Laabaau jiida iyi Zãa í kɔ 6 - Bibeli do fee

Jesu í wò inɛmɔkɔ dubu miiu (5.000)

^1-4 Si anyii nŋu, jingaui Zuifu ŋa iyi à ya kpe Iku ku kuau í maai wa. Waati bɛɛbɛi Jesu í kua icei tenkui Galilee. Tenkuui à ya nyi a kpe Tiberia má. Ŋɔi zamaa nkpɔ wa tooɛ, domi à yɛ maamaake ŋa iyi í ya maa ce ku maa faabaò bɔ̃ɔ ŋa. Ŋɔi Jesu í gũ iri kuta gɔ í buba do mɔcɔɛ ŋa ajɔ.

⁵ Iyi í cɔ ilu nɔ í yɛ zamaa nla gɔi wa naa bi tɛɛ. Ŋɔi í bee Filipu í ni, iwoi aa ka ba ijɛ iyi aa ka ra inɛ ŋau ihɛ̃ a jɛ.

⁶ Í fɔ bɛɛbɛi ku cɔò laakai Filipu domi í mà bɛi nŋu á ce tã.

⁷ Ŋɔi Filipu í jɛaa í ni, baa fiai icɛi ajɔ cĩɔ minji kaa to ka ra nŋa ijɛ iyi aŋa fei aa ba kekee kekee.

⁸ Ŋɔi inɛ akãi mɔcɔ ŋau iyi à ya kpe Anderee, ifɔi Simɔɔ Piɛɛ í ni,

⁹ ama awaasũ gɔ í wa ihɛ̃ í nɛ pɛ̃ɛ ara miiu do cɛ̃ɛ minji. Amma nŋu bɛ kaa cea zamaa nlau ihɛ̃ nkãma.

¹⁰ Ŋɔi Jesu í ni, i jɔ̀ aŋa fei a buba. Wee inyau í nɛ fɔfɔ nkpɔ nkpɔ. Ŋɔi aŋa fei à buba. Si inɔ nŋa kukpɔi inɛmɔkɔ ŋau í to dubu miiu (5.000).

¹¹ Ŋɔi Jesu í so pɛ̃ɛ ŋau í saabu Ilaaɔ̃, ŋɔi í jɔ̀ à kpɛ̃a inɛ ŋa iyi à waa bubau. Bɛɛbɛ mɔi í ce do cɛ̃ɛ ŋau. Nɔ à jɛ bɛi à bi.

¹² Iyi aŋa fei à jɛ à yo, ŋɔi Jesu í sɔ̃ mɔcɔɛ ŋa í ni, i ko ijɛ iyi í gbeu ŋa ku ba gɔgɔ ku maà ce nfe.

¹³ Nɔ à ko ijɛ iyi í gbeu. Si pɛ̃ɛ ara miiu iyi Jesu í gba í bububu í kpɛ̃a inɛ ŋa à jɛu, kɔlɔ maateejii í gbe.

¹⁴ Iyi inɛ ŋau à yɛ maamaake iyi Jesu í ceu ŋɔi à ni, do ntɔ, nŋui í jɛ walii iyi í nɛ ku naa si andunyau.

¹⁵ Ŋɔi inɛ ŋau à waa bi a muu do gbugbã a coo ilaalu. Amma si bɛi Jesu í mà si ŋa ŋɔi í nya araɛ nŋu akã í nyi iri kutau má.

Jesu wa nɛ si antaii tenku

¹⁶ Iyi alɛ í lɛ ŋɔi mɔcɔi Jesu ŋau à bɔ itĩi tenkuu.

¹⁷ Ŋɔi à lɔ akɔi inyi ku ba a kua a bɔ Kapɛranumu. Nɔ à dasi kpãa à waa nɛ. Ŋɔi idũ í dũ nɔ wee Jesu kù to si ŋa.

¹⁸ Ŋɔi fufu nla gɔ wa ce nɔ inyiu wa yaya.

¹⁹ Iyi à nɛ zakai kiloo mɛɛfa ŋɔi à hɔ̃nnɛ Jesu wa nɛ si antaii inyiu wa naa bi tu ŋa, ŋɔi zigi nŋa í da.

