Zɔɔbu 1 - Bibeli do fee

Wahala sintei Zɔɔbu

¹ Mɔkɔ gɔi í wɛɛ wo si ilɛi Usi à ya kpoo Zɔɔbu. Mɔkɔu kù nɛ taale kãma, í jɛ inɛ dee dee, í ya jirima Ilaaɔ̃, nɔ í ya saa laalɔ.

² Mɔkɔu í nɛ ama inɛmɔkɔ mɛɛje do ama inaabo mɛɛta.

³ Í nɛ angudã dubu mɛɛje si gaaɛ do kpookpo dubu mɛɛta do kɛtɛ ku ce icɛ dubu akã do gbankɛlɛ zãu cĩɔ miiu do woo ce icɛ ŋa nkpɔ nkpɔ si inɔ kpasɛ̃ɛ. Nŋui í nɛ amani í re inɛi ilɛi ideɛ ŋa fei.

⁴ Ama inɛmɔkɔɛ ŋau à ya nya jingau a maa jɔa njɛi. Nɔ à ya kpe wecĩ mɛɛta nŋa ŋau a naa a ba ŋa ku jɛ do ku mɔ.

⁵ Nɔ waati iyi à jɛ jingau nŋa à tã fei, Zɔɔbu í ya bɛ inɛ gɔi koo kpe amu ŋau wa ku ba ku ce buki ku nyaò riisi nŋa. Í ya dedei daadaakɔ ku cea inɛ akã nŋa fei kuwee iyi à ya jo si ina fei sãa sãa ku kpa idei dulum du ŋa, domi Zɔɔbu í ya fɔi si inɔɛ ku maa ni, á yɔkɔ ku jɛ amam ŋau à ce dulum à bu Ilaaɔ̃ si idɔ nŋa waatii jingau nŋa. Nɔ bɛɛbɛi Zɔɔbu í ya maa ce waati kãma fei.

⁶ Ŋɔi ajɔ nŋu gɔ amalekai Ilaaɔ̃ ŋa à naa bi Aɔ̃ Lafɛ̃ɛ, nɔ Seetam mɔ í wa inɔ nŋa wa.

⁷ Ŋɔi Aɔ̃ Lafɛ̃ɛ í bee Seetam í ni, hai iwoi ì waa naa. Nɔ í jɛaa í ni, ǹ koo ǹ dabii si andunya ǹ kaakoɛ wai.

⁸ Ŋɔi Aɔ̃ Lafɛ̃ɛ í beeɛ má í ni, i kù yɛ Zɔɔbu woo ce icɛm bɛ? Inɛ kãma kù wa si andunya iyi í yɛ bɛi nŋu. Mɔkɔu kù nɛ taale kãma, í jɛ inɛ dee dee, í ya jirimam, nɔ í ya saa laalɔ.

⁹ Ŋɔi Seetam í jɛa Aɔ̃ Lafɛ̃ɛ í ni, kù jɛ si ngbɛi Zɔɔbu wa jirimaɛò.

¹⁰ Kù jɛ awɔi ì waa degbeɛ nŋu do kpasɛ̃ɛ do mii iyi í nɛ fei ba. Si antaiɛ ì weeaa si icɛɛ ŋa nɔ gaaɛ í la í re si ilɛu wa koo.

¹¹ Amma bii ì lesi amaniɛ awɔ, kù nɛ sika kãma, á ceekpeɛ.

¹² Ŋɔi Aɔ̃ Lafɛ̃ɛ í sɔ̃ Seetam í ni, andi mii iyi Zɔɔbu í nɛ fei wee í wa awɔɛ. Koo i ceaa bɛi ì bi, amma maà na i lesi nŋu takaɛ awɔ. Ŋɔi Seetam í tɛkɛɛ hai bi Aɔ̃ Lafɛ̃ɛ.

¹³ Ajɔ nŋu gɔ amai Zɔɔbu ŋau à waa jɛ nɔ à waa mɔ atɛ̃ vɛ̃ɛ inɔ kpasɛ̃i igbã nŋa.

¹⁴ Ŋɔi inɛ gɔ í naa í sɔ̃ Zɔɔbu í ni, kɛtɛɛ ŋa à waa fa ilɛ nɔ gbankɛlɛɛ ŋau à waa jɛ cingaa nŋa bɛ,

¹⁵ ŋɔi inɛi Sabee ŋa à naa si ŋa, à mu ŋa nɔ à kpa woo ce icɛɛ ŋau fei. Amu akãi ǹ ba ǹ sa wa nɔ ǹ naa ku sɔ̃ɛ.

¹⁶ Kù fɔ ideu kù tã, gbakã nɔ inɛ gɔ mɔ í to wa í sɔ̃ Zɔɔbu í ni, lele í jɛ angudãɛ ŋa do woo ce icɛɛ ŋa í jo ŋa fei. Amu akãi ǹ ba ǹ sa wa nɔ ǹ naa ku sɔ̃ɛ.

¹⁷ Wa fɔ ideu kù tãa, gbakã nɔ inɛ mmuɛ í to wa í naa í sɔ̃ Zɔɔbu í ni, inɛi Kadee ŋa à kpɛ̃ sooge nŋa ŋa ikɔ mɛɛta, nɔ à naa à mu kpookpoɛ ŋa nɔ à kpa woo ce icɛɛ ŋa fei. Amu akãi ǹ ba ǹ sa wa nɔ ǹ naa ku sɔ̃ɛ.

¹⁸ Waati iyi wa sɔ̃ɔ ideu, ŋɔi inɛ mmuɛ í to wa má, nɔ í sɔ̃ Zɔɔbu í ni, ama inɛmɔkɔɛ ŋa do ama inaaboɛ ŋa à waa jɛ nɔ à waa mɔ atɛ̃ vɛ̃ɛ idei igbã nŋa,

¹⁹ ŋɔi fufu nla nla gɔ í dede wa hai do ikpa gbaau í naa í lɛgɛ gonta mɛɛi ile bii à wau nɔ ileu í cuku í bata ŋa, awaasũ ŋau fei à ku. Amu akãi ǹ ba ǹ fita si nɔ ǹ naa ku sɔ̃ɛ.

²⁰ Ŋɔi Zɔɔbu í dede í ga ibɔɛ nɔ í wa iriɛ ku nyisiò inɔ kufɔɛ nɔ í sɛɛbata ilɛ

²¹ í ni, basĩi iyem í bím wa nɔ basĩi an nyi má. Aɔ̃ Lafɛ̃ɛi í muum, nɔ nŋui í gbaa má. Ka saabu Aɔ̃ Lafɛ̃ɛ.

²² Nɔ si nŋu ŋau bɛ fei Zɔɔbu kù ce dulum nɔ kù yɛ taalei Ilaaɔ̃ si nkãma.