Zɔɔbu 16 - Bibeli do fee

Zɔɔbu í ni, ǹ nɛ sɛɛda lelei Aɔ̃

¹ Ŋɔi Zɔɔbu í jɛ í ni,

² ǹ gbɔ ide dimiɛ tuuba nkpɔ nkpɔ tã. Iŋɛ fei, inɛ ku lɛlɛ nŋɛu í jɛ yaamɔ.

³ Hee waati yoomai ide ngbɛ ŋau ihɛ̃ aa tã. Wahala yoomai í jɔ̀ ì waa fɔ ide do yaase bɛɛbɛ ŋa.

⁴ Amu mɔ an yɔkɔ n fɔ ide bɛi iŋɛ mɔ wo bii í jɛ iŋɛi í wa si agbɛm ŋa. An ba ŋɛ ide nkpɔ nkpɔ ku fɔ, nɔ an gbugbã si ŋɛ iri.

⁵ An mu nŋɛ gbugbã do ide ku fɔm, nɔ an mante ŋɛ do ide hee ara kuro nŋɛu ku fo.

⁶ Amma baa bii ǹ wa n fɔ ide, ara kurom kaa tũ, nɔ baa bii ǹ wa n coko kaa kaye.

⁷ Wee nsɛi, Ilaaɔ̃i í kpa gbugbãm. Nŋui í ce asɔɔi kpasɛ̃m fei.

⁸ Batai aram iyi í yuguui í jɛ sɛɛda. Aram í gbɛ wa koo nɔ wa yɛ taalem.

⁹ Amui Ilaaɔ̃ í kãsi iju nɔ wa lelem wa ŋɔ inyí sim. Nŋui í jɛ mbɛɛm nɔ wa dam gɔ̃gɔ̃.

¹⁰ Inɛ ŋa à la gɛlɛ à wasi ku gbagba sim, à waa sambalam nɔ à wasi ku bum. Aŋa fei à ce anu akã à dede sim wa.

¹¹ Ilaaɔ̃i í som í daa inɛ ŋa iyi a kù mà bɛɛrɛɛ ŋa awɔ. Í jɔ̀m nii si awɔi inɛ laalɔ ŋa.

¹² Ilaaɔ̃ í naa í fɔtɔtɔi laakai ku sũ si bii ǹ wau wo. Í mu kpakɔm í cãm ilɛ, nɔ amui í tosi afaɛ ŋa wa,

¹³ afa ŋau à fo à waa naa sim hai bii fei do bii fei, à mum nɔ à lu kpaam nɔ Ilaaɔ̃ kù nɛ baa araarem. Alolom í lɛgɛ í dikã ilɛ hai si idɔm wa.

¹⁴ Ilaaɔ̃ í naa sim bɛi sooge í cãm í wasi ku mɛɛm.

¹⁵ Jĩnɛi woo kpata akũi ǹ ya n maa n dasi waati kãma fei, nɔ ǹ wa n tɛɛsɛ si sãa na anyɔ.

¹⁶ Kukpata í jɔ̀ ijum fei í kpã nɔ wa bii do ilu kukui iku.

¹⁷ Do nŋu fei, n kù taa inɛ gɔ gbugbã baa hai tako, kutɔɔm í ya nɔ ku mái waati kãma fei.

¹⁸ Njɛm wa dikã, ilɛ ku maà biiɛ. Jɔ̀ inɛ ŋa a gbɔ anu ku dɔ̃i ide kukɔ̀m bii fei.

¹⁹ Bɛbɛi, ǹ nɛ sɛɛda lelei Aɔ̃, nɔ do ntɔ ǹ nɛ inɛ iyi á jɛɛm sɛɛda lele.

²⁰ Baa bii kpaasim ŋa a kù dasim, Ilaaɔ̃i ǹ wa n cɔ do cikãaju.

²¹ Debɛi sɛɛdam ku dede ku kɔ̀ɔm si wajui Ilaaɔ̃, bɛi amanɛ ŋa à ya ce si ilɛ.

²² Kú fɔ ide wa domi à waa ka ajɔm ŋai bɛbɛi, nɔ ǹ mu kpãai bii an koo nɔ n kaa nɛ ku baa má.