Zɔɔbu 27 - Bibeli do fee

Zɔɔbu í ni má, ilu taale kaa jɛ ku tɔɔ sobi bi Ilaaɔ̃

¹ Ŋɔi Zɔɔbu í mɔsi ideɛ nɔ í ni,

² hee do irii Ilaaɔ̃ nŋu iyi í wɛɛ, nŋu iyi wa kɔ̀ ku nam ntɔ, nŋu iyi í jɛ ilu gbugbã fei, iyi í jɔ̀ ǹ wɛɛò inɔ kufɔ,

³ bii ǹ wa n mi, nɔ Ilaaɔ̃ í jɔ̀ ǹ wɛɛ si hunde,

⁴ gɛlɛm kaa sɔ ibo, nɔ amɛm kaa fɔ mii iyi kù jɛ ntɔ.

⁵ Ajɔ kãma n kaa n na ŋɛ ntɔ hee n koo n kuu. Ajɔ kãma n kaa n jɛsi iyi ǹ jɛ ilu taale.

⁶ Ǹ leekĩ si dim dim iyi kucem í sĩa, n kaa n nɔ n kpaasiɛ. Idɔm kù waa yɛ taalem baa ajɔ akã.

⁷ Ilaaɔ̃ ku cea mbɛɛm ŋa bɛi í ya cea inɛ laalɔ ŋa, nɔ ku cea inɛ ŋa iyi à waa yɛ taalem bɛi í ya cea woo kpa inɛ ŋa.

⁸ Kpãa ku cɔ yoomai í ya wɛɛa inɛ laalɔ bii Ilaaɔ̃ í nya hundeɛ, walakɔ bii í leekĩ kuwɛɛɛ.

⁹ Ilaaɔ̃ á gbɔ kutɔɔɛ bii wahala í naa siɛ?

¹⁰ Á nɛ inɔ didɔ̃ si Ilaaɔ̃ ilu gbugbã fei? Á maa tɔɔ Ilaaɔ̃ waati kãma fei?

¹¹ An na ŋɛ ikɔ si gãmɛi gbugbãi Ilaaɔ̃, n kaa n singa nŋɛ lasabui Ilaaɔ̃ ilu gbugbã fei.

¹² Iŋɛ fei ì mà bɛi í yɛ ŋa. To, na mii í jɔ̀ ì ya maa fɔ ide nfe ŋa.

Waju ku bɔ iyi ci ya kpɛ

¹³ Mii iyi Ilaaɔ̃ ilu gbugbã fei á jɔ̀ ku ba inɛ laalɔ do woo taa inɛ ŋa gbugbã ŋa wee.

¹⁴ Bii ama nŋa ŋa à waa kpɔ, igũi á kpa ŋa. Sɔnda kaa ya maa to ama nŋa ŋa iyi à gbeu.

¹⁵ Si antaiɛ, bɔ̃ɔi á ya kpa amu ŋa iyi à gbeu má, baa jaaɔ̃ nŋa ŋa a kaa ya kpata nŋa.

¹⁶ Bii í tɔtɔɔ fia bɛi sãa nɔ í tɔtɔɔ jĩnɛ tunka bɛi pɔkɔdɔ,

¹⁷ inɛ dee dee gɔi á na ku dasi jĩnɛ ŋau, inɛ gɔ iyi kù nɛ taalei á ba fiau ndɛɛ.

¹⁸ Kpasɛ̃ iyi í ma, í yɛi bɛi ilei dadaa. Í yɛi bɛi kusui woo degbe iko.

¹⁹ Í ya jɛ ilu amanii waati iyi í sĩ njoo, nɔ ci ya ku. Waati iyi í na í cĩ iju, ci ya yɛ nkãma má.

²⁰ Njo í ya zambaɛi bɛi inyi iyi í kɔ̃ bii fei. Fufu nla nla í ya naa ku sooi idũ.

²¹ Fufui nunui daakɔi í ya soo do gbugbã hai kpasɛ̃ɛ ku nɛò hee jĩijĩ.

²² Ilaaɔ̃ í ya kãsiɛ iju wai ci ya ce araareɛ. Nɔ nŋu bɛi í ya jɔ̀ ku maa sa ku ba ijuukpãu ku maà baa.

²³ Bii inɛ ŋa à yɛ mii iyi í baa, à ya fã fooi a dakpɛi a nyaanyi a maa yaakoɛ si inya bii í tako í wau.