Zɔɔbu 32 - Bibeli do fee

Idei Elihu

¹ Elifazi do Bida do Sofaa a kù waa jɛa Zɔɔbu má si na iyi í jɔ̀ wa cɔ araɛ hai nɛ taale.

² Ŋɔi idɔi Elihu amai Barakɛli í kɔ̃. Elihuu inɛi dimii Buuzii si nyaanzei Ramu ŋa. Idɔɛ í kɔ̃ si Zɔɔbu si na iyi í jɔ̀ Zɔɔbu í jilɔɔ si dee dee ku jɛi nŋu í re Ilaaɔ̃.

³ Amma idɔɛ í kɔ̃ má si kpaasi mɛɛtaɛ ŋau si na iyi í jɔ̀ a kù ba kurara gɔ iyi Zɔɔbu í ce baa do iyi à waa yɛ taaleɛ fei.

⁴ Kpaasi ŋau à gboa Elihu. Na nŋui í ce kù ba Zɔɔbu ide ku fɔ titã.

⁵ Amma idɔɛ í kɔ̃ ntɔ ntɔ si na iyi í jɔ̀ inɛ mɛɛta ŋau a kù nɛ ide kãma iyi aa jɛaò Zɔɔbu má.

Elihu í fɔ mii iyi í jɔ̀ nŋu wa so ide

⁶ Ŋɔi Elihu amai Barakɛli inɛi Buuziu í so ide í ni, amu ama keekei, amma iŋɛ ì ce inɛ ngbo ŋa. Na nŋui í jɔ̀ ǹ ce njoi lasabum ku sɔ̃ ŋɛ.

⁷ Nɔ ǹ ya n maa n yɔɔ iyi inɛ ngbo ŋai aa mà ide ku fɔ, inɛ ŋa iyi à gboom ŋa, aŋai aa mà inɛ ŋa ku kɔ si bisi.

⁸ Amma ntɔ ntɔ, mii iyi í ya jɔ̀ amanɛ ku jɛ ilu bisii, í jɛ hundei Ilaaɔ̃ ilu gbugbã fei.

⁹ Kù jɛ agboi í ya jɔ̀ amanɛ ku jɛ ilu laakai. Kù jɛ agboi í ya jɔ̀ amanɛ ku mà mii ŋa ku wũaa.

¹⁰ Na nŋui í ce ǹ ni i jɔ̀ amu mɔ n fɔ iyi ǹ mà wa, nɔ i sotĩ i gbɔ ŋa.

¹¹ Ǹ desi ide nŋɛ ŋa itĩ hee kɔɔ, ku ba n gbɔ do yaase bɛi aa jɛaa Zɔɔbu ŋa si ide ku fɔ nŋɛ.

¹² Ǹ desi ide nŋɛ itĩ do laakai, nɔ baa inɛ akã nŋɛ kù yɔkɔ kù kãmiaɛ. Kãma nŋɛ kù yɔkɔ kù jɛaa ideɛ ŋau.

¹³ Amma i maà na i ni ŋa à ba ide iyi í jɛ idei ilu laakai. Ilaaɔ̃i á yɔkɔ ku kakɔɔɛ, kù jɛ amanɛ.

¹⁴ Zɔɔbu kù bam ide ku fɔ titã, amu de ǹ bi n baa ide ku fɔ do yaase iyi kù jɛ akã do tu ŋɛ.

¹⁵ Zigi nŋɛ í da, i kù waa fɔ ide má ŋa, i kù mà bɛi aa ni má ŋa.

¹⁶ Ǹ coko ǹ leekĩ ǹ wa n degbe ŋɛ. Amma si bɛi i kù waa fɔ ide má ŋa, nɔ i kù nɛ bɛi aa dɔ̃ ŋa,

¹⁷ amui an so ide bɛbɛi n fɔ iyi ǹ mà.

¹⁸ Ide iyi ǹ nɛ í kpɔ, nɔ n kaa n yɔkɔ n muu si inɔm.

¹⁹ Wa ce si inɔm bɛi atɛ̃ vɛ̃ɛ iyi wa gba, nɔ wa bi ku lɛgɛ bɔgɔ titɔ̃ ŋa si bii à dasiu.

²⁰ I jɔ̀ amu mɔ n fɔ idem ku ba aram ku sũ. Amu mɔ an fɔ bɛi ǹ yɛ.

²¹ N kaa n cɔ ijui inɛ kãma, nɔ n kaa n lɛlɛ inɛ kãma.

²² N kù mà amanɛ ku lɛlɛ, nɔ baa bii í jɛ ǹ wa n cooi wo, Ilaaɔ̃ woo takam á kpam ku kpɛ.