Zɔɔbu 26 - Bibeli do fee

Zɔɔbu í ni, sobii inɔ kufɔi ì naam wa

¹ Ŋɔi Zɔɔbu í jɛ í ni,

² ì mà hai nɛ gbugbã ku sobi jiida. Ì ya nɔ i tã sɔɔlu i koo i sobi inɛ iyi í kua gbugbã.

³ Ì mà ide jiida ku kɔ inɛ iyi kù nɛ bisi. Ide nkpɔ nkpɔɛ wa nyisi iyi ì jɛ ilu laakai si mii fei.

⁴ Do sobii yooi ì waa fɔò ide. Hai bi yooi ì gbɔ ideu bɛ wa.

Gbugbã hai nɛ kɔɔi Ilaaɔ̃

⁵ Iku ŋa à ya maa yayai bi kuwa nŋa baa bii à wa hee lɛlɛi tenku.

⁶ Nkãma kù waa manjia Ilaaɔ̃ si bi kuwai iku ŋa. Mii fei í wai gbugbãa.

⁷ Ilaaɔ̃ í tɛ lele do ikpa awɔ njɛi kpãai inunu si inya ngbɛ. Nŋui í kɔa ilɛ si inya ngbɛ.

⁸ Nŋui í ya jɔ̀ inyi ku wa si kudũi ijĩ nɔ í ya ganji ku lɛgɛɛ baa bii aso wa tɔɔ.

⁹ Nŋui í ya fa kudũi ijĩ bɛi acɔ ku biiò bommaɛ.

¹⁰ Nŋui í ce bokoto í kaakoò tenku kú jɛ kɔɔi inya kumá do ilu kuku.

¹¹ Bii Ilaaɔ̃ í dedea lele wa, í ya maa yayai hee si sɔbeɛ ŋa nɔ ku biti.

¹² Gbugbãi Ilaaɔ̃ í kãmia tenku, nɔ do bisiɛi í ce nfei Rahabu.

¹³ Fufui amiɛi í kpãò lele. Nɔ awɔɛi í kpaò njo iyi wa sau.

¹⁴ Iyi bɛ ŋa fei mii keeke ŋa iyi í ce mbɛ. Nŋu ŋau bɛ fei, iba nyankuti nŋu akãi à waa gbɔ. Yooi á yɔkɔ ku mà zaka bɛi gbugbãi Ilaaɔ̃ í to.