Zɔɔbu 12 - Bibeli do fee

Zɔɔbu í ni, Ilaaɔ̃ í ya cei bɛi í bi

¹ Ŋɔi Zɔɔbu í jɛ í ni,

² ntɔ ntɔ ì waa tamaa bɛi ì nɛ kumà iyi amanɛ ŋa à ya nɛ fei ŋai, nɔ aa ku ŋai do bisi ajɔ.

³ Do nŋu fei amu mɔ ǹ nɛ bisi bɛi iŋɛ mɔ. I kù rem do bisi kãma ŋa. Nɔ ide iyi ì fɔ ŋa, inɛ fei í mà bɛɛbɛ.

⁴ Waati iyi ǹ wasi ku tɔɔ Ilaaɔ̃ kú jɛɛm, amui ǹ baa ǹ jɛ yaakoi kpaasim ŋa, amu inɛ dee dee hai nɛ taale gɔ.

⁵ À ya donda ilu inɔ kufɔi. Bɛɛbɛi inɛ ŋa iyi à wɛɛò laakai ku sũ ŋa à ya jilɔɔ si. Nɔ bɛɛbɛ mɔi à ya maa cea inɛ ŋa iyi wahala í ba.

⁶ Amma ile ŋa à ya maa wɛɛò laakai ku sũi si inɔ kpasɛ̃ nŋa ŋa. Inɛ ŋa iyi à waa dɛdɛ anui Ilaaɔ̃ ŋa à ya maa wɛɛ nŋai hai nɛ zigiida, aŋa iyi a kù mà Ilaaɔ̃ kãma bii kù jɛ gbugbã nŋa.

⁷ Amma bii ì bee mɛɛmu ŋa aa kɔɛ, nɔ yɛi ku fo ŋa aa sɔ̃ɛ.

⁸ Walakɔ koo bee ilɛ, á kɔɛ, nɔ cɛ̃ɛi inɔ tenku ŋa aa sɔ̃ɛ.

⁹ Si inɔ nŋa fei yooma nŋai kù mà iyi Ilaaɔ̃i í ce mii fei.

¹⁰ Nŋui wa mu kuwɛɛi inɛ fei, amii inɛ fei í wa si awɔɛ.

¹¹ Itĩi í ya wũa ide iyi à waa gbɔ, bɛi gɛlɛ í ya wũa didɔ̃i sɔnda.

¹² Mɔkɔ ngbo ŋai à ya nɛ laakai, nɔ hunde sisɔi í ya naaò bisi wa.

¹³ Bi Ilaaɔ̃i laakai do gbugbã à wa. Nŋui í nɛ ikɔ do bisi.

¹⁴ Mii iyi í bɛjɛ, inɛ kãma kaa yɔkɔ ku teeseɛ. Nɔ inɛ iyi í cĩmbo si, inɛ kãma kaa yɔkɔ ku cĩaa.

¹⁵ Bii í kɔ̀ ijĩ ku wɔ, mii fei í ya gbɛi. Bii í jɔ̀ ijĩu wa wɔ wa mɔ, ilɛ í ya fɔtɔtɔi.

¹⁶ Nŋui í nɛ gbugbã do laakai. Nŋui wa mu inɛ iyi í nyɔ do inɛ iyi wa nyɔ inɛ ŋa.

¹⁷ Nŋui í ya jɔ̀ a mu woo kɔ ilaalu ŋa si bisi aru a maa nɛò ŋa kutɛ ngbɛ, nɔ nŋui í ya fɔtɔtɔi laakaii woo mu ilɛ ŋa.

¹⁸ Nŋui í ya leekĩ gbugbãi ilaalu ŋa nɔ ku dĩ nŋa ikũi aru ŋa.

¹⁹ Nŋui í ya jɔ̀ a mu woo wee ŋa mɔ aru a maa nɛò ŋa kutɛ ngbɛ, nɔ ku kɛkɛ bomma iyi í wɛɛu.

²⁰ Nŋui í ya kɔ̀ ilu gɛlɛ didɔ̃ ŋa ide, nɔ ku jɔ̀ mɔkɔ ngbo ŋa a bitiò yaasei mii ŋa ku wũa.

²¹ Nŋui í ya jɔ̀ a cé ilu bɛɛrɛ ŋa, nɔ nŋui í ya jɔ̀ ilu inɔ kukã ŋa a kua jĩnɛ ku ja igũ ŋa.

²² Nŋui í ya nya ilu kukui bi kuwai iku ŋa, nɔ ku naaò inya kumá wa.

²³ Nŋui í ya jɔ̀ gbugbãi dimi ŋa ku kɔ̃ɔsi, nɔ nŋui í ya jɔ̀ a ce nfe nŋa. Nŋui í ya jɔ̀ bomma nŋa ku la ku kɔ̃ɔsi nɔ ku jɔ̀ a mu ŋa a nɛò ŋa.

²⁴ Nŋui í ya kpa bisii inɛ ngboi ilɛ ŋa nɔ ku jɔ̀ a nyɔ a maa dabii si inɔ gbaa bii kpãa kù wa.

²⁵ Nɔ ku jɔ̀ a maa babii si ilu kuku bii inya kumá kù wa. Í ya jɔ̀ a maa dabiii bɛi inɛ ŋa iyi atɛ̃ wa kpa ŋa.