Laabaau jiida iyi Zãa í kɔ 2 - Bibeli do fee

Abɔdɔ̃ iyi à ce Kana

¹ Si ajɔ minji ŋɔi à waa ce abɔdɔ̃ gɔ Kana ilɛi Galilee. Nɔ iyei Jesu í wa bɛ.

² Nɔ à kpe Jesu do mɔcɔɛ ŋa mɔ bi ku ce abɔdɔ̃u.

³ Ŋɔi atɛ̃ vɛ̃ɛ nŋa í na í tã nɔ iyei Jesu í koo í sɔ̃ɔ í ni, aŋa a kù nɛ vɛ̃ɛ má.

⁴ Nɔ Jesu í jɛaa í ni, yaayi, awɔ si aa sɔ̃m mii iyi an ce. Waatim kù to titã.

⁵ Ŋɔi iyeu í sɔ̃ woo ce icɛ ŋau í ni, i ce bɛi í sɔ̃ ŋɛ fei.

⁶ Wee tengi bii à waa ce abɔdɔ̃u boonyi mɛɛfa gɔ ŋa iyi à ce do kuta à wa bɛ, si bɛi Zuifu ŋau à ya kpã si inyii awala nŋa. Boonyi akã fei á yɔkɔ ku gba inyi zakai jɔlɔ jɔnka mɛɛ walakɔ mɛɛfa.

⁷ Nɔ Jesu í sɔ̃ woo ce icɛ ŋau í ni, i kpã inyi i cuusi boonyi ŋau ku kɔ̃ ŋa. Nɔ à kpã à cuusi hee fei ndɛɛ í kɔ̃.

⁸ Ŋɔi gbakã Jesu í ni a bu a koo a na inɛ ngboi abɔdɔ̃u, nɔ à bu à waa bɔ ku náa.

⁹ Amma hee a maa náa, í kpaasi vɛ̃ɛ tã. Ŋɔi inɛ ngbou í tiɛɛ. Kù mà hai bii í naa, amma inɛ ŋa iyi à kpã inyiu wa ngu ŋa à mà. Iyi í tiɛɛ nɔ í kpe mɔkɔ titɔ̃u,

¹⁰ í sɔ̃ɔ í ni, atɛ̃ iyi í dɔ̃ ku mɔi à ya tako a naaò wa, bii inɛ ŋa à mɔ hee à yo a bɛi a na ŋa iyi kù dɔ̃ sãa sãau. Amma awɔ, didɔ̃ui ì singa hee í to nsɛi.

¹¹ Iyi bɛi í jɛ maamaake sinte iyi Jesu í ce. Kana bɛi í coo si ilɛi Galilee. Do yaase bɛɛbɛi í nyisiò amboeɛ nɔ mɔcɔɛ ŋa à dasiɛ naanɛ.

¹² Si anyii nŋu nɔ i bɔ Kapɛranumu, nŋu do iyeɛ do ifɔɛ ŋa do mɔcɔɛ ŋa, amma a kù kpɛ bɛ.

Jesu í wa bantumai kpasɛ̃i Ilaaɔ̃*

¹³ Jingaui Zuifu ŋa iyi à ya ni jingaui Iku ku kuau í maai wa. Ŋɔi Jesu í bɔ Zeruzalɛmu.

¹⁴ Waati iyi í to bɛ, í bɔ kpasɛ̃i Ilaaɔ̃ nɔ í ba woo ta kɛtɛ do angudã do ankasiidi ŋa si bantumai kpasɛ̃u do inɛ ŋa iyi à buba à waa kpaasi fia.

¹⁵ Ŋɔi í ce kolongbai ikũ nɔ í leleò aŋa fei hai bɛ, hee do angudã do kɛtɛ ŋau fei. Nɔ í fuka taabui woo kpaasi fia ŋau í nikã fia nŋa.

¹⁶ Nɔ í sɔ̃ woo ta ankasiidi ŋau í ni, i fitaò mii ŋau bɛ hai ihɛ̃. I maà sinda kpasɛ̃i Baam ajà nŋɛ.

¹⁷ Iyi mɔcɔɛ ŋau à gbɔ bɛɛbɛ ŋɔi à ye gigii kukɔi idei Ilaaɔ̃ iyi í ni, ǹ nɛ himma si icɛi ileɛu hee wa bi ku kpam.

¹⁸ Ŋɔi Zuifu ŋau à beeɛ à ni, maamaake yoomai aa yɔkɔ i ce nwa ku ba ka mà iyi ì nɛ kpãai bɛɛbɛ ku ce.

¹⁹ Ŋɔi Jesu í jɛ nŋa í ni, i lɛgɛ ileu ihɛ̃ ŋa nɔ si afei ajɔ mɛɛta an dedeɛ má.

²⁰ Ŋɔi Zuifu ŋau à sɔ̃ɔ à ni, adɔ̃ ciiji do mɛɛfai à ce à bɛi à maò ileu ihɛ̃. Bɛirei aa ce i dedeɛ si afei ajɔ mɛɛta.

²¹ Amma idei ile iyi Jesu wa fɔu, araɛi wa fãa.

²² Na nŋu, waati iyi Jesu í jĩ hai si balɛ, mɔcɔɛ ŋa à ye gigi iyi í fɔ ide bɛɛbɛ wo. Nɔ à dasi kukɔi idei Ilaaɔ̃ naanɛ do ide ŋa iyi Jesu í tako í sɔ̃ ŋau.

Jesu í mà idɔi inɛ fei

²³ Si bɛi Jesu í wa Zeruzalɛmu si waatii jingaui Iku ku kuau, inɛ ŋa à yɛ maamaake ŋa iyi í ya maa ce nɔ inɛ nkpɔ í dasiɛ naanɛ.

²⁴ Amma Jesu kù na ŋa ara domi í mà idɔi inɛ fei.

²⁵ Kù bee hee a sisia nŋu daai amanɛ domi nŋu takaɛ í mà mii iyi í wa si idɔi amanɛ fei sãa sãa.