Laabaau jiida iyi Zãa í kɔ 9 - Bibeli do fee

Jesu í jɔ̀ inɛ gɔ iyi à bí fɛɛju í yɛ ilu

¹ Iyi Jesu wa nɛ ŋɔi í yɛ inɛ gɔ iyi à bí fɛɛju.

² Nɔ mɔcɔɛ ŋa à beeɛ à ni, Mɛɛtu, na mii í ce à bí inɛɛu ihɛ̃ fɛɛju. Na irii dulum dɛɛi de, mà na irii dulum dii iyeò baaɛ ŋai.

³ Ŋɔi Jesu í jɛ nŋa í ni, kù jɛ na iyi í jɔ̀ í ce dulum, kù nɔ kù jɛ na iyi í jɔ̀ iyeò baaɛ ŋa à ce dulum. Í fɛɛjuɛ dei ku ba a yɛ yaase bɛi Ilaaɔ̃ wa ce icɛ siɛ.

⁴ Dasã kù nɛ bɛi aa ka ce iyi a kù ce icɛi inɛ iyi í bɛm wa. Idũ í maai wa si bii inɛ gɔ kaa yɔkɔ ku ce icɛ.

⁵ Waati iyi ǹ wa si andunya fei amui ǹ jɛ inya kumái andunya.

⁶ Iyi Jesu í fɔ bɛɛbɛ í tã ŋɔi í tu antɔ í takiɛ do sãa í daa fɛɛjuu si ijuɛ.

⁷ Ŋɔi í sɔ̃ɔ í ni, koo wɛɛju si inyii fatamai Siloe. (Yaasei iriu bɛi í jɛ ku bɛ.) Ŋɔi fɛɛjuu í koo í wɛɛju nɔ í baa wa yɛ ilu bɛbɛi.

⁸ Kpaasiɛ ŋa do inɛ ŋa iyi à yɔɔ í ya maa bara wo à ni, kù jɛ mɔkɔ iyi í ya buba ku maa barau mbɛ ya.

⁹ Inɛ gɔ ŋa à ni, nŋui. Inɛ gɔ ŋa mɔ à ni, kù jɛ nŋu, à jɔ njɛi. Ŋɔi inɛɛu takaɛ í ni, amu mbɛ.

¹⁰ Ŋɔi inɛ ŋau à beeɛ à ni, bɛirei í ce ijuɛ í cĩ.

¹¹ Ŋɔi í sɔ̃ ŋa í ni, inɛ iyi à ya kpe Jesuu bɛi í tu antɔ si sãa í sisaam si iju nɔ í sɔ̃m í ni n bɔ fatamai Siloe n koo n wɛɛju. Ŋɔi iyi ǹ koo ǹ wɛɛju gbakã ǹ yɛ ilu.

¹² Nɔ à beeɛ à ni, iwoi inɛɛu í wa. Nɔ í ni, n kù mà.

Farisi* ŋa à waa bee fɛɛju iyi í ba iriu ide

^13-14 Wee í ko ajɔi kusĩmii Jesu í taki sãa do antɔ í jɔ̀ inɛɛu í yɛò iluu. Ŋɔi à gbã inɛɛu à bɔòɛ bi Farisi ŋau.

¹⁵ Ŋɔi Farisi ŋau mɔ à beeɛ bɛi í ce í yɛò ilu. Nɔ í jɛ nŋa í ni, Jesui í daam sãa si iju í ni n koo n wɛɛju. Iyi ǹ wɛɛju nɔ ǹ yɛ ilu.

¹⁶ Ŋɔi Farisi ŋau gɔgɔ ŋa à ni, inɛ iyi í ce icɛu bɛ kù naa hai bi Ilaaɔ̃, domi kù waa jirima ajɔi kusĩmi. Amma inɛ gɔ ŋa mɔ à ni, bɛirei ilu dulum á ce ku yɔkɔ ku ce dimii maamaakeu ihɛ̃. Nɔ kakɔɔ í lɔ si anini nŋa.

¹⁷ Ŋɔi à bee fɛɛjuu má à ni, si kuyɛi awɔ takaɛ ni, bɛirei ì yɔɔ, awɔ iyi í jɔ̀ ì yɛ ilu. Nɔ í ni, waliii.

¹⁸ Amma inɛ ngboi Zuifu ŋau a kù dasi naanɛ iyi inɛɛu í jɛ fɛɛju wo í bɛi wa yɛò ilu nsɛi. Ŋɔi à koo à bee iyeò baaɛ ŋa

¹⁹ à ni, ama nŋɛui ihɛ̃? Nɔ ntɔ ntɔ do fɛɛjui ì búu bɛ ŋa? Nɔ bɛirei í ce wa yɛ ilu nsɛi.

²⁰ Ŋɔi baaɛ ŋau à ni, à mà iyi ama nwai nɔ do fɛɛju mɔi à búu.

