Laabaau jiida iyi Zãa í kɔ 3 - Bibeli do fee

Jesu do Nikodɛmu

^1-2 Idũ ajɔ nŋu gɔ mɔkɔ gɔ í bɔ bi Jesu à ya kpoo Nikodɛmu. Mɔkɔu Farisii, nɔ wa jɛ inɛ akãi inɛ ngboi Zuifu ŋa. Iyi í to bi Jesu ŋɔi í ni, Mɛɛtu, à mà iyi Ilaaɔ̃i í bɛɛ wa i naa i kɔ nwa si cio. À mà bɛɛbɛi si na iyi í jɔ̀ inɛ gɔ kù wɛɛ iyi á yɔkɔ ku ce maamaake ŋa iyi ì ya maa ce bii kù jɛ Ilaaɔ̃i í wɛɛ do lafɛ̃ɛ.

³ Ŋɔi Jesu í jɛaa í ni, ntɔ ntɔ ǹ wa n sɔ̃ɛi, nɔ a kù bí inɛ isɛ gbeejisia kaa yɔkɔ ku yɛ bommai Ilaaɔ̃.

⁴ Amma Nikodɛmu í beeɛ í ni, inɛ iyi í la tã, bɛirei aa ce a búu má. Á nyi inɔi iyeɛ a bɛi a buu isɛ gbeejisia mái?

⁵ Ŋɔi Jesu í jɛaa í ni, ntɔ ntɔ, bii kù jɛ inyi do Hundei Ilaaɔ̃i í bí inɛ gɔ, lafɛ̃ɛ kaa yɔkɔ ku lɔ bommai Ilaaɔ̃.

⁶ Amanɛ amanɛi í ya bí, Hundei Ilaaɔ̃ mɔ hundei í ya bí.

⁷ Ǹ sɔ̃ɛ ǹ ni, í gbe a bí inɛ isɛ gbeejisia. Amma maà jɔ̀ ideu ku muɛ biti.

⁸ Fufu í ya maa cei do bii í bi, nɔ ì ya maa gbɔ ibaɛ, mà irei. Amma i kaa mà hai bii wa naa hee má jɛ bii wa bɔ. Bɛɛbɛ mɔi í yɛ do inɛ iyi Hundei Ilaaɔ̃ í bí fei.

⁹ Ŋɔi Nikodɛmu í beeɛ í ni, bɛirei á ce ku ce.

¹⁰ Ŋɔi Jesu í jɛaa í ni, awɔi ì waa kɔ inɛi Izirɛli ŋa si cio nɔ i kù mà yaasei ideu bɛ?

¹¹ Ntɔ ntɔ ǹ wa n sɔ̃ɛi, ide iyi à mài à waa fɔ, nɔ à waa jɛ sɛɛdai mii iyi à yɛ. Amma do nŋu fei, i ci ya jɛsi sɛɛda nwa ŋa.

¹² Ǹ wa n sɔ̃ ŋɛ ide iyi wa ce si andunya nɔ i kù dasi naanɛ ŋa. To, bii bɛɛbɛi, nɔ bɛirei aa ce i dasi naanɛ ŋa bii ǹ sɔ̃ ŋɛ mii ŋa iyi wa ce lelei Aɔ̃.

¹³ Inɛ gɔ kù wɛɛ iyi í bɔ lelei Aɔ̃ bii kù jɛ amu Amai Amanɛ, amu iyi ǹ kita wa hai lelei Aɔ̃.

¹⁴ Si bɛi Moizi í kɔa njo si jĩi í wuu lele si gbaau, bɛɛbɛ mɔi amu Amai Amanɛ kù nɛ bɛi á ce iyi a kù wu aram lele,

¹⁵ ku ba inɛ iyi í dasim naanɛ fei ku ba kuwɛɛ hai tã.

¹⁶ Ilaaɔ̃ í bi inɛi andunya ŋa jiida jiida hee í na ŋa Ama akãɛ ku ba inɛ iyi í dasiɛ naanɛ fei ku maà ce nfe, amma kú nɛ kuwɛɛ iyi ci ya tã.

¹⁷ Ilaaɔ̃ kù bɛ Amaɛ wa si andunya ku ba ku yɛò taalei inɛi andunya ŋa, amma í bɔɔ wai ku ba inɛi andunya ŋa a ba faaba na saabuɛ.

¹⁸ Inɛ iyi í dasiɛ naanɛ, Ilaaɔ̃ kaa yɛ taaleɛ, amma inɛ iyi kù dasiɛ naanɛ í yɛ taalei lafɛ̃ɛ tã, si na iyi í jɔ̀ kù dasi Ama akãɛ naanɛ.

