Zɔɔbu 3 - Bibeli do fee

Zɔɔbu wa weewea

¹ Si anyii nŋu, ŋɔi Zɔɔbu í cĩ gɛlɛ í ceekpe ajɔ iyi à búu.

² Í so ide í ni,

³ Ilaaɔ̃ ku laale ajɔ iyi à bím do idũ si bii à so asĩm.

⁴ Inya kumái ajɔ nŋu bɛ ku kpɔò ilu kuku, nɔ Ilaaɔ̃ ku maà ye gigii ajɔu wa hai lele, nɔ inya ku maà má siɛ.

⁵ Ilu kuku do jĩjĩi iku ku biiɛ, nɔ kudũi ijĩ ku ya maa wa antaiɛ waati kãma fei, nɔ ilu kukui dasã ku jɔ̀ njo ku naa siɛ.

⁶ Ilu kuku ku jɛ idũi ajɔ iyi à so asĩm, nɔ ku maà nɛ inɔ didɔ̃ kãma bɛi ajɔ ŋa iyi à gbe si adɔ̃ nŋu. A maà ya kaa mɔm si inɔi cukpa ŋau.

⁷ Idũu ku ce gbɛnda, nɔ ku maà nɛ anu ku dɔ̃i inɔ didɔ̃.

⁸ Woo ce dobu dobu ŋa iyi à ya ceekpe ajɔ ŋa, nɔ à mà akandamau ku kpe wa hai inɔ inyiu fei a fɔ bii fei iyi idũu í ya naaò laalɔ wai.

⁹ Leleaɔ̃i amɛɛjuumá ŋau a kaa máa inya, nɔ kú cɔ kpãai inya kumá ku kua. Kaa yɛ inya kumái amɛɛjuumáu,

¹⁰ domi idũu kù cĩmbo inɔ iyi í so asĩm nɔ kù ganji wahala ŋa a bam.

¹¹ Na mii í ce n kù ku si inɔi iyem. Na mii í ce n kù ku hai ǹ cuku wa gbakã.

¹² Na mii í ce ǹ ba itã si bii à lesim. Na mii í ce ǹ ba amɔ iyi ǹ mɔmɔ.

¹³ Bii n kù ba bɛɛbɛ wo, nnyiu ihɛ̃ an tɛ itĩ ilɛ n sũ sɛ̃ɛ n sĩmi,

¹⁴ do ilaalu ŋa do woo kɔ nŋa ŋa iyi à ya teese à maa ma ile kuku ŋa wo.

¹⁵ Ntɔ ntɔ, an sũ sɛ̃ɛ do amanlu ŋa iyi à nɛ wura nɔ à ya dasi ile nŋa isɔ fũfũ ku kɔ̃ wo.

¹⁶ Á sĩa asĩm nii ku nya a sim bɛi amu ŋa iyi à bí nɔ a kù yɛ inya kumá.

¹⁷ Inɔ balɛ bɛi ara gbãai ilu inɔ kukã ŋa í ya leekĩ, nɔ inɛ ŋa iyi à gbɛɛji ŋa à ya maa sĩmii.

¹⁸ Inɛ ŋa iyi à wa piisɔ̃ɔ ŋa wo à ya maa wɛɛi do laakai tengi bɛ, a ci ya gbɔ imui woo kpã inɛ ŋa iju.

¹⁹ Ilu amani ŋa do ilu are ŋa fei à ya wa bɛ, nɔ aru í ya nɛ araɛ si gãmɛi lafɛ̃ɛɛ.

²⁰ Na mii í ce [Ilaaɔ̃] wa mua inɛ iyi wa wahala inya kumá. Na mii í ce í jɔ̀ ilu inɔ kufɔ ŋa à waa wɛɛ,

²¹ aŋa iyi à waa bi iku a kù waa ba, nɔ mɔm à waa dɛdɛ ikuui bɛi amani,

²² aŋa iyi aa nɛ inɔ didɔ̃ bii à so ŋa à waa bɔ ku si ŋa.

²³ Na mii í ce à bí inɛ iyi kù mà kpãa iyi wa too, nɔ Ilaaɔ̃ wa manteɛ do cingaa bii fei.

²⁴ Ntɔ ntɔ, wahalam ŋai à gba agbɛi sɔndam, nɔ anu ku dɔ̃m wa fita wa bɛi inyii isɔ̃.

²⁵ Mii iyi ǹ wa n ce njoɛ, nŋui wa bam, nɔ mii iyi ǹ wa n saa, nŋui wa bam wa.

²⁶ N kù nɛ laakai ku sũ do idɔ ku buba hee má jɛ kusĩmi. Nɔ idɔ ku dedei í to wa sim.