²⁰ Amma Jesu í sɔ̃ ŋa í ni, amui, i maà jɔ̀ njo ku mu ŋɛ.

²¹ Ŋɔi à waa bi nŋu mɔ ku lɔ inɔ akɔi inyiu amma wee gbakã à to bii à waa bɔu.

Zamaau wa dɛ Jesu

²² Iju kumáɛ inɛ ŋa iyi à wa icei tenkuu bɛ, à ye gigi iyi akɔ akãi í wa bɛ wo. À nɔ à mà iyi Jesu kù lɔ akɔi inyiu do mɔcɔɛ ŋa ajɔ, aŋa duusɔ̃ɔ nŋai à nɛ.

²³ Waati bɛɛbɛ, akɔi inyi gɔ ŋa mɔ à naa hai Tiberia nɔ à to inyau. Tengi bɛi Lafɛ̃ɛ Jesu í tako í saabu Ilaaɔ̃ í bɛi í na ŋa pɛ̃ɛ à jɛu.

²⁴ Iyi zamaau í yɛ Jesu do mɔcɔɛ ŋa kãma nŋa kù wa bɛ, ŋɔi aŋa mɔ à lɔ akɔi inyi ŋau à bɔ ku dɛdɛ ŋa ikpa Kapɛranumu.

Jesui í jɛ ijɛi kuwɛɛ

²⁵ Ŋɔi inɛ ŋau à kua icei tenkuu do ikpa ihɔ̃ à koo à ba Jesu bɛ nɔ à ni, Mɛɛtu, waati yoomai í to wa ihɛ̃.

²⁶ Ŋɔi Jesu í jɛ nŋa í ni, ntɔ ntɔ, ì waa dɛdɛm ŋai si na iyi í jɔ̀ ì ba pɛ̃ɛ ì jɛ ì yo ŋa, kù jɛ na iyi í jɔ̀ ì yɛ ǹ ce maamaake gɔ ŋa.

²⁷ I maà ti i ce icɛi ijɛ iyi í ya sãmi nŋu akã, amma i ce icɛi ijɛ iyi á jɔ̀ i ba kuwɛɛ hai tã ŋa. Nɔ ijɛ nŋu amu Amai Amanɛi an mu nŋɛ, domi amui Ilaaɔ̃ Baaba í na yiikoɛ nɔ í jɔ̀ inɛ ŋa à waa yɔɔ.

²⁸ Ŋɔi à beeɛ à ni, mii aa ka ce ka ceò icɛ iyi Ilaaɔ̃ í bi.

²⁹ Ŋɔi Jesu í jɛ nŋa í ni, icɛ iyi Ilaaɔ̃ í bi si ŋɛi í jɛ i dasi amu woo bɛɛ naanɛ ŋa.

³⁰ Ŋɔi à beeɛ à ni, maamaake yoomai aa ce ka yɔɔ ku ba ka dasiɛ naanɛ. Mà icɛ yoomai aa ce.

³¹ Nɔ à ni má, bala nwa ŋa à jɛ ijɛ gɔ iyi à ya kpe mana si gbaa. À kɔɔ à ni í na ŋa ijɛu wai hai lelei Aɔ̃.

³² Ŋɔi Jesu í jɛ nŋa í ni, ntɔ ntɔ ǹ wa n sɔ̃ ŋɛi, kù jɛ Moizii í mu nŋɛ ijɛu wa hai lelei Aɔ̃, amma Baam nii í mu nŋɛ ijɛ iyi í jɛ ntɔu wa hai lelei Aɔ̃.

³³ Nɔ ijɛ iyi Ilaaɔ̃ í ya mua inɛ, nŋui í jɛ inɛ iyi í kita wa hai lelei Aɔ̃ iyi á jɔ̀ amanɛ ku ba kuwɛɛ hai tã.

³⁴ Ŋɔi à sɔ̃ɔ à ni, mɔkɔɔyi, mu nwa dimii ijɛu bɛ do ajɔ fei.

³⁵ Ŋɔi Jesu í sɔ̃ ŋa í ni, amui ǹ jɛ ijɛi kuwɛɛ. Inɛ iyi í naa bi tom, ari kaa kpa lafɛ̃ɛ má pai, nɔ inɛ iyi í dasim naanɛ, agbɛ kaa kpaa má pai.

