Zɔɔbu 11 - Bibeli do fee

Sofaa í ni, sinda wa bi Ilaaɔ̃

¹ Ŋɔi Sofaa inɛi Naamau í so ide nɔ í ni,

² ì waa tamaa a kù nɛ ide iyi aa jɛa ide nkpɔ nkpɔɛ ŋau bɛi? Mà ì waa tamaa ide ku màɛi á jɔ̀ i nɛ ntɔ?

³ Ide nkpɔɛ ŋau bɛi ì tamaa á jɔ̀ inɛ ŋa a cokoɛ? Aa maa yaako zamaa nɔ a maa cokoɛi?

⁴ Ì waa ni ide iyi awɔ ì waa fɔ ntɔi. Ì ni i kù nɛ taale kãma si wajui Ilaaɔ̃.

⁵ Bii í jɛ á ce Ilaaɔ̃ takaɛ ku cĩ gɛlɛ ku baɛ ide ku fɔ wa wo,

⁶ á kɔɛ si bisi nɔ ku nyisiɛ asii ŋa, domi í la í re kumà nwa. Á jɔ̀ i mà wo iyi nŋu wa bii ijui si kuraraɛ gɔ ŋa.

⁷ Ì waa tamaa ì mà Ilaaɔ̃ mam mam nii de, mà ì waa tamaa ì mà bɛi í má í toi nŋu iyi í jɛ ilu gbugbã fei.

⁸ Kumáɛu í gboka í re lelei Aɔ̃. To, mii ì mà aa ce. Í jĩisa í re bi kuwai iku ŋa, mii aa mà si bɛ.

⁹ Í sɔ í re ilɛ nɔ í cĩ í re tenku.

¹⁰ Bii í jɛ Ilaaɔ̃ í mu ilu taale piisɔ̃ɔ walakɔ bii í kpe inɛ gɔ kiiti, yooi á na ku kakɔɔɛ.

¹¹ Í mà woo sɔ ibo ŋa sãa sãa. Nɔ í ya yɛ kurarai inɛ ŋa, ci ya wahala si.

¹² Ajɔ iyi sɛnga á naa ku bí inɔ ilu, ajɔ nŋu bɛ mɔi nnyɛi á ba bisi.

¹³ Amma awɔ, bii ì tɛ idɔ nɔ ì wu awɔ lele ì tɔɔ Ilaaɔ̃,

¹⁴ bii ì jɔ̀ dulum ku ce, nɔ i kù jɔ̀ laalɔ kù lɔ wa inɔ kpasɛ̃ɛ,

¹⁵ aa so iri lele, kurara kãma kaa wa si. Aa leekĩ dim dim nɔ njo kaa wa si,

¹⁶ domi aa gbɛjɛ wahalaɛ ŋau. Aa ya ye gigi nŋai bɛi inyi iyi í cã í lɔ.

¹⁷ Kuwɛɛɛ á maa daana bɛi dasã. Ilu kuku á yɛɛi bɛi daakɔ.

¹⁸ Aa nɛ naanɛ, domi aa nɛ kpãa ku cɔ. Aa ya cɔ canga do njɛ nɔ aa ya sĩ njooi do laakai.

¹⁹ Aa sũ nɔ inɛ kãma kaa bitandiɛ. Inɛ nkpɔ nkpɔi a ya naa ku maa tɔɔ i ce araarei aŋa.

²⁰ Amma kpãa ku cɔi inɛ laalɔ ŋa á kpa iri. Aa dɛdɛ bi ku manji a kua, iku nŋu akãi á jɛ kpãa ku cɔ nŋa.