Laabaau jiida iyi Zãa í kɔ 5 - Bibeli do fee

Jesu í jɔ̀ wɛɛgɛ gɔ í ba iri

¹ Si anyiɛ ŋɔi jingau gɔ í to wa. Jingaui Zuifu ŋai. Nɔ Jesu í bɔ Zeruzalɛmu.

² Wee Zeruzalɛmu bɛ, bi ku lɔò inɔ iluu í kpɔ. Andɛ akãi à ya kpe Andɛi angudã ŋa. Kɔkɔi andɛu bɛi fatama nla gɔ í wa. Nɔ à ma si ile iyi í nɛ andɛ miiu. À ya kpoo Bɛtizada do feei Ebɛɛ.

³ Si andɛi ile ŋaui bɔ̃ɔ nkpɔ í ya na ku maa sũ, fɛɛju ŋa do woo sukutɛ ŋa do wɛɛgɛ ŋa. [Bɛi à ya sũ a maa degbe kuyayai inyiu,

⁴ domi ajɔ gɔ ŋa amalekai Ilaaɔ̃ í ya kita wa ku lɔ si fatamau nɔ ku fɔ inyiu. Bii inyiu í fɔ bɔ̃ɔ iyi í tako í dasi bɛ dimii bɔ̃ɔ iyi í nɛ fei í ya ba irii.]

⁵ Wee inɛ gɔ í wa bɛ, bɔ̃ɔu adɔ̃ kuntaa do mɛɛjɔi í ce siɛ.

⁶ Iyi Jesu í yɔɔ wa sũ bɛ í bɛi í mà iyi í kpɛ bɛ ŋɔi í beeɛ í ni, ì bi i ba iri?

⁷ Ŋɔi bɔ̃ɔu í jɛaa í ni, mɔkɔɔyi, n kù nɛ inɛ iyi á dasim si inyiu waati iyi í fɔ. Hee n maa n kookaai n maa n dasi inyiu, inɛ gɔ í ya takom nii.

⁸ Ŋɔi Jesu í sɔ̃ɔ í ni, dede i ka sɛ̃ɛɛ, i nɛò.

⁹ Ŋɔi gbakã inɛɛu í ba iri nɔ í ka sɛ̃ɛɛ í dasi kpãa wa nɛ. Wee ajɔi kusĩmii.

¹⁰ Ŋɔi inɛ ngboi Zuifu ŋau à sɔ̃ inɛ iyi í ba iriu à ni, ajɔi kusĩmii nnyi. Wooda nwa í ganji i so sɛ̃ɛɛ.

¹¹ Ŋɔi í sɔ̃ ŋa í ni, inɛ iyi í jɔ̀ n ba irii í ni n so sɛ̃ɛm n nɛ.

¹² Ŋɔi à beeɛ à ni, yooi í sɔ̃ɛ í ni i so sɛ̃ɛɛ i nɛ.

¹³ Amma inɛ iyi í ba iriu kù mà lafɛ̃ɛ si na iyi í jɔ̀ zamaa í wa bɛ nɔ Jesu í dasi inɔ nŋa.

¹⁴ Iyi í ce sãa ŋɔi Jesu í yɔɔ bantumai kpasɛ̃i Ilaaɔ̃ nɔ í sɔ̃ɔ í ni, wee ì ba iri bɛbɛi. To, maà ce dulum má ku ba laalɔ iyi í re bɛɛbɛ ku maà baɛ má.

¹⁵ Ŋɔi inɛɛu í nyi bi inɛ ngbo ŋau í sɔ̃ ŋa í ni Jesui í jɔ̀ nŋu í ba iri.

¹⁶ Ŋɔi í jɔ̀ inɛ ŋau à waa kpã Jesu iju si na iyi í jɔ̀ í ce dimii mii nɔu bɛ si ajɔi kusĩmi.

¹⁷ Amma Jesu í sɔ̃ ŋa í ni, Baam í ya maa ce icɛi waati kãma fei, bɛɛbɛ mɔi amu takam ǹ wa n ce.

¹⁸ Na irii ideu bɛi Zuifu ŋa à teese à waa dɛ Jesu ku kpa, kù jɛ si na iyi í jɔ̀ í jɔ̀ inɛɛu í ba iri si ajɔi kusĩmi nŋu akã, amma si na iyi í jɔ̀ wa wã araɛi do Ilaaɔ̃ má, wa ni Ilaaɔ̃i í jɛ baai nŋu.

Yiikoi Amai Ilaaɔ̃

¹⁹ Ŋɔi Jesu í sɔ̃ ŋa í ni, ntɔ ntɔ ǹ wa n sɔ̃ ŋɛi, amu Ama, n kaa n yɔkɔ n ce ngɔgɔ do aram bii kù jɛ mii iyi ǹ yɛ Baam wa ce. Mii iyi Baaba wa ce fei, nŋui amu mɔ Ama ǹ wa n ce.

²⁰ Baaba í bi amu Amaɛ nɔ í nyisim mii iyi nŋu takaɛ wa ce fei. Á nyisim icɛ iyi í re bɛ ihɛ̃ má mɔm ku ba iŋɛ fei i biti ŋa.

²¹ Ntɔ ntɔ, si bɛi Ilaaɔ̃ Baaba í ya jĩ iku ŋa nɔ ku ce ŋa ilu hunde, bɛɛbɛ mɔi amu Amaɛu an mua inɛ ŋa iyi ǹ cica kuwɛɛ.

²² Ilaaɔ̃ Baaba takaɛ ci ya kiiti inɛ gɔ, amma í so kiitiu fei í daa amu Amaɛ si awɔ,

²³ ku ba inɛ fei ku saalu amu Amau si bɛi à waa saalu Ilaaɔ̃ Baaba. Inɛ iyi kù saalu amu Amau, Baaba iyi í bɛm wai kù saalu.

