Zɔɔbu 15 - Bibeli do fee

Elifazi í ni, inɛ laalɔ kaa ga

¹ Ŋɔi Elifazi inɛi Temaau í so ide nɔ í ni,

² ilu laakai í nɛ ku ya jɛ ide do kumà iyi kù nɛ yaase? Í nɛ ku ya maa fɔ ide si fufu?

³ Ide ŋa iyi ì waa naò araɛ ntɔ ngbɛi, ide ŋa iyi ì waa fɔ fei kaa sobi inɛ si nkãma.

⁴ Awɔ aa kpa idei Ilaaɔ̃ kú jirima nɔ aa kpa hee do kpãai idei Ilaaɔ̃ ku tɔɔ,

⁵ domi kurarai í wa si ideɛ ŋa, nɔ ide ku nyi ŋai ì ya so.

⁶ Nɔ kù jɛ amui ǹ wa n yɛ taaleɛ, gɛlɛɛi wa yɛ taaleɛ.

⁷ Awɔi ì jɛ amanɛ sinte iyi à taka si andunyau? Awɔi à tako à taka a bɛi a taka iri kuta ŋa?

⁸ Bii Ilaaɔ̃ í ce kutɔtɔɔ do amalekaɛ ŋa, aa gbɔ ide iyi í fɔ? Awɔ akãi ì nɛ bisi?

⁹ Mii ì mà iyi awa a kù mà. Mà mii ì gbɔ yaaseɛ iyi awa a kù gbɔɔ.

¹⁰ Mɔkɔ ngbo ilu ntoi iri fũfũ ŋa à wa si inɔ nwa iyi à gboa baaɛ.

¹¹ Ì waa donda kulɛlɛi Ilaaɔ̃ iyi awa à waa muɛ do ide didɔ̃ ŋaui?

¹² Mà idei idɔɛi ì waa too si. Yoomai í jɛ yaasei gɔ̃gɔ̃ iyi ì waa da wau ihɛ̃.

¹³ Ilaaɔ̃i ì waa ce si idɔɔkɔ̃ nɔ nŋui ì waa gbagba si do ide nkpɔ nkpɔɛ ŋau bɛ.

¹⁴ Mii amanɛ í jɛ hee ku maa ni nŋu í má, mà inɛ iyi inaabo í bí mii í jɛ hee ku maa ni nŋu í jɛ dee dee.

¹⁵ Bii Ilaaɔ̃ í kɔ̀ amalekaɛ ŋa naanɛ, bii lelei Aɔ̃ kù má si wajuɛ,

¹⁶ aa na a fɔ idei amanɛ laalɔ nŋu iyi daa sãmi ku ce í faalaa bɛi inyi ku mɔ?

¹⁷ Sotĩ i gbɔ, an sɔ̃ɛ yaasei mii iyi ǹ yɛ,

¹⁸ do ikɔ iyi ǹ gbɔ hai bi ilu laakai ŋa, do mii ŋa iyi bala nŋa ŋa à sɔ̃ ŋa a kù singa nŋa.

¹⁹ Aŋa akãi Ilaaɔ̃ í na ilɛu wo, nɔ inɛ njoo kãma kù naa si inɔ nŋa waati nŋu.

²⁰ Inɛ laalɔ í ya wa si inɔ kufɔi si kuwɛɛɛ fei, nɔ adɔ̃ iyi Ilaaɔ̃ í jilɛa ilu inɔ kuká í ya nɛ kɔɔi.

²¹ Ibai zigiidai í ya ce si itĩɛ, nɔ si waatii laakai ku sũi woo kpa inɛ í ya nɛ ku maa koo siɛ.

²² Ci ya maa tamaa mà nŋu á fita si má, nɔ taakubai í ya maa degbeɛ ku kpaa.

²³ Í ya sai ku maa bɔ canga do njɛ ku maa dɛdɛ sɔnda, nɔ wa mà iyi waatii iku wa degbe nŋu.

²⁴ Njo do zigiida í wa siɛ hee í jɔ̀ idɔɛ í dede bɛi ilaalu iyi í ce sɔɔlu wa bɔ igũ,

²⁵ si na iyi í jɔ̀ í dedeò ide ku kɔ̀ si Ilaaɔ̃, nɔ Ilaaɔ̃ ilu gbugbã feii wa ba ku ce.

²⁶ Í kofolai í sɛi í kooò siɛ do tɛli iyi í nɛ sisima í deò araɛ tɛɛ.

²⁷ Wajuɛ wa kɔ̃, nɔ kpakpaa cingaaɛ fei í kɔ̃ò iŋa.

²⁸ Ideɛ í wai si ilu ŋa iyi à lɛgɛ do si inɔ ile ŋa iyi inɛ gɔ kù wa si má nɔ wa cuku.

²⁹ Kaa jɛ ilu amani má, walakɔ amaniu kaa kpɛ nɔ waju ku bɔɛ kaa fangaa bii fei má.

³⁰ Kaa fita si ikuu. Inai á jo amaawɔɛ ŋa nɔ fufui gɛlɛi Ilaaɔ̃ á so ku nɛòɛi.

³¹ Bii zambai wa kaaba, wa sɔa araɛ iboi, domi zambai á jɛ ribaɛ.

³² Á naa siɛi hee ku maa ku, nɔ amaawɔɛ ŋau a kaa wu kpɔtɔɔ má.

³³ Á yɛi bɛi iso patanpuu iyi jĩi ndii rezɛ̃ɛ í jɔ̀ wa cuku wa, walakɔ bɛi jĩi ndii olivi iyi kokoɛ wa wɔ.

³⁴ Ntɔ ntɔ inɛ iyi ci ya jirima Ilaaɔ̃, kpasɛ̃ɛ kaa bɔ waju, nɔ inai á cuku wa hai lele si kpasɛ̃i inɛ iyi í ya gba amua hai nɛ yaase ŋa,

³⁵ domi inɛ iyi í so asĩi laalɔ, laalɔi á bí, nɔ mii iyi í jĩa si inɔɛui í ya na ku zambaɛ.