Zɔɔbu 10 - Bibeli do fee

Zɔɔbu í ni, Ilaaɔ̃ í jɔ̀ à bím wai ku ba ku ce nfem

¹ Kuwɛɛ kù waa bindom má. N kaa n jɔ̀ kuweewea. An maa n fɔ idei inɔ kufɔm nɔui.

² An sɔ̃ Ilaaɔ̃ n ni, maà maa ceem bɛi ilu taale, sɔ̃m na mii í jɔ̀ ì waa yɛ taalem.

³ Aa nɛ inɔ didɔ̃ bii ì waa wahala mii iyi ì taka do awɔɛ? Á sĩaaɛ si bii inɛ laalɔ ŋai ì jɔ̀ à waa nɛ kpãa ku cɔ?

⁴ Ijuɛ bɛi ti amanɛi í yɛ? Mà ì waa cɔ ilui bɛi amanɛ ŋa.

⁵ Kuwɛɛɛ ci ya kpɛ bɛi ti amanɛ? Mà adɔ̃ɛ ci ya kpɔ bɛi ti amanɛi.

⁶ To, na mii í ce ì waa dɛdɛ i mà kuraram ŋa iyi ǹ ce, hee ku to i maa wusɛ dulum iyi ǹ ce.

⁷ Ì nɛ i mà sãa sãa iyi n kù ce taale kãma, nɔ inɛ kãma kaa yɔkɔ ku nyam hai si awɔɛ.

⁸ Awɔi ì takam. Awɔi ì cem do awɔɛ, awɔi ì cem mam mam. Nɔ awɔi ì waa ce nfem.

⁹ Ǹ wa n tɔɔɛi, jɔ̀ i ye gigi iyi awɔi ì takam do amà, nɔ ì waa bi i sindoom si sãa bii ì cem doui?

¹⁰ Awɔi ì jɔ̀ ǹ jo wa bɛi amɔ tũtũ, nɔ ì jɔ̀ ǹ cĩ bɛi amɔ fãai.

¹¹ Si anyiɛ nɔ ì wɔ̃m do kũkũ do atĩ, nɔ ì daam si bata do bãasĩ.

¹² Awɔi ì jɔ̀ ǹ nɛ hunde nɔ ì ce araarem ì muum ami nɔ ì waa gbɔɔm.

¹³ Amma ǹ mà bɛbɛi mii iyi í wa si idɔɛ do mii iyi ì waa lasabu wo.

¹⁴ Bii ǹ ce dulum, ì waa yɛm nɔ i kaa gbe iyi i kù yɛ taalem.

¹⁵ Nɔ bii í jɛ ǹ nɛ taalei, inɔ kufɔi á jɛ titom. Baa bii í nɔ í jɛ n kù nɛ taale gɔi n kaa n nɛ n fĩ awɔ má na anyɔ nla nla do ilu are nla ku jɛm.

¹⁶ Nɔ bɛi ǹ tɛ ǹ dede fei ì ya lelem wai bɛi muusu nla, ì ya cãm nii do gbugbãɛ.

¹⁷ Ì waa mantem do ijuukpãɛ ŋau. Idɔɔkɔ̃ɛ wa la wa kooi si gãmɛm, nɔ waati kãma fei ì ya maa sãsi wahala ŋa wai bɛi sooge mbɛɛ ŋa.

¹⁸ Na mii í ce ì jɔ̀ ǹ fita wa hai si inɔi iyem. Bii ǹ ku wo, inɛ kãma kaa yɛm.

¹⁹ An yɛi wo bɛi inɛ ŋa iyi a kù naa si andunya. Bii ǹ cuku wa gbakã wo aa so a koo a maa sim nii ilɛ.

²⁰ Ajɔm ŋa kù gbe kù waa kpɔ má. Debɛi, leekĩ wahalaɛ ŋau, nɔ i jɔ̀ n jɛ kuwɛɛ do laakai ku sũ si waati keeke iyi í gbeem nɔu,

²¹ hee n maa n nɛ bi kuwai iku ŋa tengi bii ilu kuku nla nla í wa nɔ n kaa n baa má,

²² si ilɛ bii iku í jɛ bomma, tengi bii nkãma kù waa nɛ dee dee nɔ inya kumái dasã í ya yɛ bɛi idũ laja.