Laabaau jiida iyi Zãa í kɔ 21 - Bibeli do fee

Jesu í tusɛa mɔcɔ mɛɛje gɔ ŋa araɛ

¹ Si anyii nŋu, Jesu í nyisi araɛ bi mɔcɔɛ gɔ ŋa má kɔkɔi tenku iyi à ya kpe Tiberia. Do yaase bɛi í nyisiò araɛ wee.

² Simɔɔ Piɛɛ do Tomaa iyi à ya kpe Sìkàu do Nataniɛli inɛi Kana si ilɛi Galilee do amai Zebedee ŋa do mɔcɔ minji mmu gɔ ŋa má, aŋa fei à wa inya akã bɛ.

³ Ŋɔi Simɔɔ Piɛɛ í sɔ̃ ŋa í ni, ǹ wa n bɔ cɔcɔ wa ŋa. Nɔ à ni, aa ka siɛ. Nɔ à fita gbakã à lɔ akɔi inyi gɔ idũ à nɛ. Amma idũ ajɔ nŋu a kù mu nkãma.

⁴ Iyi iju wa bɔ ku má, ŋɔi à yɛ Jesu wa leekĩ itĩi tenkuu bɛ, amma a kù mà mà nŋui.

⁵ Ŋɔi Jesu í bee ŋa í ni, iŋɛ awaasũ ŋau bɛ, i kù mu nkãma ŋa de. Ŋɔi à ni, aawo.

⁶ Ŋɔi í sɔ̃ ŋa í ni, i dasi taao nŋɛ inɔ inyi do ikpa awɔ njɛi akɔi inyiu, aa mu cɛ̃ɛ ŋa. Nɔ à sɔ taao nŋa inɔ inyi nɔ à mu cɛ̃ɛ hee à mɔngɔ ku faa wa.

⁷ Mɔcɔ iyi Jesu í bi jiidau í sɔ̃ Piɛɛ í ni, Lafɛ̃ɛ mbɛ. Iyi Simɔɔ Piɛɛ í gbɔ iyi Lafɛ̃ɛi, ŋɔi í dasi ibɔɛ domi basĩi í wɛɛ wo. Nɔ í dasi inyiu wa bɔ bi tɛɛ.

⁸ Amma mɔcɔ ŋa iyi à gbeu à to wa ice do akɔi inyiu, à waa fa taao nŋa iyi í kɔ̃ do cɛ̃ɛu. Kujĩ nŋa do ice kù re agbãawɔ cĩɔ minji.

⁹ Iyi à kita wa ilɛ nɔ à yɛ ina nyɛnyɛ gɔ bɛ cɛ̃ɛ wa banda si, nɔ pɛ̃ɛ wa jilɛ bɛ.

¹⁰ Ŋɔi Jesu í sɔ̃ ŋa í ni, i naaò cɛ̃ɛ gɔ ŋa iyi ì mu wa nsɛiu ŋa.

¹¹ Nɔ Simɔɔ Piɛɛ í koo í lɔ akɔi inyiu nɔ í fa taaou wa ilɛ. Taaou í kɔ̃ do cɛ̃ɛ nla ŋa. Kukpɔ nŋa í to cĩɔ do ciitaa do mɛɛta. Do iyi í kpɔ bɛɛbɛ fei taaou kù ga.

¹² Ŋɔi Jesu í sɔ̃ ŋa í ni, i naa i nya sɔnda ŋa. Nɔ baa mɔcɔ akã kù jɛ ku beeɛ ku ni, awɔi yoo, domi à mà iyi Lafɛ̃ɛi.

¹³ Ŋɔi Jesu í koo í so pɛ̃ɛu do cɛ̃ɛu í na ŋa.

¹⁴ Isɛ gbɛɛtasiaɛi mbɛ bɛi iyi Jesu í nyisi mɔcɔɛ ŋa araɛ hai waati iyi í jĩ hai si balɛ.

