Zɔɔbu 20 - Bibeli do fee

Sofaa í ni, laalɔ í ya ba inɛ laalɔ

¹ Ŋɔi Sofaa inɛi Naamau í so ide í sɔ̃ Zɔɔbu í ni,

² to, ǹ lasabu nɔ nŋui wa talesim n jɛɛ, n kaa n yɔkɔ n temua.

³ Ǹ wa n gbɔ ikɔ ŋa iyi wa jɛɛm bɛi arabu. Nɔ lasabu jiidam nii wa talesim n jɛɛ.

⁴ Í jɔɔm bɛi ì gbɛjɛ ide gɔ. Hai ku kpɛ wa, hai waati iyi à taka amanɛ si ilɛ,

⁵ inɔ didɔ̃i igũ ku jɛi woo ce laalɔ ŋa ci ya sɔ. Nɔ bɛɛbɛi inɔ didɔ̃i inɛ iyi kù mà bɛɛrɛi Ilaaɔ̃ ci ya kpɛ.

⁶ Bii í yɔkɔ ku gbokaɛ ku to lelei Aɔ̃, hee bɛi á yɔkɔ ku maa lu kudũi ijĩ do iriɛ,

⁷ á na ku kpa irii bɛi imii nŋu takaɛ. Nɔ inɛ ŋa iyi à màa ŋa wo aa maa ni, iwoi í wa.

⁸ Í tã mbɛ bɛi ala, nɔ a kaa yɔɔ má. Á lɔi bɛi kuyɛ iyi inɛ í ce idũ.

⁹ Iju iyi í tako wa cɔɔu, kaa yɔɔ má. A kaa hɔ̃nnɛɛ bii í tako í wau má.

¹⁰ Amaɛ ŋai a nɛ a sãa ilu are ŋa. Tilasi, nŋui á so amaniɛ ku na amaɛ ŋa a koo a sãaò inɛ ŋa iyi í dasi areu.

¹¹ Araɛ fei wa gbeò gbugbãi awaasũ. Amma fei ndɛɛ á lɔ inɔ isai do nŋu takaɛ.

¹² Laalɔ í dɔ̃i bɛi nyikɔ̃ si gɛlɛɛ, nɔ í ya so ku singaɛi si lɛlɛi amɛɛ.

¹³ Bɛi í ya maa muu hee waati sisɔ, í ya jɔɔ ku maa kpɛ sii.

¹⁴ Amma mii iyi í jɛu í ya bíaa bitandii, nɔ si inɔɛ í ya kpɔò acĩi njo wukukui.

¹⁵ Tilasi, á tu amanii ngu ŋa iyi í gba í jɛui. Ilaaɔ̃i á jɔ̀ ku tu mii iyi í jɛu wa.

¹⁶ Mii iyi í tako wa cɔ̃ɔcɔ̃ɔu bɛ wo, í yɛi bɛi acĩi njo wukukui, nɔ á kpaai bɛi acĩi wɔkɔkɔ.

¹⁷ Ku maà maa cɔ kpãai ku yɛ nyikɔ̃ do amɔ iyi wa cã bɛi inyii ido nla.

¹⁸ Aa jɔ̀ ku na amaniɛ feii kaa ba ku ceò nkãma hee má jɛ ku jɔɔ ku gbɔ didɔ̃ɛ.

¹⁹ Bɛɛbɛi aa cea si na iyi í jɔ̀ í wahala ilu are ŋa í fũsi ŋa awɔ. Í gba kpasɛ̃ nŋa nɔ kù ma nŋa mmuɛ.

²⁰ Inɔɛ ci ya kɔ̃ na binɛɛ. Na ŋɔi í jɔ̀ kaa yɔkɔ ku jɔ̀ɔa araɛ mii jiida kãma.

²¹ Í ya maa kpã inɛ baa yooma fei ijui wo. Na ŋɔi í jɔ̀ inɔ didɔ̃ɛ kaa kpɛ.

²² Sukui ayoi inɔ kufɔ á naa siɛ. Á ba goloi laalɔ ikã ikã dimi baa yooma fei.

²³ Idɔɔkɔ̃i Ilaaɔ̃ iyi á naa siɛi, á jɛ sɔndaɛ iyi á jɛ ku yo.

²⁴ Bii jĩnɛi igũ ŋa iyi à ce do isɔ í paatiɛ, afai isɔ nkpai á muu ku luu.

²⁵ Bii í mu afa iyi à taa í koo í mu idɔɛu í tuu hai si araɛ, njoi ikui á muu.

²⁶ Ilu kùkù nla nlai wa degbeɛ. Ina iyi inɛ gɔ ci ya sɔ̃asii á jo amaniɛ ŋa do mii ŋa iyi à gbe si inɔ kpasɛ̃ɛ fei.

²⁷ Lelei Aɔ̃ á fitaò kurara iyi í ce gbugbãa, nɔ ilɛ á yɛ taaleɛ.

²⁸ Aa gbangaa andi mii iyi í nɛ fei a nɛò si ajɔi idɔɔkɔ̃i Ilaaɔ̃.

²⁹ Ikpɛ̃ iyi Ilaaɔ̃ wa jilɛa inɛ ŋa iyi à waa ce laalɔ mbɛ iyi á na ku jɛ tu ŋa.