Zɔɔbu 21 - Bibeli do fee

Zɔɔbu í ni, inɛ laalɔ ŋa à ya bɔ waju

¹ Ŋɔi Zɔɔbu í jɛa Sofaa í ni,

² i sotĩ i gbɔ ide iyi an sɔ̃ ŋɛ ŋa. I jɔ̀ n fɔ ideu ku ba aram ku tũ.

³ I temua keeke ŋa, nɔ bii ǹ fɔ ide ǹ tã, aa yɔkɔ i yaakom má ŋa.

⁴ Bitandim si amanɛ ŋai í wa? Aawo, na ŋɔi í jɔ̀ n kaa n yɔkɔ n temua.

⁵ I lasabuò mii iyi í bam nɔu ŋa, aa biti ŋa hee i kaa mà bɛi aa ni ŋa.

⁶ Baa amu takam bii ǹ lasabu si, zigim í ya dai hee ku jɔ̀ n maa n yaya.

⁷ Na mii í jɔ̀ inɛ laalɔ ŋa à kɔ̀ à wɛɛ si hunde. Na mii í ce à ya gbo nɔ a kɔ̀ a maa gbeò gbugbã.

⁸ À ya yɛ ama nŋa ŋa à wa cingaa nŋa nɔ tɔku nŋa ŋa a maa bɔ waju.

⁹ Inɔ kpasɛ̃ nŋa, mii fei í ya maa nɛi dee dee, zigi nŋa ci ya daò nkãma nɔ goloi Ilaaɔ̃ ci ya ba ŋa.

¹⁰ Kɛtɛ kombo nŋa ŋa à ya maa gũi waati kãma fei, nɔ kɛtɛ zãu nŋa ŋa à ya maa bí waati kãma fei, inɔ nŋa ci ya nya.

¹¹ À ya jɔ̀ ama nŋa ŋa a maa sɛi bii fei bɛi angudã gaa ŋa, nɔ a jɔ̀ ama nŋa ŋa a fo a dingaa a maa cɛi.

¹² À ya kɔ̃ iri do gãgã ŋa do mɔɔlɔ ŋa a wɛɛò inɔ didɔ̃ a maa fãò yee.

¹³ Waati iyi à jɛ kuwɛɛ nŋa si inɔ didɔ̃ à tã, nɔ gbakã a ku a si ŋa inɔ balɛ.

¹⁴ Aŋai à ya nɔ a maa sɔ̃ Ilaaɔ̃ bɛ wo a maa ni, fa araɛ hai bi tu wa i jɔ̀ wa sɛ̃ɛ. A kù bi ka jɛ kuwɛɛ nwa si bɛi ì biu bɛ.

¹⁵ Mii Ilaaɔ̃ ilu gbugbã feiu í jɛ hee ka maa jɛ madĩɛ ŋa. Bii à waa tɔɔɛ, mii aa ka ba si.

¹⁶ Do nŋu fei, didɔ̃i inɛ ŋau bɛ si awɔi aŋa taka nŋai í wa. Ntɔ ntɔ, lasabui inɛ laalɔ ŋau ku jĩim.

¹⁷ Amma ì yɛ bii fitilai kuwɛɛ nŋa í ya kpɔò ku ku waati kãma fei ŋa? Ì yɛ bii laalɔ gɔ í naa si ŋa anu akã ŋa? Mà ì nɔ ì gbɔ bii idɔi Ilaaɔ̃ í kɔ̃ si ŋa ŋai.

¹⁸ Bii í yɔkɔ a yɛ bɛi wua kokoi iyi fufu í so wa dabiiò walakɔ bɛi fɔfɔ iyi fufu dabii í so.

¹⁹ À ya ni si ama nŋa ŋai Ilaaɔ̃ í ya na ku sãa si. Amma á sĩa wo ku ya kpã aŋa taka nŋa iju gbakã.

²⁰ Inɛ laalɔ ŋa à nɛ a ya yɛ kucukui aŋa taka nŋai wo gbakã, nɔ a ya ba ijuukpãi Ilaaɔ̃ ilu gbugbã feiu.

²¹ Baa nŋa ci ya wa si mii iyi á na ku ba ama nŋa ŋa waati iyi ajɔ nŋa í kɔ̃ nɔ à ku.

²² Ilaaɔ̃ nŋu iyi wa kiiti amaleka ŋa, aa ni a kɔɔ si mii ŋau bɛ mái?

²³ Inɛ gɔ ŋa à ya kui si inɔ didɔ̃ nla nla. A ci ya nɛ inɔ kufɔ kãma si kuwɛɛ nŋa, í gbe laakai ku sũ.

²⁴ À ya kpa kaato bɛi inɛ ŋa iyi à jɛ à yo ikpo nɔ a maa nɛ baani mam mam.

²⁵ Amma inɛ gɔ ŋa mɔ inɔ kufɔi í wa si kuwɛɛ nŋa fei. A kù tiɛ inɔ didɔ̃ si kuwɛɛ nŋa baa ajɔ akã.

²⁶ Nɔ aŋa minjiu bɛ fei à ya kui a si ŋa, nɔ a jɛ sɔndai kokoo ŋa.

²⁷ Ǹ mà lasabu iyi ì waa ce sim ŋa do inɔ sãmi iyi ì waa mum do ŋa.

²⁸ Ì waa bee ara nŋɛ ide ì waa ni ŋa, bɛirei kpasɛ̃i ilu inɔ kukã ŋau á na ku yɛ nsɛi. I kaa yɛ baa akpa gɔ bɛ má.

²⁹ Mà i kù bee woo lɔ ku bɔ ilu ŋa ajɔ kãma ŋai. Mà ide iyi à waa sɔ̃ ŋɛui i kù bi ku jɛ si ŋa.

³⁰ À ni, bii laalɔ gɔ í naa, inɛ laalɔ í ya fita sii. Idɔɔkɔ̃i Ilaaɔ̃ í ya jɔ̀ɔɛi baani.

³¹ Waati bɛɛbɛ yooi á jɛ koo sɔ̃ɔ taale iyi í ce. Yooi á sãa laalɔ iyi í ce.

³² Bii í ku nɔ à waa bɔ ku suu, inɛ gɔi í ya maa degbe balɛɛ.

³³ Nɔ inɛ feii í ya too fitiɛ bɛi inɛ nkpɔ nkpɔ iyi í cuaa. Nɔ ku ba bi ku sũ jiida si ilɛ bɛ.

³⁴ To, na mii í ce ì naa ku lɛlɛm do ide ngbɛ ngbɛ ŋa. Mii iyi í gbe nŋɛ bɛbɛi fei iboi.