Zɔɔbu 34 - Bibeli do fee

Elihu í yɛ taalei Zɔɔbu

¹ Elihu í mɔsi do ideɛ í ni,

² iŋɛ ilu laakai ŋa, i sotĩ i gbɔ idem ŋa. Iŋɛ iyi ì nɛ kumà, i de itĩ si idem ŋa,

³ domi itĩi í ya gbɔ ide bɛi gɛlɛ í ya gbɔ didɔ̃i sɔnda ŋa.

⁴ Ka cica iyi í jɛ dee dee nɔ awa fei ka cɔ iyi í sĩa ajɔ.

⁵ Zɔɔbu í wasi ku ni, nŋu kù nɛ taale kãma nɔ Ilaaɔ̃ í kɔ̀ ku na nŋu ntɔ.

⁶ Nŋu í nɛ ntɔ nɔ wa cɔ nŋu woo sɔ ibo. Nŋu kù ce dulum kãma gɔ, do nŋu fei Ilaaɔ̃ í mɛɛ nŋu, nɔ nŋu kaa ba iri.

⁷ Inɛ gɔ í wɛɛ má bɛi Zɔɔbu iyi Ilaaɔ̃ ku yaako í yɛa bɛi inyi ku mɔ,

⁸ walakɔ iyi wa nɛ si inɔi woo ce laalɔ ŋa do si inɔi woo ce dulum ŋa?

⁹ Wa ni, icɛ ngbɛi bii amanɛ wa dɛdɛ ku ce mii iyi á dɔ̃a Ilaaɔ̃ si.

¹⁰ I sotĩ i gbɔ idem ŋa, iŋɛ ilu yaase ŋa. Ilaaɔ̃ kù jɛ woo cea inɛ laalɔ, nŋu iyi í jɛ ilu gbugbã fei, kaa ce mii iyi kù jɛ dee dee.

¹¹ Í ya sãa amanɛi si bɛi kuceɛ í yɛ. Í ya sãa amanɛi si bɛi daaɛ í yɛ.

¹² Ntɔ ntɔ Ilaaɔ̃ kù mà laalɔ ku ce. Ilaaɔ̃ ilu gbugbã fei, kiitiɛ ntɔi í ya jɛ.

¹³ Inɛ gɔi í daa ilɛ si awɔ? Mà inɛ gɔi í ni ku maa gbɔa andunyau.

¹⁴ Bii í jɛ idei irii araɛ nŋu akãi wa gbɔa, walakɔ bii í nya hundeɛ iyi í daa amanɛ ŋa do mɛɛmu ŋa si,

¹⁵ mii fei á kui anu akã, nɔ amanɛ ku kpɔò sãa.

¹⁶ Zɔɔbu, bii í jɛ ì nɛ bisii, jɔ̀ i sotĩ i gbɔ idem ŋau ihɛ̃.

¹⁷ Bii Ilaaɔ̃ í jɛ mbɛɛi ntɔi á yɔkɔ ku maa mu bommai? Nɔ awɔ ì waa yɛ taalei njɛ iyi í jɛ ilu gbugbã do inɛ dee dee?

¹⁸ Nŋu akãi á yɔkɔ ku sɔ̃ ilaalu inɛ nfe ku jɛɛ, nɔ ku sɔ̃ amanlu ku ni, awɔ woo kpa inɛi.

¹⁹ Ci ya cɔ inɛ nla ku jɛi inɛ gɔ, ci ya nɔ ku cɔ ilu fia ku re ilu are, domi nŋui í taka aŋa fei.

²⁰ Idũ laja, inɛ nla ŋa à ya kui anu akã. Zamaa í dedeò ide ku kɔ̀, nɔ inɛ ngbo ŋa à ce nfe. Woo taa inɛ ŋa gbugbãu aa kpaa, kaa gaabu,

²¹ domi Ilaaɔ̃ wa yɛ kucei inɛ fei nɔ wa cɔ isɛɛnɛi inɛ fei.

²² Ilu kùkù walakɔ jĩjĩ kù wɛɛ bii woo ce laalɔ ŋa aa ba a manji.

²³ Ilaaɔ̃ kù nɛ bukaatai ku kɛɛma inɛ gɔ do yaase ikã gɔ ku bɛi ku bɔòɛ bi ku ce kiiti.

²⁴ Í ya nya ilu gbugbã ŋai ci ya kɛɛma ŋa, nɔ ku sãsi inɛ mmu gɔ si agbɛ nŋa,

²⁵ domi í mà daa nŋa. Idũ akãi í ya kɛkɛ ŋa ku tɛɛsɛ ŋa.

²⁶ Í ya ce nfe nŋai si wajui zamaa bɛi woo ce laalɔ ŋa,

²⁷ si na iyi í jɔ̀ à sinda à toaa anyi nɔ a kù gbɔ yaasei ikɔɛ ŋau.

²⁸ Aŋai à jɔ̀ hai nɛ gbugbã ŋa do ilu are ŋa à waa tɔɔ faaba, nɔ anu ku dɔ̃ nŋau í to siɛ.

²⁹ Bii Ilaaɔ̃ wa cokoɛ, yooi á yɛ taaleɛ. Bii í nɔ í bi ku manji mɔi yooi á yɔɔ. Amma á yɔkɔ ku tilasi ilɛ gɔ walakɔ amanɛ ŋa

³⁰ ku jilɛ nŋa ilaalu laalɔ woo zamba inɛ ŋa.

³¹ Ka jilɛ si inɛ gɔ í sɔ̃ Ilaaɔ̃ í ni, ǹ ba ijuukpã, n kaa n ce laalɔ má.

³² Nyisim kurara ŋa iyi n kù yɔkɔ n kù yɛ. Bii ǹ ce iyi kù sĩai, n kaa n coo má.

³³ Bii lafɛ̃ɛ í ni bɛɛbɛ, Ilaaɔ̃ í nɛ ku kpãa iju má? Awɔ iyi ì waa gbagba si ide ŋau, yoomai í jɛ lasabuɛ, domi awɔi ì waa jilɛ ideu, kù jɛ amu. Fɔ mii iyi ì yɛ.

³⁴ Ilu laakai ŋa aa wa anyim. Nɔ ilu bisi iyi wa gbɔ idem á lasabu bɛi amu mɔ.

³⁵ Zɔɔbu wa fɔ ide, amma kù mà mii iyi wa fãa. Ideɛu wa nyisi iyi kù mà nkãma.

³⁶ Idei woo ce laalɔ ŋai wa fɔ. Na nŋu, í gbe wahalaɛu ku bɔ hee kɔɔɛ,

³⁷ domi si antaii kuraraɛui í nyi wa kɔ̃ɔsi ide ku kɔ̀ mmu ŋa má. Í fɔ ide wa dakpɛi si wa, wa yɛ taalei Ilaaɔ̃ do yaase ikã ikã nkpɔ nkpɔ.