Zɔɔbu 24 - Bibeli do fee

Zɔɔbu í ni, Ilaaɔ̃ í ya maa cɔ bɛi inɛ laalɔ wa cei titã

¹ Na mii í ce Ilaaɔ̃ ilu gbugbã fei kù cica ajɔ ŋa si bii á ya ce kiitiɛ nɔ inɛ dee deeɛ ŋa a ya yɛ bɛi wa kiiti.

² Inɛ ŋa à ya tekĩò kɔɔi buɛ nŋa ŋa, inɛ gɔ ŋa à ya ce ile angudã gaa ŋa a koo a maa degbe ndu ŋa,

³ inɛ gɔ ŋa mɔ à ya gba gbankɛlɛi kɔyɔ ŋa, nɔ à ya gba kɛtɛi abo jaaɔ̃ si gbese.

⁴ À ya tale hai nɛ gbugbã ŋa hai si kpãa. À ya jɔ̀ a koo a manjii do tilasi.

⁵ À yɛi bɛi sɛnga ŋa iyi a kù nɛ buɛ bii kãma í gbe gbaa. Bɛi à ya bɔ daadaakɔ fei ku ba a ba sɔnda a woò ama nŋa ŋa.

⁶ Aŋai à ya bɔ fɔfɔ ku kpa wa si inɔ sako ŋa. Nɔ aŋai à ya koo a kaa inɛ laalɔ ŋa isoi rezɛ̃ɛ nŋa wa.

⁷ Amma idũ, basĩi à ya sũ. A ci ya nɛ baa acɔi tũtũ.

⁸ Ijĩ í ya maa kpa ŋai si iri kuta ŋa si na iyi í jɔ̀ a kù nɛ bi kuwa. Nɔ si abɛ kuta ŋai à ya sa a koo a manji.

⁹ Inɛ laalɔ ŋa à ya gba ama kɔyɔ ŋai do gbugbã. À ya bee hai nɛ ngɔgɔ gbese ŋa.

¹⁰ À jɔ̀ ŋai a maa nɛ basĩ, a ci ya dasi nkãma. Aŋai à ya maa so bilee kambo do ari.

¹¹ À waa kpo ikpoi olivi si inɔ kpasɛ̃i ngu ŋa, walakɔ a maa cea ngu ŋa atɛ̃ vɛ̃ɛ nɔ aŋa taka nŋa a kaa jɛ a tiɛɛ.

¹² Inɛ ŋa iyi à maai iku à ya maa kakaai si inɔ ilu ŋa, nɔ inɛ ŋa iyi à ba kumɛɛ ŋa à ya maa tɔɔ sobii. Amma Ilaaɔ̃ wa cokoɛ si ideu.

¹³ Inɛ laalɔ ŋau a ci ya bi inya kumá. A ci ya too kpãa iyi wa má, a ci ya leekĩ si.

¹⁴ Woo kpa inɛ í ya dedei hai amɛɛjuumá koo kpa ilu are walakɔ hai nɛ kpãa gɔ, nɔ koo ce ile idũ.

¹⁵ Woo ce sakara í ya maa degbe idũi nɔ ku fɔ si inɔɛ ku ni, bii ǹ wa n lɔ inɛ kãma kaa yɛm. Í ya dɛdɛ acɔi ku biiò wajuɛ.

¹⁶ Idũi ile í ya koo lɛgɛ ile. Dasã mɔ nɔ ku sɔkɔ si araɛ. Ci ya mà inya kumá.

¹⁷ Bi woo ce ile ŋa fei, daakɔ í ya yɛ nŋai bɛi ikui wa naa ku so ŋa, amma idũ, a ci ya nɛ zigiidai iku.

¹⁸ Amma wee [iŋɛ ì waa ni ŋa], inyi í ya jɛ inɛ laalɔ ŋai anu akã, nɔ bi kuwa nŋa ku baa ku jɛ ilɛ iyi à ceekpe. A kaa bɔ ikoi jĩi ndii rezɛ̃ɛ nŋa má ajɔ kãma.

¹⁹ Bɛi ì mà ilɛ ngbɛ í ya mɔ inyi anu akã, bɛɛbɛ mɔi woo ce dulum ŋa à ya kanju a nɛ ikpa bi kuwai iku ŋa.

²⁰ Inɛ iyi í bí ŋa í ya gbɛjɛ ide nŋai. Aŋai à ya baa a jɛ ijɛ jiida iyi kokoo ŋa à ya bi ku re. A ci ya ce baa faajii inɛ dimi bɛɛbɛ ŋau. Laalɔ ku ce nŋau í ya kpa irii bɛi jĩi iyi í cuku.

²¹ Aŋai à wahala gbɛnda, nɔ aŋai a kù ce araarei jaaɔ̃.

²² Amma Ilaaɔ̃ í nɛ gbugbã ku lele woo taa inɛ ŋa gbugbã ŋa. Bii í dede nŋa anu akã, kãma nŋa ci ya mà mà hundei nŋu á gbe má.

²³ Nŋui í ya jɔ̀ a nɛ kpãa ku cɔ, amma í ya maa cɔ kuce nŋa.

²⁴ Í ya jɔ̀ a so ŋa lelei keeke, anu akã nɔ a ku, nɔ a sũ bɛi kokoi jĩi iyi wa gbɛ. Nɔ aa cukui bɛi amaajɛ ŋa iyi à da.

²⁵ Bii kù jɛ bɛɛbɛi í ya ce, inɛ gɔ kú jãm. Inɛ gɔ kú ni ideu kù wɛɛ.