Zɔɔbu 22 - Bibeli do fee

Elifazi wa yɛ taalei Zɔɔbu

¹ Ŋɔi Elifazi inɛi Temaau í so ide í ni,

² si mii amanɛ á yɔkɔ ku sobi Ilaaɔ̃. Kù wɛɛ. Ilu laakai araɛi í ya bukaataa.

³ Bii i kù nɛ taale kãmai, aranfãani yoomai Ilaaɔ̃ ilu gbugbã fei í nɛ si. Bii kuceɛ kù nɛ taale kãma mɔi, mii á ba si.

⁴ Mà ì waa tamaa wa kpãɛ iju nɔ wa kiitiɛ si na iyi í jɔ̀ ì waa jirimaɛi?

⁵ Laalɔ ku ceɛu kù caai? Mà kuraraɛ ŋa í nɛ jiai?

⁶ Yaase gɔ wee. Ì ya tilasi nyaanzeɛ gɔ wo i gba siɛ tɔɔma. Ì ya bataɛ i gba kumboo akã iyi í nɛ.

⁷ Ì ya kɔ̀ inɛ gɔ iyi agbɛ wa kpa inyi ku mɔ, walakɔ inɛ gɔ iyi ari wa kpa sɔnda ku jɛ.

⁸ Amma ilu gbugbã ŋai ì jɔ à gba ilɛu nɔ aŋai à waa buba si.

⁹ Ì ya jɔ̀ jaaɔ̃ ŋa iyi à naa sobi ku tɔɔɛ a nɛ awɔ ngbɛ nɔ ì ya taa kɔyɔ ŋa gbugbãi.

¹⁰ Na ŋɔi í ce à kaakoɛò cɛkũm nɔ zigiɛ í da anu akã.

¹¹ Ilu kuku í biiɛ nɔ i kù waa yɛ nkãma má, nɔ wee inyi í biiɛ í jɛɛ.

¹² À mà iyi Ilaaɔ̃ í wa hee lele. Cɔ hee bii leleaɔ̃ iyi í jĩ í re í wa.

¹³ Nɔ ì ya maa bee i maa ni, mii í mà. Ilaaɔ̃ nŋu iyi í wa si kudũi ijĩ, bɛirei á ce ku yɔkɔ ku kiiti kuce nwa ŋa.

¹⁴ Kudũi ijĩ iyi wa biiɛ í la í nɛ sisima í caa, na nŋu, kaa yɔkɔ ku yɛ nkãma bii wa kaako lele.

¹⁵ Zɔɔbu, kpãa nwo iyi inɛ laalɔ ŋa à toou bɛi aa kɔ̀ i maa mu hee nsɛi?

¹⁶ Aŋai à lɔ anu akã hai waati nŋa kù to bɛi ile iyi inyi í jɛ.

¹⁷ À ya maa ni wo, Ilaaɔ̃ ku jɔ̀ wa. Mii Ilaaɔ̃ ilu gbugbã fei á yɔkɔ ku ce nwa.

¹⁸ Nɔ wee Ilaaɔ̃i í jɔ̀ amani wa kɔ̃ inɔ kpasɛ̃ nŋa. Ntɔ ntɔ, lasabui inɛ laalɔ ŋau ku jĩim.

¹⁹ Inɛ dee dee ŋa iyi aa ba a yɛ kucuku nŋa aa nɛ inɔ didɔ̃. Hai nɛ taale ŋa aa ya yaako ŋa a maa ni,

²⁰ à kpa irii mbɛɛ nwa ŋau. Ina í jo andi mii iyi à jɔ̀ fei.

²¹ Debɛi jɔ̀ i teese dulum dɛɛ do Ilaaɔ̃. Aa ba laakai ku sũ nɔ aa yɛ ididɔ̃ á wa siɛ.

²² Jɔ̀ i ya gbɔ ikɔi nŋu takaɛ, nɔ i ya mu ideɛ ŋa si idɔɛ.

²³ Bii ì sinda wa bi Ilaaɔ̃, bii ì nya laalɔ hai si kpasɛ̃ɛ, á jɔ̀ i baa si agbɛɛ.

²⁴ Koo nyɔ wuraɛu bɛ ilɛ, koo nyɔ wurai Ɔfiiu si inɔ acãi inyii kuta ŋa,

²⁵ nɔ i jɔ̀ Ilaaɔ̃ ilu gbugbã fei ku jɛ wuraɛ do isɔ fũfũɛ.

²⁶ Si bɛɛbɛ aa yɛ i gbɔ ididɔ̃ bi nŋu Ilaaɔ̃ ilu gbugbã fei, nɔ i wu iju i cɔɔ do naanɛ.

²⁷ Aa ya tɔɔɛ, nɔ á ya jɛɛ. Nɔ i ya kɔ̃ kuwã ŋa iyi ì cea Ilaaɔ̃.

²⁸ Mii ŋa iyi ì jilɛ si i ce fei, ku ce. Nɔ inya kumá ku ya maa wa si kpãaɛ.

²⁹ Bii à dasi inɛ gɔ ŋa anyɔ, aa ni na faau nŋai, amma Ilaaɔ̃ í ya faaba inɛ iyi í kaye araɛi.

³⁰ Nŋui í ya faaba hai nɛ taale ŋa hai si laalɔ, nɔ á faabaɛ bii i kù ce taale kãma.