Zɔɔbu 23 - Bibeli do fee

Zɔɔbu í ni, Ilaaɔ̃ í kɔ̀ awaò ka fɔ ide

¹ Ŋɔi Zɔɔbu í jɛ í ni,

² nsɛi má ǹ wa n weewea ntɔ ntɔ. Nɔ n kaa n yɔkɔ n coko baa bii ǹ dasi kookaai.

³ Bii í jɛ ǹ mà bii Ilaaɔ̃ í wa wo, an bɔi hee bi kuwaɛu.

⁴ An koo n sɔ̃ɔ idem ŋa fei, n kɔ̀ò aram bi tɛɛ.

⁵ An gbɔ bɛi á ni, nɔ n gbɔ bɛi á jɛɛm.

⁶ Mà á yɛ taalem nii do gbugbãɛ. Aawo. Á de itĩi ku gbɔ idem do laakai.

⁷ Awaò aa ka yɔkɔ ka fɔ ide amu iyi kucem í tɛ, nɔ n fita hai si awɔi woo kiitim nɔu hee do ajɔ fei.

⁸ Amma baa bii ǹ bɔ ikpa nunui daakɔ, n kaa n yɔɔ. Bii ikpa nunui alɛ mɔi ǹ bɔ, n kaa n hɔ̃nnɛɛ.

⁹ Í bɔ wũa gɔ ikpa awɔ njɛi kpãai inunui? N kaa n yɔɔ. Í koo wa manji ikpa awɔ cangai kpãai inunui? N kaa n yɔɔ pai.

¹⁰ Nŋu de í mà kpãa iyi ǹ wa n too sãa sãa. Nŋui wa cɔ laakaim, amma an fita si hai nɛ riisi bɛi wura iyi à yɔ do ina.

¹¹ Nŋui ǹ too mam mam si isɛɛnɛm fei. Ǹ too kpãaɛ n kù yaa bii kãma.

¹² N kù fũsi woodaɛ ŋa iyi í sɔ̃m awɔ. Ǹ jɔ̀ idɔɔbim nii ǹ ceò ideɛ icɛ.

¹³ Amma nŋui í jilɔɔ si bɛɛbɛ, yooi á kɔ̀ɔa. Mii iyi í bii í ya ce.

¹⁴ Debɛi mii iyi í bi ku bam nii í ce. Nɔ á nyi ku ce mmuɛ ŋa má.

¹⁵ Na ŋɔi í ce zigim í daò Ilaaɔ̃. Bii ǹ wa n lasabu, njo í ya maa mum siɛi.

¹⁶ Ilaaɔ̃i í leekĩ wɔɔkɔm. Nŋu ilu gbugbã feii wa dede idɔm.

¹⁷ Do nŋu fei idũ, n kù coko baa do iyi ilu kuku í biim.