Zɔɔbu 17 - Bibeli do fee

Zɔɔbu í ni, n kù nɛ kpãa ku cɔ má

¹ Do gbugbãi ǹ wa n miiu, ajɔm í kaye wa koo nɔ balɛ wa degbem.

² Woo yaako inɛ ŋai à kaakom. Nɔ arabu nŋa í jɔ̀ n kù wa n sĩ njoo.

³ Ilaaɔ̃, awɔ takaɛ naa i yám, domi bii kù jɛ awɔ, yooi á jɛsi nŋu ku gbaam má.

⁴ Awɔi ì kɔ̀ kpaasim ŋau bisi. Maà jɔ̀ a nɔm.

⁵ À yɛ bɛi inɛ gɔ iyi mɔndau ihɛ̃ wa fãa, iyi í ni, í kpe kpaasi ŋa a naa a jɛ, nɔ í jɔ̀ amaɛ ŋa à waa degbe ikpɛ̃ nŋa si ngbɛ.

⁶ Amui Ilaaɔ̃ í jɔ̀ ǹ jɛ inɛ iyi inɛ ŋa à ya maa yaako. Amui ǹ jɛ inɛ iyi à ya maa tusi wajuɛ antɔ.

⁷ Inɔ kufɔ í jɔ̀ ilu kuku í bii ijum kù waa daana má. Aram fei í kaye.

⁸ Inɛ dee dee ŋa à ya bitii bii à waa cɔ wahala iyi í bam. Ideu wa dɔ̃ hai nɛ taale ŋa, bɛbɛi à waa cɔm nii bɛi hai nɛ naanɛ.

⁹ Inɛ dee dee í ya yɔkɔ temuai. Inɛ iyi awɔɛ wa maaju í ya kɔ̃ɔsi gbugbãi.

¹⁰ Amma iŋɛ kpaasim ŋa fei i nɛ wa ŋa, i nyi wa bɛbɛi ŋa, si inɔ nŋɛ, n kaa n ba ilu laakai baa akã.

¹¹ Kuwɛɛm í tã mbɛ. Mii ŋa iyi ǹ wa n lele do iyi ǹ bi fei à ce nfe.

¹² Bii ǹ wa n gbɔ ide nŋɛ wo idũ á kpaò dasã, amɛɛjuumái í maai wa, nɔ wee amɛɛbiii wa tɔtɔɔ.

¹³ To, mii ǹ wa n degbe má bii kù jɛ n koo n ce bi kuwam si inɔi iku ŋa, nɔ n tɛ daayim si ilu kuku.

¹⁴ Ǹ sɔ̃ balɛm ǹ wa n ni, awɔi ì jɛ baam. Nɔ ǹ sɔ̃ konkombiu mɔ ǹ ni, awɔi ì jɛ iyem do wecĩm.

¹⁵ Debɛi hee iwoi kpãa ku cɔm í wa. Yooi wa hɔ̃nnɛɛ wa má.

¹⁶ Nŋui wa bɔ bi kuwai iku ŋa. Awaò fei aa ka cukui si sãa.