³⁶ Ǹ tako ǹ sɔ̃ ŋɛ wo ǹ ni, ì waa yɛm ŋa, amma i kù dasi naanɛ ŋa.

³⁷ Inɛ ŋa iyi Baaba í nam fei aa naa bi tom, nɔ inɛ iyi í naa bi tom baa bii bɛirei n kaa n nyɔɔ angule.

³⁸ Ǹ kita wai hai lelei Aɔ̃ n na n ceò idɔɔbii inɛ iyi í bɛm wa, kù jɛ idɔɔbii amu takam.

³⁹ Idɔɔbii inɛ iyi í bɛm wa wee. Inɛ ŋa iyi í nam, n maà n jɔ̀ baa inɛ akã nŋa ku ce nfe amma n jĩ aŋa fei hai si balɛ si ajɔi ankãanyi.

⁴⁰ Idɔɔbii Baam nii í jɛ inɛ iyi í yɛ amu Ama nɔ í dasim naanɛ fei ku nɛ kuwɛɛ hai tã, an nɔ n jĩ lafɛ̃ɛ hai si balɛ si ajɔi ankãanyi.

⁴¹ Ŋɔi Zuifu ŋau à waa gbagba siɛ si na iyi í jɔ̀ í ni nŋu í jɛ ijɛ iyi í kita wa hai lelei Aɔ̃.

⁴² Ŋɔi à ni, í jɔ Jesu amai Zozɛfuu mbɛ mɛɛ. À mà iyeò baaɛ. Bɛirei í ce í ni nŋu í naai hai lelei Aɔ̃.

⁴³ Ŋɔi Jesu í sɔ̃ ŋa í ni, i maà ti i maà gbagba na irim bɛɛbɛ ŋa.

⁴⁴ Inɛ gɔ kaa yɔkɔ ku naa bi tom bii kù jɛ Baaba iyi í bɛm wai í fa lafɛ̃ɛ wa. Nɔ inɛ nŋui an jɔ̀ ku jĩ hai si balɛ si ajɔi ankãanyiu.

⁴⁵ Inɛ akãi walii ŋau í kɔ í ni, Ilaaɔ̃ takaɛi á na ku kɔ inɛ fei si cio. Nɔ bɛɛbɛi inɛ iyi í gbɔ idei Baaba fei nɔ í jirima cioɛ lafɛ̃ɛ á naa bi tom.

⁴⁶ Inɛ kãma kù yɛ Ilaaɔ̃ Baaba do iju, í gbe amu iyi ǹ naa hai bi tɛɛu.

⁴⁷ Ntɔ ntɔ, inɛ iyi í dasim naanɛ fei í nɛ kuwɛɛ hai tã.

⁴⁸ Amui ǹ jɛ ijɛi kuwɛɛ.

⁴⁹ Bala nŋɛ ŋa à jɛ mana si gbaa amma kù ganji a ku.

⁵⁰ Amma amu ijɛ gɔi ǹ wa n fãa iyi í naa hai lelei Aɔ̃, iyi bii amanɛ í jɔɔ kaa ku.

⁵¹ Amui ǹ jɛ ijɛi kuwɛɛ. Hai lelei Aɔ̃i ǹ kita wa. Nɔ inɛ iyi í ba ijɛu í jɛ fei í nɛ kuwɛɛ hai tã. Ijɛui í jɛ aram. An náai ku ba inɛi andunya ŋa a maa wɛɛò.

⁵² Iyi Jesu í fɔ bɛɛbɛ ŋɔi Zuifu ŋa à ce si kakɔɔ jiida à waa ni, bɛirei nŋu á ce ku na wa iŋai araɛ ka ŋɔ.

⁵³ Ŋɔi Jesu í sɔ̃ ŋa má í ni, ntɔ ntɔ ǹ wa n sɔ̃ ŋɛi, bii i kù ŋɔ iŋai arai amu Amai Amanɛ walakɔ i kù mɔ njɛm i kù nɛ kuwɛɛ ŋa.

