Zɔɔbu 31 - Bibeli do fee

Zɔɔbu í ni, n kù nɛ taale kãma bi Ilaaɔ̃

¹ Ǹ ce kuwã wo do kugbasi ǹ ni n kaa n cɔ ama mudɛ̃ɛ hee kɔdɛɛm ku lɔ siɛ.

² Bii ǹ ce bɛɛbɛ, riba yoomai Ilaaɔ̃ á jilɛɛm lele. Mà mii Ilaaɔ̃ ilu gbugbã fei á sambaam wa hai lele.

³ [Ì ya maa ni ŋa,] woo kpa inɛ ŋai laalɔ í ya ba, nɔ woo ce laalɔ ŋai inɔ kufɔ í ya ba.

⁴ Nsɛi Ilaaɔ̃ kù waa mà kucem nii? Ku waa mà jiai isɛ bɛi ǹ wa n wu fei?

⁵ N ci ya n sɔ ibo, n ci ya n nɛ lasabui inɛ ŋa ku zamba.

⁶ Ilaaɔ̃ kú kiitim si ntɔ, á yɛ iyi n kù nɛ taale kãma.

⁷ Bii í jɛ ǹ yaa hai si woodaɛ ŋa, walakɔ idɔm í lɔ si mii iyi ijum wa yɛ, walakɔ awɔm í ce daa sãmi gɔ,

⁸ ku jɔ̀ inɛ mmu gɔ ku na ku jɛ ribai icɛm, walakɔ ku jɔ̀ a da jĩi ŋa iyi ǹ lɔ.

⁹ Bii kɔdɛɛm í lɔ si inaabo gɔ nɔ ǹ wa n degbe mɔkɔɛ ku fita,

¹⁰ abom mɔ koo cea inɛ gɔ icɛ nɔ inɛ fei ku maa cea ndɛɛ bɛi í bi.

¹¹ Idei iju hai nɛ anyɔ mbɛ, nɔ í to woo kiiti ŋa a yɛ taalei ideu.

¹² Kurarau bɛ í nɛ ku jɛ ina iyi á jo amu takam nii mam mam do mii iyi ǹ nɛ fei.

¹³ Bii woo ce icɛm gɔ inaabo walakɔ inɛmɔkɔ í naa wa gbagba sim, ǹ ya n kɔ̀ ku naa iyi í jɛ titɛɛi?

¹⁴ Bii ǹ nɔ ǹ kɔ̀, bɛirei an ce bii Ilaaɔ̃ í na wa jaa wa walakɔ bɛirei an ce bii í na wa beem ide,

¹⁵ domi Ilaaɔ̃ akãui í taka wa hai si inɔi iye nwa ŋa wa.

¹⁶ Ǹ kɔ̀ ilu are ŋa mii iyi à naa ku tɔɔm nii de. Mà ǹ nɔ ǹ jɔ̀ jaaɔ̃ gɔ í cɔ sim kpãai ngɔgɔ hee ijuɛ í gbɛi.

¹⁷ Ǹ jɛ sɔndam fei amu akã ǹ kɔ̀ kɔyɔ gɔ ajɔ gɔi?

¹⁸ Aawo, hai awaasũm, amui ǹ jɛ bɛi baaɛ nɔ ǹ woo í dede í la bi tom. Nɔ si kuwɛɛm fei ǹ ya n maa n sobi jaaɔ̃i.

¹⁹ Ilu are yoomai ǹ yɛ bũmbũm walakɔ hai nɛ gbugbã gɔ iyi kù nɛ mii ku bii,

²⁰ nɔ ǹ kɔ̀ ku biiɛ do acɔ iyi à ce do ikũi ntoi angudãm ŋa?

²¹ Bii í nɔ í jɛ ǹ la si kɔyɔ gɔ bi ku ce kiiti si na iyi í jɔ̀ ǹ mà iyi woo kiiti ŋau fei aa wa anyim mɔi,

²² kɔngɔm ku tu wa hai si bũum, nɔ ikpam mɔ ku cɛ hee do lelei konkon dii ikpam.

²³ Ntɔ ntɔ ǹ nɛ njoi ijuukpãi Ilaaɔ̃ hee í caa, n kaa n jɛ n leekĩ si wajui amanlu kú jɛɛ.

²⁴ Wurai ǹ dasi naanɛ? Mà ǹ nɔ ǹ sɔ̃ isɔ fũfũ ǹ ni, awɔi aa degbem.

²⁵ Kù jɛ amanim do mii nkpɔ nkpɔ iyi ǹ nɛi ǹ ya n nɛ si inɔ didɔ̃.

²⁶ Waati iyi ǹ yɛ inunu í fita wa ku sĩa sĩa, nɔ cukpa mɔ wa nɛ inɛi amanlu,

²⁷ ǹ lasabu si idɔm baa si asii ǹ tɔɔ ŋa bɛi iwɛ̃ ŋa ajɔ gɔ?

²⁸ Bii í jɛ ǹ coo wo, ǹ nɛ n ba ijuukpãi woo kiitim, domi an jɛ ilu muafiti bi Ilaaɔ̃.

²⁹ Mbɛɛm yoomai ǹ yɛ í wa si wahala do inɔ kufɔ nɔ í jɛɛm inɔ didɔ̃.

³⁰ N ci ya n jɛ baa gɛlɛm ku rara ku ceekpeɛ n ni Ilaaɔ̃ ku kpaa.

³¹ Yooi n kù na iŋa kù ŋɔ kù yo. Inɛ ŋa iyi à wa kpasɛ̃m fei à jɛ sɛɛda.

³² Inɛ njoo ci ya sĩ njoo waduude ajɔ kãma, domi ǹ ya n maa n gba woo bɔ ilu ŋai.

³³ Si bɛi inɛ nkpɔ nkpɔ í ya ce, ǹ singa kuraram do taalem ŋai?

³⁴ N ci ya n ce njoi n bɔ si bantuma, na ide ku fɔi zamaa. N ci ya n so anyɔ hee n mɔngɔ ide ku fɔ nɔ n gbe kpasɛ̃m.

³⁵ Yooi an ba ku sotĩ ku gbɔ idem. An kpa irii idem ŋa iyi ǹ wa n fɔ. Bɛbɛi Ilaaɔ̃ ilu gbugbã feii ǹ bi ku jɛɛm. Yooi á nam tia si bii mbɛɛm wa yɛ taalem nɔu wa.

³⁶ An sooi hee lele si kɔngɔm, nɔ n dũu si ikpom bɛi fulai amanlu.

³⁷ An sɔ̃ Ilaaɔ̃ isɛɛnɛm ŋa fei. An bɔ bi tɛɛi do bɛɛrɛ bɛi amanlu.

³⁸ Bii í jɛ ilɛm wa dɔ̃ anu sim, walakɔ fiii ilɛm ŋa à waa kpata sim

³⁹ si na iyi í jɔ̀ ǹ fɔ inɔi inɛ ŋa iyi à tako à nɔɔ, na sɔndaɛ iyi ǹ jɛ n kù sã fiaɛ,

⁴⁰ ilɛu ku wu agũ ŋa do iyi á fita bilee. Ilɛu ku fita fɔfɔ sãmi ŋa do iyi á fita ɔɔzu. Kɔɔi idei Zɔɔbu ŋa mbɛ.