi do inɔ didɔ̃, bii ì yɛ ntoɛ aa ni ntoi gaagũai na kusĩaɛ.

¹⁴ Amma í ya nyɔ njɛɛi si ilɛ ku jɔ̀ɛ si sãa gbãau bɛ,

¹⁵ ci ya ce baa laakaii iyi inɛ gɔ á naa ku tɔɔ walakɔ mɛɛmui sako ŋa a lɛgɛɛ.

¹⁶ Ci ya nɛ araarei amaɛ ŋa. Í ya maa cɔ ŋai bɛi inɛ njoo ŋa nɔ wahala iyi í ce na iri nŋa ci ya jɛaa si ide kãma.

¹⁷ Amu Aɔ̃ Lafɛ̃ɛi ǹ jɔ̀ í kua laakai nɔ ǹ jɔ̀ kù nɛ bisi.

¹⁸ Amma bii wa sɛi, í ya maa cɔ arei acĩ do masaɛ faajii.

¹⁹ Awɔi ì mua acĩ gbugbã? Mà awɔi ì daa gɔ̃gɔ̃ si kɔ̃ɔ.

²⁰ Mà awɔi ì jɔ̀ í fo wa dingaa bɛi kɛtɛngbo. Kukpataɛ í to njo.

²¹ Í ya nɛ inɔ didɔ̃ si gbugbãɛ. Nɔ í ya sɔ ilɛ laga si lɔɔma ku sɛi ku bɔ igũ.

²² Zigiɛ ci ya da, kù waa ce njoi nkãma, nɔ ci ya tɛkɛò anyi si wajui taakuba bi ku ce igũ.

²³ Bii í gbɔ tongo wa ce iba si antaiɛ, nɔ kaka do taakuba à waa daana,

²⁴ araɛ í ya gbãai anu akã nɔ ku sɛi ku nɛ. Nɔ bii à fã kuu, ci ya nɔ araɛ má.

²⁵ Waati iyi í gbɔ imui kuu fei í ya dɔ̃ anui ku tã sɔɔlu. Í ya gbɔ inunui igũi hai jĩijĩ, do anu ku dɔ̃i inɛ ngboi sooge ŋa do ti sooge ŋa.

²⁶ Awɔi ì jilɛ do bisiɛ waati si bii katɔ ŋa aa ya fo a nɛ awɔ cangai kpãai inunu?

²⁷ Awɔi ì ya ni yembeeku ku fo walakɔ koo ce antɛɛ si antaii iri kuta ŋa?

²⁸ Í ya ce bi kuwaɛi si iri kuta. Bɛi í ya sũ. Si antaii kuta akã gɔi í wa bii inɛ kãma kaa tosi.

²⁹ Hai lele bɛi í ya maa cɔ bɛi á ce ku ba iŋaɛ. Hai jĩijĩi ijuɛ í ya hɔ̃nnɛ iŋa wa,

³⁰ domi amaɛ ŋa à ya bi iŋa tũtũ. Nɔ tengi bii iku ŋa à wa fei, tengi bɛi nŋu mɔ í ya wa.