Zɔɔbu 2 - Bibeli do fee

Wahala minjisiai Zɔɔbu

¹ Ŋɔi amalekai Ilaaɔ̃ ŋa à naa bi Aɔ̃ Lafɛ̃ɛ má ajɔ nŋu gɔ, nɔ Seetam mɔ í wa inɔ nŋa wa.

² Ŋɔi Aɔ̃ Lafɛ̃ɛ í bee Seetam í ni, hai iwoi ì waa naa. Nɔ Seetam í jɛaa í ni, ǹ koo ǹ dabii si andunya ǹ kaakoɛ wai.

³ Nɔ Aɔ̃ Lafɛ̃ɛ í beeɛ má í ni, i kù yɛ Zɔɔbu woo ce icɛm bɛ? Inɛ kãma kù wɛɛ si andunya iyi í yɛ bɛi nŋu. Mɔkɔu kù nɛ taale kãma, í jɛ inɛ dee dee, í ya jirimam, nɔ í ya saa laalɔ. Wa leekĩ dim dim si dee dee kú jɛɛ nɔ wee awɔ ì talesim n kpãa iju hai kù ce taale kãma.

⁴ Ŋɔi Seetam í jɛa Aɔ̃ Lafɛ̃ɛ í ni, bɛɛbɛi. Mii iyi amanɛ í nɛ fei á jɛsi ku ce asɔɔ ku yaò hundeɛ.

⁵ Amma bii ì lesi kũkũɛ ŋa do araɛ awɔ, kù nɛ sika kãma, á ceekpeɛ.

⁶ Nɔ Aɔ̃ Lafɛ̃ɛ í sɔ̃ Seetam í ni, nŋu wee si awɔɛ. Koo i ceaa bɛi ì bi, amma maà na i lu hundeɛ.

⁷ Ŋɔi Seetam í sɛkɛɛ hai bi Aɔ̃ Lafɛ̃ɛ, nɔ í dasi Zɔɔbu bɔ̃ɔi ngoli gɔ si araɛ hai isɛɛ ŋa hee ku bɔ si wasa antaii iriɛ.

⁸ Ŋɔi Zɔɔbu í dɛdɛ kpakpaadɛ̃ í ya maa kɔkɔɔò, nɔ í koo wa buba si ilúlu.

⁹ Ŋɔi aboɛ í naa í sɔ̃ɔ í ni, nɔ hee nsɛi ì kɔ̀ ì waa leekĩ dim dim si dee dee kú jɛɛ? Í sĩa i ceekpe Ilaaɔ̃ gbakã nɔ i kuɛ.

¹⁰ Ŋɔi Zɔɔbu í jɛaa í ni, ì waa fɔ ide mbɛ bɛi inaabo hai nɛ yaase. Bii Ilaaɔ̃ wa ce amuai mii jiida, à ya ka gba, na mii í jɔ̀ bii wa ce nwa laalɔɛ aa ka kɔ̀si. Nɔ si nŋu ŋau bɛ fei Zɔɔbu kù ce dulum si ide ku fɔɛ.

Kpaasi mɛɛtai Zɔɔbu ŋa à naa bi tɛɛ

¹¹ Ŋɔi kpaasi mɛɛtai Zɔɔbu ŋa à gbɔ mii iyi í baa fei. Nɔ à gbɔsi njɛ à dede wa hai ilɛ nŋa ŋa à bɔ ku coo fɔɔ nɔ a lɛlɛɛ. Iri nŋa wee. Elifazi inɛi Temaa do Bida inɛi Sua do Sofaa inɛi Naama.

¹² Waati iyi à hɔ̃nnɛɛ hai jĩijĩ a kù màa, nɔ à lɔsi ku kpata. À ga ibɔ nŋa ŋa nɔ à bu sãa à wasi ku kosi iri nŋa ŋa à waa nyisiò inɔ kufɔ nŋa.

¹³ Ŋɔi à koo à buba kɔkɔɛ si ilɛ dasã mɛɛje do idũ mɛɛje, inɛ kãma nŋa ci ya sɔ̃ɔ ide kãma, domi à yɛ iyi ara kurou í la.