Zɔɔbu 18 - Bibeli do fee

Bida í ni, cɛkũm í wɛɛ na inɛ laalɔ

¹ Ŋɔi Bida inɛi Suau í so ide í ni,

² hee waati yoomai aa leekĩ do ide nkpɔ nŋɛu. I lasabu titã ŋa ka bɛi ka mà ide iyi aa ka fɔ.

³ Aa jɔ̀ Zɔɔbu ku maa cɔ wa bɛi mɛɛmu ŋai? Ì waa tamaa awa mɔ nnyɛi ŋai ŋa?

⁴ Awɔ mɔ ni Zɔɔbu, idɔɔkɔ̃ɛi wa wahala awɔ takaɛ. Ì waa tamaa na iriɛ ilɛ á gbe ngbɛi? Mà ì nɔ ì bi kuta ŋa a tɛkɛɛ hai si agbɛ nŋa ŋai.

⁵ Inya kumái ilu inɔ kukãi á ku. Inai kuwɛɛɛ, kaa maa jo má.

⁶ Inya kumá kaa wa ideɛ má. Nɔ fitilai kuwɛɛɛ á ku.

⁷ Isɛɛnɛ iyi wa ce do naanɛɛu á baa ku jɛ do sika, nɔ mii ŋa iyi wa lele ku ce ŋai aa dasiɛ banlala.

⁸ Kutɛɛi á bɔòɛ bii à le taao, nɔ koo jɔ̀ taao ku muu.

⁹ Cɛkũm á muu hee si cicĩisɛ. Afacii á dũu dim dim.

¹⁰ Ikũ iyi á dũu í wa si ilɛ, nɔ afacii iyi á kpaau wa degbeɛ si kpãa.

¹¹ Zigiidai wa kaakoɛ bii fei, njo í ya maa tooɛi bɛi wa wu isɛ fei.

¹² Ari í jɔ̀ kù nɛ gbugbã kãma má. Wahala í buba kɔkɔɛ.

¹³ Nŋui á maa ŋɔ batai araɛ nɔ bɔ̃ɔ ku kpa inɛ gɔi á ce nfei araɛu fei.

¹⁴ Aa naa a so ilu inɔ kukãu hai inɔ kpasɛ̃ɛ iyi wa kaaba, a bɔòɛ bi kuwai ilaalui iku ŋa.

¹⁵ Kpasɛ̃ɛ á gbe ngbɛ, nɔ inɛ mmu gɔ á yɔkɔ ku wa si ndɛɛ. Aa yɔkɔ a dikã fainwita si bi kuwaɛu.

¹⁶ Jĩi ikui á jɛ hai icuɛ hee ku bɔ si wuaɛ, icãɛ ŋa aa gbɛ nɔ wuaɛ ŋa a cuku.

¹⁷ Aa gbɛjɛ ideɛ si ilɛ, a kaa ye gigii baa iriɛ si kpãa.

¹⁸ Hai si inya kumái aa leleɛ ku bɔ si ilu kuku, si ilɛ bii amanɛ ŋa a kù wa.

¹⁹ Ama kãma kaa bíaa tɔku, ama baa akã kaa gbe si inɔ kpasɛ̃ɛ.

²⁰ Inɛ fei á gbɔ mii iyi í baa hai nunui daakɔ hee ku bɔ nunui alɛ, nɔ biti á mu inɛ feii.

²¹ Bɛi bi kuwai inɛ laalɔ do inɛ iyi kù mà Ilaaɔ̃ á koo yɛ mbɛ.