Zɔɔbu 36 - Bibeli do fee

Elihu wa fɔ bɛi Ilaaɔ̃ í ya kɔ amanɛ ŋa

¹ Elihu í mɔsi do ideɛ í ni,

² Zɔɔbu, yɔkɔ temua má keeke ku ba n kɔɛ. Ǹ nɛ ide iyi an fɔ má si gãmɛi Ilaaɔ̃.

³ Hai bi inɛi ilu jĩijĩ ŋai ǹ koo ǹ ba kumàu wa ku ba n na Ilaaɔ̃ ntɔ nŋu iyi í takam.

⁴ Ide ntɔ takaɛi ǹ nɛ iyi an sɔ̃ɛ. Nɔ ǹ wa n naa si wajuɛi do kumà iyi í jɛ ntɔ.

⁵ Ilaaɔ̃ í jɛ ilu gbugbã, nɔ ci ya kɔ̀si inɛ kãma. Si gbugbãi bisiɛi í waò antaii mii fei.

⁶ Ci ya jɔ̀ inɛ laalɔ ŋa si hunde, amma kiitiɛ í ya jɛ dee deei si gãmɛi ilu are ŋa.

⁷ Ci ya fũsi inɛ dee dee ŋa awɔ. Í ya jɔ̀ a buba si kitãi bommai do ilaalu ŋa hee do ajɔ fei ku ba a jɛ ilu bɛɛrɛ ŋa.

⁸ Amma í ya jɔ̀ a na a jɛ bɛi inɛ ŋa iyi à mu aru. Nŋui í ya jɔ̀ a dasi wahala nɔ a kaa yɔkɔ a fita si.

⁹ Bɛɛbɛi Ilaaɔ̃ í ya nyisi ŋa daa iyi à ce, do bɛi faau nŋa í jɔ̀ à dedeò ija siɛ.

¹⁰ Í ya tilasi ŋa a sotĩ a gbɔ kai iyi wa ni nŋa, nɔ ku sɔ̃ ŋa a jɔ̀ laalɔ ku ce nŋa.

¹¹ Bii à gbɔ nɔ à jɛsi à jirima Ilaaɔ̃, à ya kpa irii kuwɛɛ nŋai si ididɔ̃ do inɔ didɔ̃ nla nla.

¹² Amma bii à kɔ̀ ku gbɔ, à ya mu kpãai ikui, nɔ a koo a ce nfe si na iyi í jɔ̀ a kù gbɔ yaaseɛ.

¹³ Inɛ laalɔ hai nɛ naanɛ ŋa, idɔ nŋa í ya kɔ̃i, nɔ bii Ilaaɔ̃ í jɔ̀ à dasi wahala, a ci ya tɔɔɛ faaba.

¹⁴ À ya kui si waati iyi à wɛɛ awaasũ. Kuwɛɛ nŋa í ya kpa irii si sakara.

¹⁵ Amma Ilaaɔ̃ í ya faaba ilu arei si antaii are ku jɛɛ. Nɔ do wahalai í ya sɔ̃ɔ ku ce laakai.

¹⁶ Nŋui á nya awɔ Zɔɔbu hai si inɔ kufɔ, nɔ ku jɔ̀ bukaatai mii iyi ì nɛ fei i baa. Sɔnda didɔ̃ ŋai aa ya maa jɛ.

¹⁷ Amma bii ì waa kɔ̀ò araɛ bɛi inɛ laalɔ, ijuukpãu kaa fo iriɛ. Asaiya á cãɛi.

¹⁸ Maà jɔ̀ idɔɔkɔ̃ ku bɔòɛ si laalɔ. Nɔ i maà jɔ̀ amua ŋa a sinda lasabuɛ hai si Ilaaɔ̃.

¹⁹ Amaniɛ do wuraɛ do gbugbãɛ iyi ì waa kaaba wa re, kaa yɔkɔ ku faabaɛ.

²⁰ Maà na i maa dasi naanɛ si idũ iyi aa ya nya inɛ ŋa hai si agbɛ nŋa.

²¹ Mu araɛ i maà na i sinda si laalɔ ku ce, domi na ŋɔi í jɔ̀ ì waa wahala.

Ilaaɔ̃ í nɛ gbugbã si mii fei

²² Ntɔi, Ilaaɔ̃ í nɛ bɛɛrɛ nɔ í nɛ gbugbã. Yooi í mà inɛ ku kɔ bɛi nŋu.

²³ Yooi í sɔ̃ɔ bɛi í nɛ ku ce. Yooi á jɛ ku sɔ̃ɔ ku ni, iyi ì ce kù sĩa.

²⁴ Maà ya gbɛjɛ ku saabuɛ si mii iyi í ce fei bɛi inɛ ŋa à waa ce do iri ku kɔ̃ ŋa.

²⁵ Inɛ fei wa cɔ kuceɛ ŋaui nɔ wa hɔ̃nnɛ ŋa hee jĩijĩ.

²⁶ Ilaaɔ̃ í la nɔ a kù mà bɛi kulaɛu í to. A kaa ka yɔkɔ ka ce dooi kukpɔi adɔ̃ɛ ŋa.

²⁷ Nŋui í ya fa inyi ikpa bi tɛɛ, nɔ ku jɔ̀ ku fo ilulu nɔ ku ceò ijĩ.

²⁸ Í ya jɔ̀ ijĩu ku maa tontooi hai si kudũi ijĩ ŋa wa akã akã nɔ ku maa wɔ si zamaa nla nlai amanɛ ŋa wa.

²⁹ Yooi á yɔkɔ ku mà bɛi kudũi ijĩ í ya ce ku toò bii fei do bɛi kulai ijĩ wa ce lelei Aɔ̃.

³⁰ I kù yɛ iyi Ilaaɔ̃i í fangaa inya kumái nŋu takaɛ, nɔ í jɔ̀ lɛlɛi tenku ŋa à wa si ilu kuku?

³¹ Í jɔ̀ ijĩ wa wɔ nɔ wa woò zamaai andunya fei do sɔnda nkpɔ nkpɔ.

³² Wa mu dagba lele si awɔɛ nɔ í ya sambaɛi tengi bii í cica.

³³ Í ya jɔ̀ ijĩ ku la ku nyisiò inɛ ŋa iyi nŋu í wɛɛ. Nɔ baa mɛɛmu gaa ŋa, à ya mà iyi í ce amɛɛ wai.