Zɔɔbu 33 - Bibeli do fee

Elihu í ni, Ilaaɔ̃ í ya na amanɛ baaui titã

¹ Nsɛi awɔ Zɔɔbu, sotĩ i gbɔ idem ŋa fei.

² Ǹ nɛ ide gɔ iyi an fɔ nɔ an fɔɔ wa.

³ Ntɔi an sɔ̃ɛ, nɔ ide iyi ǹ mà sãa sãai an sɔ̃ɛ.

⁴ Hundei Ilaaɔ̃i í takam. Hundei Ilaaɔ̃ ilu gbugbã feii í jɔ̀ ǹ wɛɛ.

⁵ Jãm bii aa yɔkɔ. Ce sɔɔlui ideɛ ŋa iyi aa kakɔɔm do. Wɛɛò sɔɔlu.

⁶ Amu amanɛi bɛi awɔ mɔ si wajui Ilaaɔ̃. Do amài í takam bɛi awɔ mɔ.

⁷ Na nŋu, i kù nɛ i maa yaya do njo si wajum, n kaa n taɛ gbugbã.

⁸ Amma itĩm í gbɔ ì fɔ ide gɔ ì sisi ì ya maa ni

⁹ ì má, i kù ce dulum kãma, i kù nɛ taale kãma, i kù rara si nkãma,

¹⁰ nɔ Ilaaɔ̃ wa muɛ do ide ŋa. Nɔ wa ceɛ bɛi mbɛɛɛ.

¹¹ Í kpati kutɛɛ ŋa, nɔ wa cɔ bɛi ì waa ce fei.

¹² An jɛɛ iyi si bɛ i kù nɛ ntɔ, domi Ilaaɔ̃ í re amanɛ.

¹³ Ì waa bi i kakɔɔ Ilaaɔ̃i? Ilaaɔ̃ kù nɛ ku sɔ̃ inɛ gɔ mii iyi nŋu wa ce.

¹⁴ Amma Ilaaɔ̃ í ya fɔ idei do yaase ikã ikã, nɔ a ci ya ka nɛ si laakai.

¹⁵ Í ya fɔ ide si ala do si kuyɛ idũ waati iyi amanɛ ŋa à sũ à sĩ njoo si daayi nŋa.

¹⁶ Waati nŋui í ya jɔ̀ a ce kuyɛ nɔ ku sɔ̃ ŋa a ce laakai,

¹⁷ si na iyi í jɔ̀ wa bi ku sinda ŋa wa hai si laalɔ ku ce nɔ kù bi a dasi faau.

¹⁸ Do yaase bɛɛbɛi í ya nya ŋa si andɛi iku do si kpãai iku.

¹⁹ Ilaaɔ̃ í ya baaò amanɛ wa si kpãa má do bɔ̃ɔ. Í ya jɔ̀ ku sũò ara gbãa, í ya jɔ̀ araɛ ku maa yaya hai nɛ kɔɔ.

²⁰ Ijɛ kãma kaa bindɛɛ hee má jɛ sɔnda iyi í ya bi ku re.

²¹ Í ya gbɛi hee a kaa yɛ bãasĩ kãma si araɛ má. Kũkũɛ ŋa iyi a kù waa yɛ fei wo, a fita gbugbãa.

²² Hundeɛ kù jĩò balɛ, nɔ kuwɛɛɛ kù jĩò bi kuwai iku ŋa.

²³ Amma si inɔi amaleka dubu ŋau, amaleka akã í to ku nyisi mɔkɔu kpãa iyi í sĩa. Amaleka ŋau, aŋai à jɛ woo fɔ idei Ilaaɔ̃ ŋa.

²⁴ Amalekau á nɛ araareɛ, nɔ á tɔɔ Ilaaɔ̃ ku ni, maà jɔ̀ mɔkɔu ihɛ̃ ku ku, ǹ ba mii iyi aa sã ku baò faaba.

²⁵ Nɔ arai mɔkɔu ku baa si agbɛɛ má bɛi ti ama keeke, bii à yɔɔ aa ni ama awaasũi.

²⁶ Bii wa ba Ilaaɔ̃ ide ku fɔ á ya gbɔai do bɛɛrɛ. Á ya bɔ bi Ilaaɔ̃i do inɔ didɔ̃, domi Ilaaɔ̃ í baaò kuwɛɛɛ wa si agbɛɛ.

²⁷ Á ya kɔ̃ iri si wajui inɛ ŋa ku maa ni, ǹ ce dulum nɔ ǹ kua wooda. Amma n kù ba ijuukpã iyi ǹ nɛ n ba.

²⁸ Ilaaɔ̃i í nya hundem í jɔ̀ n kù ku. Ǹ wɛɛ má nɔ ǹ wa n yɛ inya kumá.

²⁹ Mii iyi Ilaaɔ̃ í ya maa cea amanɛ mbɛ waati kãma fei,

³⁰ ku ba ku nya amanɛ hai si iku nɔ ku baaɛ wa si inya kumái kuwɛɛ.

³¹ Zɔɔbu, jɔ̀ i coko i sotĩ i gbɔ ide iyi ǹ wa n fɔ.

³² Bii ì nɛ ide iyi aa fɔi, jɛɛm wa. Fɔ ideɛ wa ku ba n naɛ ntɔ.

³³ Bii i kù nɔ i kù nɛ ide gɔ mɔi, coko nɔ i sotĩ i gbɔ bisi iyi an kɔɛ si.