¹⁹ Í yɛ taalei inɛ dimi bɛɛbɛ ŋai si na iyi í jɔ̀ inya kumá í naa si andunya, amma inɛ ŋa à bi ilu kuku í re inya kumáu. À bi ilu kukuui si na iyi í jɔ̀ kuce nŋa kù sĩa.

²⁰ Ntɔ ntɔ, inɛ iyi wa ce laalɔ fei í ya cé inya kumái. Ci ya naa si inya kumáu ku ba mii iyi wa ce ku maà fita gbugbãa.

²¹ Amma inɛ iyi wa too kpãai ntɔ í ya ce icɛɛ ŋai do idɔɔbii Ilaaɔ̃. Na ŋɔi í jɔ̀ á naa si inya kumá ku ba a yɛ mii iyi nŋu wa ce ti idɔɔbii Ilaaɔ̃i.

Jesu do Zãa

²² Si anyii nŋu, Jesu do mɔcɔɛ ŋa à bɔ ilɛi Zudee. Aŋaò ŋa à ce bɛ ajɔ minji, nɔ Jesu í dasi inɛ ŋa inyi.

²³ Zãa mɔ wa dasi inɛ ŋa inyi ilui Enɔɔ, kɔkɔi Salimu, domi inyi í kpɔ bɛ. Inɛ ŋa à wasi ku koo siɛ nɔ wa dasi ŋa inyi.

²⁴ Waati bɛɛbɛ a kù dasi Zãa piisɔ̃ɔ titã.

²⁵ Ŋɔi mɔcɔi Zãa ŋa do Zuifu gɔ à waa ce kakɔɔ si buki iyi amanɛ á ce ku bɛi ku maaju.

²⁶ Ŋɔi à bɔ bi Zãa à ni, Mɛɛtu, ajɔɛ ì jɛ sɛɛdai mɔkɔ iyi iŋɛò ì wa icei idoi Zuudɛ̃ɛu, mà irei. Wee nsɛi nŋu mɔ wa dasi inɛ ŋa inyi, nɔ inɛ fei wa bɔ bi tɛɛ. Kù jɛɛ si ide kãma?

²⁷ Ŋɔi Zãa í sɔ̃ ŋa í ni, inɛ gɔ kaa yɔkɔ ku ba ngɔgɔ bii kù jɛ Ilaaɔ̃i í muaa.

²⁸ Iŋɛ taka nŋɛ ì jɛ sɛɛdam iyi ǹ ni n kù jɛ inɛ iyi Ilaaɔ̃ í cicau, amma à bɛm wai ku ba n cuaa wa.

²⁹ Inɛ iyi í nɛ abo titɔ̃ nŋui í jɛ mɔkɔ titɔ̃, mà irei. Amma kpaasii mɔkɔ titɔ̃u, inɛ nŋu á leekĩi ku maa gbɔ. Nŋu mɔ í ya nɛ inɔ didɔ̃ ntɔ ntɔ waati iyi í gbɔ imui mɔkɔ titɔ̃u. Na ŋɔi í jɔ̀ nsɛi amu takam inɔ didɔ̃m í kɔ̃.

³⁰ Kù nɛ bɛi á ce iyi bɛɛrɛi Jesu kù kɔ̃ɔsi, nɔ tom kù nɛ bɛi á ce iyi kù kaye.

Inɛ iyi í naa hai lelei Aɔ̃

³¹ Nɔ Zãa í ni má, inɛ iyi í naa hai lelei Aɔ̃ nŋui í re inɛ fei. Inɛ iyi í jɛ ti andunya, inɛi andunyai, idei andunyai í ya maa fɔ. Inɛ iyi í naa hai lelei Aɔ̃ nŋui í re inɛ fei.

³² Wa jɛ sɛɛdai mii iyi í yɛ do iyi í gbɔ. Amma inɛ kãma kù waa jɛsi sɛɛdaɛ.

³³ Inɛ iyi í jɛsi sɛɛdaɛ, í jɛsi iyi Ilaaɔ̃ í jɛ ilu ntɔ.

³⁴ Inɛ iyi Ilaaɔ̃ í bɛ wa idei Ilaaɔ̃i wa fɔ, domi Ilaaɔ̃ í muaa Hundeɛ do inɔ akã.

³⁵ Ilaaɔ̃ Baaba í bi Amaɛ nɔ í daa mii fei si awɔ.

³⁶ Inɛ iyi í dasi Amau naanɛ fei í nɛ kuwɛɛ hai tã. Inɛ mɔ iyi í kɔ̀ ku dasiɛ naanɛ kaa ba kuwɛɛu, amma idɔɔkɔ̃i Ilaaɔ̃ í wa si irii lafɛ̃ɛ.