²¹ Amma a kù mà bɛi í ce wa yɛ ilu si nsɛi, a kù nɔ a kù mà inɛ iyi í cĩaa ijuɛ. Nŋu takaɛ í la, i beeɛ, á sɔ̃ ŋɛ do araɛ.

²² À fɔ bɛɛbɛi si na iyi í jɔ̀ à waa ce njoi inɛ ngboi Zuifu ŋau. À waa ce njo nŋai si na iyi í jɔ̀ à ce anu akã tã à ni inɛ iyi í jɛsi iyi Jesu í jɛ inɛ iyi Ilaaɔ̃ í cica a kaa jɛ lafɛ̃ɛ ku naa ile bii à ya ce kutɔtɔɔ nŋa má.

²³ Ŋɔi í ce à ni nŋu takaɛ í la, a beeɛ.

²⁴ Ŋɔi Farisi ŋau à kpe inɛɛu má à sɔ̃ɔ à ni, fɔ ntɔ na Ilaaɔ̃. Awa à mà iyi inɛɛu ilu dulum nii.

²⁵ Ŋɔi í jɛ nŋa í ni, amu de n kù mà dulum ku jɛi njɛ. Ǹ jɛ fɛɛju wo amma nsɛi ǹ wa n yɛ ilu. Andi iyi ǹ mà mbɛ.

²⁶ Ŋɔi à beeɛ à ni, bɛirei do bɛirei í ceɛ. Bɛirei í ce í cĩ ijuɛ.

²⁷ Nɔ í ni, ǹ sɔ̃ ŋɛ tã, amma i kù gbɔ bɛi ǹ fɔ ŋai. Bɛirei í ce ì waa bi i gbɔɔ má ŋa. Mà iŋɛ mɔ ì waa bi i jɛ mɔcɔɛ ŋai de.

²⁸ Ŋɔi à buu à ni, awɔi ì jɛ mɔcɔɛ bɛ mɛɛ. Awa mɔcɔi Moizi ŋai.

²⁹ Awa à mà iyi Ilaaɔ̃ í ba Moizi ide ku fɔ wo, amma inɛɛu bɛ awa a kù mà hai bii í naa.

³⁰ Ŋɔi inɛɛu í ni, to, ide nŋɛu bɛi í bitim iyi ì ni i kù mà hai bii í naa ŋa. Do nŋu fei, njɛi í jɔ̀ ǹ yɛ ilu.

³¹ Awa de à mà iyi Ilaaɔ̃ ci ya gbɔ idei ilu dulum ŋa, í gbe inɛ ŋa iyi à waa jirimaɛ nɔ à waa ce idɔɔbiɛ, idei lafɛ̃ɛ ŋai í ya gbɔ.

³² Ajɔ kãma inɛ gɔ kù gbɔ bii à cĩ ijui inɛ iyi à bí do fɛɛju.

³³ Bii kù jɛ hai bi Ilaaɔ̃i inɛɛu bɛ í naa kaa yɔkɔ ku ce nkãma.

³⁴ Ŋɔi à sɔ̃ɔ à ni, si dulum nii à bíɛ mam mam. Ì tamaa awɔi aa kɔ nwa si cio? Ŋɔi à ganjiɛ ku naa ile bii à ya ce kutɔtɔɔ nŋa ŋa.

Hai dasi Jesu naanɛ ŋa à yɛi bɛi fɛɛju ŋa

³⁵ Iyi Jesu í gbɔ à lele inɛɛu ŋɔi í koo í yɔɔ í beeɛ í ni, ì dasi Amai Amanɛ naanɛ?

³⁶ Ŋɔi inɛɛu í ni, mɔkɔɔyi, yooi í jɛ Amai Amanɛ ku ba n dasiɛ naanɛ.

³⁷ Ŋɔi Jesu í ni, amu iyi ì waa yɛu ihɛ̃ mbɛ, amui ǹ wa n baɛ ide ku fɔ.

³⁸ Nɔ í ni, ǹ dasiɛ naanɛ Lafɛ̃ɛ. Ŋɔi í gulɛ si wajuɛ.

³⁹ Ŋɔi Jesu í ni, na irii kiitii ǹ naa si andunya ku ba fɛɛju ŋa a yɛ ilu, nɔ inɛ ŋa mɔ iyi à waa yɛ ilu a fɛɛju.

⁴⁰ Ŋɔi Farisi gɔ ŋa iyi à wa bɛu à gbɔ ideu ŋɔi à beeɛ à ni, awa mɔ fɛɛju ŋai?

⁴¹ Ŋɔi Jesu í sɔ̃ ŋa í ni, bii ì jɛ fɛɛju ŋa, i kù nɛ taale ŋa. Amma si bɛi ì ya wɛɛ si iŋɛ ì waa yɛ ilu ŋa, nŋui í jɔ̀ ì wa si dulum hee nsɛi ŋa.