Jesu do Piɛɛ

¹⁵ Iyi à nya sɔnda à tã ŋɔi Jesu í bee Simɔɔ Piɛɛ í ni, Simɔɔ amai Zãa, ì bim í re inɛ ihɔ̃ ŋa? Nɔ Piɛɛ í jɛaa í ni, oo Lafɛ̃ɛ. Ì mà iyi ǹ biɛ. Ŋɔi Jesu í sɔ̃ɔ í ni, gbɔa ama angudãm ŋa.

¹⁶ Nɔ í beeɛ má isɛ gbeejisia í ni, Simɔɔ amai Zãa, ì bim? Nɔ Piɛɛ í jɛaa í ni, oo Lafɛ̃ɛ. Ì mà iyi ǹ biɛ. Ŋɔi Jesu í sɔ̃ɔ í ni, degbe angudãm ŋa.

¹⁷ Nɔ í sisi í beeɛ má isɛ gbɛɛtasia í ni, Simɔɔ amai Zãa, ì bim? Nɔ inɔi Piɛɛ í fɔ do si bɛi í beeɛ isɛ gbɛɛtasia í ni, ì bim? Ŋɔi Piɛɛ í jɛaa í ni, Lafɛ̃ɛ, ì mà fei ndɛɛ, ì mà kãm kãm iyi ǹ biɛ. Nɔ Jesu í sɔ̃ɔ í ni, to, gbã angudãm ŋa.

¹⁸ Ntɔ ntɔ ǹ wa n sɔ̃ɛi, waati iyi ì wɛɛ awaasũ ì ya daa araɛ si ibɔ nɔ i bɔ bii ì bi. Amma bii ì na ì gbo, aa tɛ ikpaɛi nɔ inɛ gɔ ku daaɛ si nɔ ku bɔòɛ bii i kù bi.

¹⁹ Do ideu bɛi Jesu í fɔ yaase bɛi Piɛɛ á na ku ku ku nyisiò amboei Ilaaɔ̃. Iyi í fɔ bɛɛbɛ í tã nɔ í sɔ̃ɔ í ni, toom wa.

Jesu do mɔcɔ iyi í bi jiida

²⁰ Ŋɔi Piɛɛ í sinda, nɔ í yɛ mɔcɔ iyi Jesu í bi jiidau wa naa do anyi nŋa. Mɔcɔu nŋui í tako í wa kɔkɔi Jesu waati iyi à waa jɛ í beeɛ í ni, Lafɛ̃ɛ, yooi á zambaɛu.

²¹ Iyi Piɛɛ í yɛ mɔcɔu ŋɔi í bee Jesu í ni, Lafɛ̃ɛ, mɔkɔu ihɛ̃ mɔ ni, bɛirei ti nŋu mɔ á yɛ.

²² Ŋɔi Jesu í jɛaa í ni, baa bii ǹ bi n jɔ̀ ku maa wɛɛ hee n koo n nyiò wa mái, iwoi í yɛɛ. Awɔ de, toom wa.

²³ Ŋɔi laabaaui ideu í fangaa si inɔi woo dasi Jesu naanɛ ŋau à be ni mɔcɔu kaa ku. Amma Jesu kù ni kaa ku, nŋu de í ni, baa bii ǹ bi n jɔ̀ ku maa wɛɛ hee n koo n nyiò wa mái, iwoi í yɛɛ.

²⁴ Mɔcɔ iyi Jesu wa fãau amu Zãai. Nɔ amu takam nii ǹ wa n jɛ sɛɛdai ide ŋau, amu iyi ǹ kɔ tiau ihɛ̃, à nɔ à mà iyi sɛɛdam í jɛ ntɔ.

Iri ku kpai tiau

²⁵ Mii nkpɔ nkpɔ í wɛɛ má iyi Jesu í ce. Bii í jɛ à kɔ fei ndɛɛ akã akã, n kù tamaa mà andunyau ihɛ̃ á to inɛ ŋa a ba bii aa jilɛ tia ŋa iyi aa kɔ ŋau fei.