Zɔɔbu 30 - Bibeli do fee

Kuwɛɛi Zɔɔbu nsɛi...

¹ Nɔ nsɛiu ihɛ̃, amui ǹ jɛ dɔ̃anyii amu ŋa iyi a kù tom, aŋa iyi baa baa nŋa ŋa a kù to a wa inɔi aja gaam ŋa tako.

² Nɔ mɔm mii an maa n cɔ si icɛ nŋa, aŋa iyi a kù nɛ gbugbã kãma.

³ Ari do awɔ ngbɛ à jɔ̀ à gbɛɛji. Si inɔ gbaa ŋai à ya koo a maa fengee mii iyi aa ba a jɛ si ilu kuku tengi bii inɛ gɔ kù wa.

⁴ Fɔfɔ ŋai à ya koo a dɛ wa hai si abɛi ama jĩi ŋa, do icãi jĩi ŋa a jɛ sɔnda nŋa.

⁵ Inɛ ŋa à ya dɔ̃ anu si ŋai a maa lele ŋa bɛi woo ce ile ŋa.

⁶ Si inɔ lɔɔma kugaabu ŋai à ya wa do si inɔ isa ŋa do si isai kuta ŋa.

⁷ À ya maa dɔ̃ anui inɔ sako bɛ, nɔ a koo a ce kpele godoi njɛ si inɔ agũ ŋa.

⁸ Sũmu ŋai iyi inɛ kãma kù bi ŋa. Nɔ à waa lele ŋa hai si ilɛu.

⁹ Amma nnyi amui ǹ jɛ mii ku kɔ̃ò iri nŋa, à wasi irim ku sɔ bii fei.

¹⁰ À ya sa a jɔ̀m nii a nyisiò iyi aŋa à cém, walakɔ mɔm a tu sim antɔ.

¹¹ Hai waati iyi Ilaaɔ̃ í kayem nɔ í dasim anyɔu ihɛ̃, a kù nɛ anyɔm má baa keeke.

¹² Zamaa nla nlai í ya dede sim hai do ikpa awɔ njɛm a maa dɛdɛ a tam ilɛ do kati anu akã. Aŋa fei à ya dede sim wai a maa dɛdɛ ku ce nfem.

¹³ À sɛi à daam do bii fei, à waa dɛdɛ laalɔ ku ceem. Kãma nŋa ci ya nɛ bukaatai sobii inɛ gɔ.

¹⁴ À lɔ sim wai bɛi sooge ŋa iyi à lɔ inɔ ilu hai do foo nla nla gɔ. Nɔ à so tuubam wa hai do foo bii bindiu í cuku.

¹⁵ Zigim wa da do bii fei nɔ í nya bɛɛrɛm fei bɛi fufu í soo í nɛò. Inɔ didɔ̃m í nya bɛi kudũi ijĩ iyi í nya.

¹⁶ Nsɛiu ihɛ̃ inɔ kufɔi ǹ wa si. Nkãma kù gbeem má bii kù jɛ weewea.

¹⁷ Idũ, aram í ya maa roi hee si kũkũ, ci ya muum baa kusĩmi.

¹⁸ Ilaaɔ̃ í ya ibɔm do gbugbã, nɔ wa cii kɔ̃ɔm bɛi kɔ̃ɔi ibɔu kù cĩ.

¹⁹ Ilaaɔ̃i í sɔsim inɔ pɔkɔdɔ, nɔ ǹ jɔ sãa do ilúlu.

²⁰ Ilaaɔ̃ Lafɛ̃ɛm, ǹ wa n kpeɛ, amma i kù waa jɛɛm. Ǹ wa n leekĩ si wajuɛ, amma ijuɛ wa kuam.

²¹ Bi tom ì baa ì yɛi bɛi woo kpa inɛ. Ì sinda sim wai do gbugbãɛ fei.

²² Ì jɔ̀ fufu í som lele wa gbugbãm do gbugbã nɔ wa fĩm bii fei.

²³ Ǹ wa n mà sãa sãa bi ikui ì waa bɔòm, nɔ bi ku bɔi inɛ iyi í wɛɛ si hunde feii.

²⁴ Amma baa bii inɛ á ku, kù nɛ ku tɔɔ faaba má? Si antaii inɔ kufɔ, kù nɛ ku tɔɔ sobi?

²⁵ N kù kpataa inɛ ŋa iyi kuwɛɛ nŋa í wa si wahala? Idei ilu are ŋa ci ya maa mum waati kãma fei?

²⁶ Ididɔ̃i ǹ wa n degbe wo, amma wahalai ǹ na ǹ ba. Inya kumái ǹ wa n degbe wo, amma ilu kukui í naa sim.

²⁷ Idɔm kù buba hai waati iyi kuwɛɛu ihɛ̃ í bam.

²⁸ Si inɔ kufɔi ǹ ya n maa n nɛ si. Bi tom, inunu kù wɛɛ. Si inɔ zamaai ǹ ya n maa n tɔɔ sobi.

²⁹ Wee nsɛi ǹ baa ǹ jɛ kpaasii ajaako do taataa [na anu ku dɔ̃i ikum iyi ǹ wa n yɛu].

³⁰ Batai aram í baa wa dũ, nɔ aram wa gbãa hee lɛlɛ.

³¹ Mɔɔlɔi akũi ǹ ya n maa n cã, nɔ si inɔ kufɔm, ǹ ya n maa n fãa woo kpata ŋa yeei.