Zɔɔbu 37 - Bibeli do fee

¹ Bii ǹ cɔ mii ŋau bɛ fei, idɔm í ya dedei. Í ya fo ku maa dingaa hai si agbɛɛi.

² I sotĩ i gbɔ ŋa bɛi Ilaaɔ̃ wa la, i sotĩ i gbɔ ŋa bɛi imuɛ wa fĩ wa.

³ Ilaaɔ̃ í jɔ̀ kuŋɔi ijĩ wa bɔ bii fei si lelei Aɔ̃, nɔ wa to wa hee si ilɛ ihɛ̃.

⁴ Si anyiɛi à ya ka gbɔ kufĩi imui Ilaaɔ̃ wa. Bii à gbɔ imuu gbakã, à ya ka yɛ kuŋɔi ijĩui.

⁵ Ilaaɔ̃ í ya ce mii iyi á jɔ̀ ka biti do imu ku nɛ gbugbãɛ. Í ya ce mii nla nla ŋa iyi a ci ya ka mà yaase nŋa.

⁶ Í ya sɔ̃ kutai ijĩ ku ni, cuku si ilɛ. Nɔ í ya sɔ̃ ijĩ hee do ijĩ nla nla ŋa ku ni, i wɔ ŋa.

⁷ Do yaase bɛɛbɛ í ya leekĩ icɛi amanɛi ku ba inɛ fei ku mà mii iyi nŋu wa ce.

⁸ Iŋai sako í ya baai koo lɔ ku sũ inɔ koloɛ.

⁹ Fufu nla nla í ya dede wai hai do ikpa awɔ cangai kpãai inunu, nɔ tũtũ ku naa hai do ikpa awɔ njɛi kpãai inunu.

¹⁰ Do fufui Ilaaɔ̃ í ya jɔ̀ inyi ku ce kuta, nɔ antaii inyiu ku baa ku le bɛi isɔ.

¹¹ Ilaaɔ̃i í ya jɔ̀ kudũi ijĩ ku nɛ mandi, nɔ nŋui í ya fangaa ŋa nɔ a maa ŋɔ.

¹² Bɛɛbɛi í ya jɔ̀ a bibii a maa too njɛ ku ba bɛi í jilɛ nŋa a ce si ilɛu ihɛ̃ ku kɔ̃, si bɛi í dasi idɔɛu.

¹³ Do yaase bɛɛbɛi idɔɔbiɛ wa ce icɛ si ilɛ ihɛ̃ ku ba ku kpã amanɛ iju walakɔ ku nyisiɛò kubiɛ.

¹⁴ Zɔɔbu, jɔ̀ i ce laakaii mii ŋau bɛ fei. Jɔ̀ i lasabu si mii jiida ŋa iyi Ilaaɔ̃ í ce.

¹⁵ Ì mà bɛi Ilaaɔ̃ í ce wa nɛò mii ŋau bɛ fei hee í jɔ̀ kudũi ijĩ wa ŋɔ?

¹⁶ Ì mà bɛirei í ce kudũi ijĩ wa yaa lele? Maamaakeu bɛ kumài Ilaaɔ̃i iyi kù nɛ lɛɛfi kãma.

¹⁷ Ibɔɛ ŋa à ya maa gbãa siɛ waati iyi fufui awɔ cangai kpãai inunu wa ce wa.

¹⁸ Lelei Aɔ̃ í le bɛi isɔ iyi à yɔ wa daana bɛi digi. Ì mà bɛi aa ce i jɔ̀ ku cĩ ku kɔ̃ɔsi bɛi Ilaaɔ̃?

¹⁹ Sɔ̃ wa bɛi aa ka sɔ̃ Ilaaɔ̃. Awa a kù mà nkãma hee ka sɔ̃ɔ ide.

²⁰ Bii ǹ wa n bi n fɔ ide aa koo a sɔ̃ɔ wa titãi? Yooi í bi ku ce nfei araɛ.

²¹ Anu akãi inunu í ya kuku inya bii kudũi ijĩ í biiɛ. Bii fufu í dede nɔ ku gbangaa kudũi ijĩu.

²² Nɔ inya kumá bɛi wura ku maa daana wa hai do ikpa awɔ njɛi kpãai inunu, ku maa kaakoò Ilaaɔ̃ bii fei. Nɔ inya kumáu í to njo.

²³ Inɛ kãma nwa kaa to bii Ilaaɔ̃ ilu gbugbã fei í wa. Ilaaɔ̃ í lai na gbugbãɛ, nɔ í lai na dee dee kú jɛɛ, ntɔɛ kù nɛ lɛɛfi. Nɔ ci ya taa inɛ ŋa gbugbã.

²⁴ Na ŋɔi í ce amanɛ ŋa à nɛ a jirimaɛ. Amma ci ya cɔ inɛ iyi wa cɔ araɛ ilu bisi.