Zɔɔbu 35 - Bibeli do fee

Elihu í ni Zɔɔbu kù nɛ ide jiida kãma iyi á fɔ má

¹ Elihu í mɔsi do ideɛ má í ni,

² ì waa tamaa si ì nɛ ntɔi? Ì waa coo si aa jɛ dee dee bi Ilaaɔ̃i?

³ Ì wasi ku ni ì nɛ ntɔ, nɔ baa bii i kù ce dulum, i kaa ba aranfãani kãma.

⁴ Amui an jɛɛ, awɔ do kpaasiɛ ŋa.

⁵ Wu iju i cɔ lele ku sĩa, nɔ i cɔ kudũi ijĩ ŋa, aa yɛ à wa lelei antaii iriɛ à gboka à reɛ.

⁶ Baa bii ì waa ce dulum, iwoi aa mɛɛ Ilaaɔ̃ si. Bii í yɔkɔ dulum dɛɛ ku kpɔ ku maa kɔ̃ɔsi, mii aa ceaa.

⁷ Bii ì nɔ ì waa jɛ kuwɛɛɛ bɛi í biu mɔi, mii á ba si.

⁸ Amanɛ bɛi awɔ takaɛi laalɔ ku ceɛ á mɛɛ. Nɔ amanɛ bɛi awɔi jiida kú jɛɛ á sobi.

⁹ Bii inɔ kukã í kpɔ wa kɔ̃ɔsi inɛ fei í ya maa dɔ̃ anui, nɔ a maa tɔɔ sobi na laalɔ iyi í la wa koo.

¹⁰ Amma inɛ kãma ci ya ni, hee iwoi Ilaaɔ̃ nŋu iyi í takam í wa, nŋu iyi í ya jɔ̀ ka maa kɔ̃ iri idũ.

¹¹ Nŋui í ya jɔ̀ ka ba ikɔ hai bi mɛɛmu ŋa, nɔ ka ba bisi hai bi yɛi ŋa.

¹² Inɛ ŋa à dɔ̃ anu à waa tɔɔ faaba, amma Ilaaɔ̃ í kɔ̀ ku jɛ nŋa na faau nŋa do na laalɔ ku ce nŋa.

¹³ À waa dɔ̃ anu mbɛ si ngbɛ. Ilaaɔ̃ ilu gbugbã fei kù gbɔ nŋa mɔm, nɔ í kɔ̀ ku de si ŋa baa itĩ.

¹⁴ Aa fɔ idei awɔ iyi ì ni i kù waa yɔɔ? Ì ni ideɛ í wa si wajuɛ nɔ ì waa degbeɛ.

¹⁵ Ilaaɔ̃ kù nyisi idɔɔkɔ̃ɛ wa, nɔ kù waa saalu laalɔ iyi inɛ ŋa à waa ce,

¹⁶ ŋɔi í jɔ̀ ì ya maa fɔ ide nfe, nɔ i ci ya mà bɛi ì waa dɔ̃.