Zɔɔbu 19 - Bibeli do fee

Zɔɔbu í ni, iri ku kpaɛ inɛ iyi á gbam á fɔ ide

¹ Ŋɔi Zɔɔbu í jɛ í ni,

² hee waati yoomai aa jɔ̀ n maa n wa si inɔ kufɔ, nɔ i maa mɛɛm do ide nŋɛ ŋa.

³ Isɛ gbɛɛwai ihɛ̃ bɛbɛi iyi ì wasi ku bum ŋa. Anyɔ kù waa mu ŋɛ iyi ì wasi ku wahalam bɛi ihɛ̃ ŋa?

⁴ Nɔ baa bii í jɛ ǹ ce dulum mɔm nii wo, amu akãi í kã.

⁵ Ntɔ ntɔ, ì waa kayem ŋai ku ba ì dede ŋa. Nɔ ì waa yɛ taalem ŋa na anyɔ nla nla iyi ǹ wa si.

⁶ Amma i jɔ̀ i mà ŋa iyi Ilaaɔ̃i í dasim wahalau ihɛ̃, nɔ nŋui í mum do taaoɛ.

⁷ Baa bii ǹ wa n dɔ̃ anu do wahala iyi ǹ wa si, inɛ kãma ci ya jɛɛm. Nɔ baa bii ǹ tɔɔ faaba bi ku ce kiiti, inɛ kãma ci ya nam ntɔ.

⁸ Ilaaɔ̃i í daam kpãa í ganjim n lɔ. Í jɔ̀m si ilu kuku ǹ wa n bibii si kpãa.

⁹ Í naa í nya jirimam nɔ í kpa irii bɛɛrɛm do gbugbãm fei.

¹⁰ Í lɛgɛm nii bii fei nɔ ǹ cuku. Í leekĩ kpãa ku cɔm bɛi ama jĩi iyi à tu icãɛ.

¹¹ Idɔɛ í kɔ̃ sim nɔ wa ceem bɛi inɛ akãi mbɛɛɛ ŋa.

¹² Soogeɛ ŋa à tɔtɔɔ wa aŋa nkpɔ nkpɔ, à nya kpãa wa í naa hee bi tom, nɔ à ce asɔ à waa kaakoò kpasɛ̃m.

¹³ Ilaaɔ̃ í jɔ̀ nyaanzem ŋa à kɔ̀sim, nɔ inɛ ŋa iyi à màm à fangaa à jɔ̀m.

¹⁴ Inɛi kpasɛ̃m ŋa do kpaasi jiidam ŋa à fũsim awɔ, nɔ à gbɛjɛ idem.

¹⁵ Isɛ mmu ŋa iyi à wa bi tom do inaabo woo ce icɛm ŋa à waa cɔm nii bɛi inɛ njoo, do bɛi inɛ gɔ iyi a kù mà wo.

¹⁶ Baa bii ǹ kpe woo ce icɛm gɔ ǹ manteɛ, ci ya jɛɛm.

¹⁷ Abom kù bi baa inunui amim má, nɔ amam ŋa a kù bi inunum.

¹⁸ Nɔ baa ama keeke ŋa à dondam í jɔ̀ hai ǹ so ide gbakã, à ya maa yaakom nii.

¹⁹ Ǹ baa n jɛ mii laalɔ bi kpaasi jiidam ŋa. Nɔ inɛ ŋa iyi ǹ bi à baa à sinda sim wa.

²⁰ Kũkũ nŋu akãi batam wa bii bɛbɛi. Amu takam ǹ fita si, amma mii iyi ǹ nɛ fei í ce asɔɔ.

²¹ I ce araarem ŋa, kpaasim ŋa, i ce araarem ŋa, domi Ilaaɔ̃i wa wahalam.

²² Na mii í ce iŋɛ mɔ ì waa bi ku wahalam ŋa. Ì waa kpãm iju ŋa, nɔ kù to ŋɛ hee nsɛi?

²³ Ǹ bi inɛ gɔ ku kɔ idem ŋau ihɛ̃, ntɔ ntɔ ǹ bi lafɛ̃ɛ ku kɔ ŋa mɔm nii si tia gɔ.

²⁴ Ku kɔ ŋa do isɔ iyi í gbe anu si kuta, ku ce ŋa dũdũ do lolo, nɔ a maa wa si kutau bɛ hee do ajɔ fei.

²⁵ Amma amu ǹ mà inɛ iyi á kɔ̀ɔm í wɛɛ. Nŋui á na ku dede ku leekĩ si ilɛ ku fɔ ntɔ.

²⁶ Baa bii batai aram í ce nfe, an dede do aram n cɔ Ilaaɔ̃.

²⁷ An yɔɔ do ijum má. Amu takam nii an yɔɔ, kaa jɛ inɛ mmu gɔ. Nɔ idɔm í gbɛɛjiò ku degbe waatiu bɛ.

²⁸ Iŋɛ iyi ì waa ni, ka tooɛ ka cɔ. Icui wahalau fei, wa naai hai bi Zɔɔbu takaɛ.

²⁹ I ce njoi iku ŋa, domi kuce nŋɛu í to iku, nɔ aa mà ŋa iyi kiiti ntɔ í wɛɛ.