²⁴ Ntɔ ntɔ ǹ wa n sɔ̃ ŋɛi, inɛ iyi wa gbɔ idem nɔ í dasi inɛ iyi í bɛm wa naanɛ, lafɛ̃ɛ í nɛ kuwɛɛ hai tã. Kaa naa bi ku ce kiiti má, amma í kua iku í lɔ si kuwɛɛi.

²⁵ Ntɔ ntɔ, awaati wa naa nɔ wee í to wa tã, iyi iku ŋa aa gbɔ imui amu Amai Ilaaɔ̃ nɔ si inɔ nŋa inɛ ŋa iyi à gbɔ imum fei aa nɛ kuwɛɛ.

²⁶ Si bɛi Baaba takaɛ í jɛ irii kuwɛɛ, bɛɛbɛ mɔi í jɔ̀ amu Amaɛ ǹ jɛ.

²⁷ Nɔ í muum kpãa n kiitiò inɛ ŋa, si na iyi í jɔ̀ ǹ jɛ Amai Amanɛ.

²⁸ Na nŋu, i maà biti ŋa, domi waati wa naa iyi iku ŋa fei aa gbɔ imum,

²⁹ nɔ aa fita wa hai si balɛ. Inɛ ŋa iyi à ce jiidaɛ aa jĩ si kuwɛɛ hai tã. Inɛ ŋa mɔ iyi à ce laalɔ aa jĩ nɔ a kiiti ŋa a yɛ taale nŋa.

Mii ŋa iyi wa nyisi iyi Jesu í nɛ yiiko

³⁰ Jesu í ni, n kaa n yɔkɔ n ce ngɔgɔ do aram. Si bɛi Ilaaɔ̃ í sɔ̃m si bɛɛbɛi an ceò kiitiu, nɔ kiitim í jɛ dee dee domi n kù wa n dɛ idɔɔbim ku ce, bii kù jɛ idɔɔbii inɛ iyi í bɛm wa.

³¹ Bii amu takam nii ǹ wa n jɛa aram sɛɛda wo, sɛɛdam kù jɛ ntɔ.

³² Amma inɛ gɔ í wɛɛ iyi wa jɛa inɛ ŋa sɛɛdam nɔ ǹ mà iyi sɛɛda iyi wa jɛ nŋa na irim nɔu ntɔi. Lafɛ̃ɛi í jɛ Zãa woo dasi inyi.

³³ Iŋɛi ì bɛ siɛ inɛ ŋa, nɔ ide iyi í fɔ si gãmɛm nɔu ntɔi.

³⁴ Kù jɛ ǹ wa n dɛ amanɛ ku jɛɛm sɛɛda, amu de ǹ wa n fɔ bɛɛbɛi ku ba i ba faaba ŋa.

³⁵ Zãau bɛ í yɛi bɛi fitila iyi à má ku má inya. Nɔ waati keeke gɔ ì jɛsi i wɛɛò inɔ didɔ̃ si inya kumáɛu ŋa.

³⁶ Amma sɛɛda gɔ í wɛɛ iyi í la í re ti Zãa. Sɛɛdaui í jɛ icɛ iyi ǹ wa n ce. Aɔ̃ Baabai í daam si awɔ, nŋu mɔi wa jɛa inɛ ŋa sɛɛdam nɔ wa nyisi iyi Ilaaɔ̃ Baabai í bɛm wa.

³⁷ Ilaaɔ̃ Baaba takaɛi wa jɛa inɛ ŋa sɛɛdam. Amma iŋɛ i kù gbɔ ide ku fɔɛ baa ajɔ akã ŋa hee má jɛ i yɔɔ do iju ŋa.

³⁸ Ideɛ kù ba bi ku buba si ŋɛ, domi i kù dasi amu iyi í bɛ wau naanɛ ŋa.

³⁹ Iŋɛ ì ya maa cio kukɔi idei Ilaaɔ̃ si na iyi í jɔ̀ ì waa tamaa aa ba siɛ kuwɛɛ hai tã ŋa. Nɔ wee kukɔ ŋau bɛ fei wa jɛa inɛ ŋa sɛɛdam.

⁴⁰ Amma do nŋu fei ì kɔ̀ ku naa bi tom ku ba i ba kuwɛɛ ŋa.

⁴¹ N kù wa n dɛ saabu bi amanɛ ŋa.

⁴² Amma ǹ mà ŋɛ. Ǹ mà iyi i kù nɛ kubii Ilaaɔ̃ si idɔ nŋɛ ŋa.

⁴³ Do irii Baam nii ǹ naa, nɔ i kù gbam ŋa. Amma bii inɛ gɔ njɛ í naa do irii arai nŋu takaɛ, lafɛ̃ɛi aa gba ŋa.

⁴⁴ Bii bɛɛbɛi bɛirei aa ce i dasim naanɛ ŋa, iŋɛ iyi ì ya maa dɛ saabui njɛ ŋa iŋɛ duusɔ̃ɔ nɔ i kù waa dɛ saabu iyi wa naa hai bi Ilaaɔ̃ ŋa, nŋu iyi kù nɛ saa.

⁴⁵ I maà tamaa mà amui an yɛ taale nŋɛ bi Ilaaɔ̃ Baaba. Moizi, nŋu iyi ì waa naanɛ ŋau, nŋui á yɛ taale nŋɛ.

⁴⁶ Bii ì dasi Moizi naanɛ ntɔ ntɔ ŋa wo, aa dasi amu mɔ naanɛ ŋa, domi idem nii Moizi í kɔ.

⁴⁷ Amma i kù dasi ideɛ naanɛ ŋa. To, bɛirei aa ce i dasi idem naanɛ ŋa.