Zɔɔbu 13 - Bibeli do fee

Zɔɔbu wa bi aŋaò Ilaaɔ̃ a fɔ ide

¹ Ntɔi, ijum í yɛ fei ndɛɛ, itĩm í gbɔ fei ndɛɛ tã nɔ ǹ gbɔ yaaseɛ.

² Mii iyi ì màu fei ŋa, amu mɔ ǹ màa. I kù nɔ i kù tiam ŋa.

³ Amma Ilaaɔ̃ ilu gbugbã feii an ba ide ku fɔ. Si wajuɛi an koo kɔ̀ò aram,

⁴ domi iŋɛ ì waa bii ntɔ ŋai do ibo. Iŋɛ fei iwɔ iboi ì mà ku na bɔ̃ɔ ŋa.

⁵ Bii ì waa coko nŋɛ ŋa mɔm wo, aa jɛ ilu laakai ŋa.

⁶ I sotĩ i gbɔ bɛi ǹ wa n kɔ̀ò aram ŋa. Nɔ i de itĩ i gbɔ bɛi ǹ wa n weewea ŋa.

⁷ Aa fɔ ide iyi kù jɛ ntɔ na Ilaaɔ̃i ŋa de, mà aa sɔ ibo ŋai i kɔ̀òɛ.

⁸ Ì waa bi i na Ilaaɔ̃ ntɔ ŋai de, mà ì nɔ ì waa bi i gbaa ŋai.

⁹ Bii Ilaaɔ̃ í na wa wusɛ ŋɛ, á dɔ̃ nŋɛ si? Mà aa sɔaa ibo ŋai bɛi à ya sɔa amanɛ ibo.

¹⁰ Do ntɔ á na ku yɛ taale nŋɛ bii í jɛ si asiii ì waa kɔ̀òɛ ŋa.

¹¹ Amanlu kú jɛɛ kù waa mu ŋɛ njo? Ci ya jɔ̀ zigi nŋɛ ku da?

¹² Ide ku fɔ nŋɛ ŋau fei idei takoi iyi í yɛ bɛi ilúlu, nɔ ntɔ nŋɛ fei í yɛi bɛi idĩi pɔkɔdɔ.

¹³ I coko ŋa. Amui ǹ nɛ ide ku fɔ wa bɛbɛi, mii iyi á ce ku ce.

¹⁴ Ǹ tã sɔɔlu si mii fei, baa bii hundem wa wɔ̀ jɔ̀lɔ.

¹⁵ Bii Ilaaɔ̃ í bi ku kpam, n kù wa n cɔ kpãai nkãma má. Amma an kɔ̀ò aram si wajuɛ, n fɔ kucem.

¹⁶ Nɔ iyi bɛi á jɛ faabam, domi Ilaaɔ̃ kaa jɛ inɛ laalɔ kãma ku naa si wajuɛ.

¹⁷ I sotĩ i gbɔ idem ŋa. I jɔ̀ i gbɔ yaasei idem ŋa.

¹⁸ Wee ǹ ce sɔɔlu ǹ wa n bɔ kiiti. Nɔ ǹ mà kãm kãm iyi ǹ nɛ ntɔ.

¹⁹ Yooi á na ku jãm ide. Bii í jɛ n kù nɛ ntɔi hai nsɛi ǹ gbasi n coko nɔ n ku mɔm gbakã.

²⁰ Aɔ̃ Lafɛ̃ɛm, nyam hai si mii minji lege lege, ku ba n naa si wajuɛ.

²¹ Sinte titã, ǹ wa n tɔɔɛi i maà maa wahalam. Minjisiaɛ, maà jɔ̀ njo ku maa mum.

²² Si anyiɛ, kpem wa, an jɛɛ. Walakɔ an fɔ ide nɔ i jɛɛm wa.

²³ Dulum fɛloi ǹ ce. Taale yoomai ǹ ce. Jɔ̀ n mà si mii iyi n kù jirimaɛ.

²⁴ Na mii í ce ì fũsim awɔ. Na mii í ce ì waa ceem bɛi akãi mbɛɛɛ ŋa.

²⁵ Ì waa bi i maa yayam nii, amu wua kokoi iyi fufu í so wa nɛò? Ì waa bi i maa lelem nii hai nɛ kɔɔ, amu fɔfɔ ngbɛ?

²⁶ Ntɔ ntɔ, ì kɔ ide kugaabu ŋa si gãmɛm, ì waa kpãm ijui kurara ŋa iyi ǹ ce hai si waati iyi ǹ wɛɛ keeke.

²⁷ Ì kpati kutɛm ŋa do sesee, nɔ ì waa kɛɛmam si kucem fei, ì nyaam kɔɔ.

²⁸ Nɔ aram í sãmi wa koo bɛi jaaɛ iyi wa ce kãa.