Zɔɔbu 28 - Bibeli do fee

Asiii laakai

¹ Inya ŋa à wɛɛi hai bii à ya tu isɔ fũfũ wa, nɔ inya ŋa à wɛɛi hai bii à ya nya wura wa a na a yɔɔ.

² Amma isɔ, hai si sãai à ya nyaa wa nɔ isɔ danya, hai si kutai à ya yɔɔ a nyaa wa.

³ Woo ce icɛ ŋa à ya má fitilai a dasi isa ŋau. À ya tu kuta ŋaui a bɔò lɛlɛ hee andi bii aa yɔkɔ, tengi bii kuta ŋau à wa si ilu kuku nla nla.

⁴ À ya fitai hai inɔ ilu a koo a tu isa ŋa bii inɛ ŋa a kù wa, nɔ a dĩ ara nŋa do ikũ a maa zangala. Kutɛ nŋa ŋa ci ya tɛ ilɛ má.

⁵ Ilɛ wa ce amaajɛ waduude, amma lɛlɛ bɛ, í ya jɔ bɛi ina wa fɔtɔtɔi mii feii.

⁶ Si inɔ kuta ŋau bɛi inɛ ŋa à ya ba kuta boogu gɔ iyi à ya kpe safira. Nɔ si bɛi à ya ba wura mɔ má.

⁷ Yembeeku ŋa a kù mà kpãai anui isa ŋau. Yɛi ku jɛ iŋa ŋa a kù yɔɔ do iju.

⁸ Mɛɛmui sako ŋa a kù too do bɛ ajɔ kãma. Muusu nla kãma kù nɔ kù tooɛ.

⁹ Amma amanɛ í ce kookaai í lesi iri kuta ŋau awɔ. Í wuuma ŋa í bɔ hee ilɛ si icu nŋa.

¹⁰ Si kutaui í tu isa ŋa. Andi mii iyi í jɛ jiida fei í ya yɔɔi.

¹¹ Í ya jɔ̀ hee do acãi inyii ido ŋa a gbɛ nɔ ku jɔ̀ mii iyi wa manji ku fita gbugbãa.

¹² Amma iwoi à ya ba bisi. Iwoi í jɛ bi kuwai laakai.

¹³ Amanɛ ŋa a kù mà bɛi aa dasi itaɛ, domi a kaa baa si andunya ihɛ̃.

¹⁴ Inyi dũdũ í ya ni, kù wa bi tom ihɛ̃. Nɔ tenku mɔ í ya ni, kù wa ihɛ̃.

¹⁵ A kaa yɔkɔ a kpaasiɛ do wura, nɔ a kaa yɔkɔ a raa do isɔ fũfũ ku wo.

¹⁶ A kaa yɔkɔ a wãaò wurai Ɔfii, walakɔ kuta ŋa iyi à ya kpe onisi walakɔ safira.

¹⁷ Baa mii bɛi digi gɔ kù too do bɛɛrɛ hee má jɛ wura, nɔ amanɛ kaa yɔkɔ ku raa do wura alala caka akã,

¹⁸ aa fɔ idei kuta jiida gɔ ŋa iyi à ya kpe kɔrai do kirisitali ŋa má? Bisi í tia lɛgɛ.

¹⁹ Kuta jiidai Etiopi iyi à ya kpe topazi kù jɛ saaɛ. Nɔ a kaa jɛ a wãa do wura iyi í ce ncɛɛ í re fei.

²⁰ Amma hai iwoi bisi wa naa. Iwoi í jɛ bi kuwai laakai.

²¹ Wa manjia amanɛ ŋa, nɔ yɛi ku fo lele ŋa a kaa yɔɔ.

²² Iku do bi kuwai iku ŋa à ni, ntɔi à gbɔ à fɔ ideɛ.

²³ Ilaaɔ̃i í mà kpãaɛ. Nŋu akãi í mà bii í jɛ ideɛ,

²⁴ domi nŋu akãi wa yɛ hee kɔɔi ilɛ. Wa yɛ mii fei si andunya ihɛ̃.

²⁵ Waati iyi í jilɛ kuwoi fufu, nɔ í jilɛ bɛi kukpɔi inyi í nɛ ku to,

²⁶ waati iyi í jilɛ kɔɔi ijĩ do kpãai dagba lele,

²⁷ waati bɛɛbɛi í yɛ bisi nɔ í yɛ iyi í nɛ bɛɛrɛ. Í jɔ̀ icuɛ í nɛ gbugbã nɔ í yagaɛ í cɔ.

²⁸ Si anyiɛ, nɔ í sɔ̃ amanɛ ŋa í ni, amu Aɔ̃ Lafɛ̃ɛ ku jirimai í jɛ laakai, nɔ laalɔ ku saai í jɛ bisi.