Zɔɔbu 29 - Bibeli do fee

Ide ankãanyi iyi Zɔɔbu í fɔ si gãmɛi kuwɛɛ didɔ̃i takoɛ ŋau

¹ Nɔ Zɔɔbu í so ide má í ni,

² bii í jɛ á ce wo ǹ bi n nyi si kuwɛɛi takom, si waati bii Ilaaɔ̃ wa degbem.

³ Waati bɛɛbɛ fitilaɛ í ya maa má inyai do wajum. Inya kumáɛi í ya jɔ̀ n yɛ bii ǹ wa n bɔ si ilu kuku.

⁴ Waati nŋu, ǹ wɛɛ awaasũ ǹ wa n gbeò gbugbã, nɔ kubii Ilaaɔ̃ wa wɔ njoo si kpasɛ̃m.

⁵ Waati bɛɛbɛ, nŋu Ilaaɔ̃ ilu gbugbã fei í wɛɛ do amu, nɔ ama inɛmɔkɔm ŋa à waa kaakom bii fei.

⁶ Waati nŋu, ǹ wa n jɛ kuwɛɛm nii si amani, nɔ ikpo í ya maa kɔ̃i si bi ku ce ikpom.

⁷ Bii ǹ fita ǹ bɔ anu koofai ilu ǹ koo ǹ buba bi ku kiiti bantuma,

⁸ ama awaasũ ŋa à ya maa muum kpãai bii à yɛ ǹ wa n to wa, nɔ mɔkɔ ngbo ŋa a dede a leekĩ.

⁹ Amanlu ŋa à ya leekĩ ide iyi à waa fɔi titã, a bii gɛlɛ nŋa nɔ ilu ku coko.

¹⁰ Inɛ ngboi ilu ŋa à ya cokoi a baa a jɛ bɛi dekĩ.

¹¹ Inɛ ŋa iyi à waa gbɔ idem fei à ya maa saabum nii. Bii à waa cɔm, à ya bi idem nii,

¹² domi ǹ ya n sobi ilu are iyi wa tɔɔ faaba, nɔ ǹ ya n sobi kɔyɔ iyi inɛ kãma kù bi ku faaba.

¹³ Inɛ iyi wa ku fei í ya weem nii. Ǹ ya n jɔ̀ jaaɔ̃ ŋa a nɛ inɔ didɔ̃.

¹⁴ Dee dee ku jɛi í jɛ ibɔm, ntɔ ku jirimam nii í jɛ kumboom do bɔngɔtɔbɛɛm.

¹⁵ Amui ǹ jɛ bɛi ijui fɛɛju do bɛi isɛi wɛɛgɛ.

¹⁶ Amui ǹ na ǹ jɛ bɛi baai ilu are ŋa, nɔ amui ǹ ya n sobi inɛ njoo ŋa bi ku ce kiiti.

¹⁷ Amui ǹ ya n kɛkɛ gbugbãi inɛ laalɔ nɔ n faaba ilu are ŋa iyi wa taa gbugbã.

¹⁸ Nɔ ǹ ya n maa n nii wo an gboi n bɛi n ku hee inɔ ilem.

¹⁹ Ǹ yɛi bɛi jĩi iyi icuɛ í wa itĩi ido nɔ ikpãi idũ í ya tũ wuaɛ ŋa.

²⁰ Amboem á la ku maa kooi wo, nɔ gbugbãm á maa wɛɛi bɛi bioo iyi à katee.

²¹ Si waati nŋu, à ya maa desim itĩi, a coko a maa degbe n fɔ ide wa.

²² Bii ǹ fɔ ideu ǹ tã, inɛ kãma ci ya jã. Nɔ idem nɔu í ya dɔ̃a inɛ fei sii bɛi inyi iyi wa tontoo si ilɛ ngbɛ.

²³ Amui à ya maa degbe bɛi ijĩ. Amui à ya maa degbe bɛi ijĩi jɛadɔ̃.

²⁴ Bii ǹ wa n ce nŋa didɔ̃, à ya bitii. À ya bi inya kumái wajum nii na jiida ku jɛm.

²⁵ Ǹ ya n wa inɔ nŋai bɛi ilaalu si inɔi soogeɛ ŋa. Amui ǹ ya jɛ inɛ ngbo nŋa n maa n nyisi ŋa kpãa bɛi woo lɛlɛ ilu inɔ kufɔ ŋa.