⁵⁴ Inɛ iyi í ŋɔ iŋai aram nɔ í mɔ njɛm í nɛ kuwɛɛ hai tã, nɔ an jũu hai si balɛ si ajɔi ankãanyiu,

⁵⁵ domi iŋai aram nii í jɛ ijɛ alala nɔ njɛm mɔi í jɛ inyi alala.

⁵⁶ Inɛ iyi í ŋɔ iŋai aram nɔ í mɔ njɛm awaò aa ka nɛ anu akã ka maa wɛɛò.

⁵⁷ Baabai í bɛm wa. Nŋui í nɛ kuwɛɛ nɔ na iriɛi amu mɔ ǹ wɛɛ. Bɛɛbɛ mɔi inɛ iyi í ŋɔm, lafɛ̃ɛ í nɛ kuwɛɛ na irim.

⁵⁸ Ijɛ iyi í kita wa hai lelei Aɔ̃ ǹ wa n fãa. Inɛ nŋu kù jɛ bɛi ijɛ iyi bala nŋɛ ŋa à jɛ nɔ kù ganji à kuu. Inɛ iyi wa jɛ dimii ijɛu ihɛ̃ á maa wɛɛi hee do ajɔ fei.

⁵⁹ Ideu bɛi Jesu í kɔ inɛ ŋa si ile bii Zuifu ŋa à ya ce kutɔtɔɔ Kapɛranumu.

Idei kuwɛɛ hai tã

⁶⁰ Iyi mɔcɔi Jesu ŋau à gbɔ ideu ŋɔi nkpɔ nŋa í ni, ideu ihɛ̃ í lele. Yooi á nɔɔ.

⁶¹ Nɔ Jesu í mà iyi à wasi ku gbagba na ideu, ŋɔi í bee ŋa í ni, ideui í jɛ nŋɛ bi ku koosɛ?

⁶² Debɛi, bɛirei aa ni ŋa bii ì yɛ amu Amai Amanɛ ǹ wa n bɔ lelei Aɔ̃ bii ǹ tako ǹ wa wo.

⁶³ Hundei í ya mua inɛ kuwɛɛ, gbugbãi amanɛ kù jɛ nkãma. Nɔ ide iyi ǹ sɔ̃ ŋɛu wee hundei, nɔ nŋui í jɛ kuwɛɛ.

⁶⁴ Amma si inɔ nŋɛ inɛ gɔ ŋa a kù dasi naanɛ. Jesu í fɔ bɛɛbɛi si na iyi í jɔ̀ í mà hai sinteɛ inɛ ŋa iyi a kaa dasi nŋu naanɛ do inɛ iyi á na ku zamba nŋu.

⁶⁵ Nɔ í ni má, na iyi ihɛ̃i í jɔ̀ ǹ sɔ̃ ŋɛ wo ǹ ni inɛ gɔ kù wɛɛ iyi á naa bi tom bii kù jɛ Ilaaɔ̃ Baabai í jɔ̀ lafɛ̃ɛ í naa.

⁶⁶ Ŋɔi hai waati bɛɛbɛ mɔcɔ nkpɔɛ ŋau à fa ara nŋa do anyi a ci ya tooɛ má.

⁶⁷ Na ŋɔi í jɔ̀ Jesu í bee mɔcɔ maateejiɛ ŋau í ni, iŋɛ mɔ ni, i kù waa nɛ ŋai?

⁶⁸ Ŋɔi Simɔɔ Piɛɛ í jɛaa í ni, Lafɛ̃ɛ, bi yooi aa ka bɔ má. Awɔi ì nɛ idei kuwɛɛ hai tã.

⁶⁹ Awa à dasi naanɛ nɔ à mà kãm kãm iyi awɔi ì jɛ Inɛ Kumá iyi í naa hai bi Ilaaɔ̃.

⁷⁰ Ŋɔi Jesu í bee ŋa í ni, kù jɛ amui ǹ cica iŋɛ maateejiu ba. Do nŋu fei inɛ akã nŋɛ í jɛ inɛi Seetam.

⁷¹ Idei Zudasi amai Simɔɔ Isikariɔtii wa fãa, si na iyi í jɔ̀ baa do iyi í wa si inɔi mɔcɔ maateeji ŋau fei, nŋui á zambaɛ.