Laabaau jiida iyi Zãa í kɔ 14 - Bibeli do fee

Jesui í jɛ kpãa iyi wa bɔ bi Baaba

¹ Ŋɔi Jesu í sɔ̃ mɔcɔɛ ŋa í ni, i maà ya jɔ̀ i wɛɛò zigiida ŋa. I dasi Ilaaɔ̃ naanɛ nɔ i dasim naanɛ ŋa.

² Bi kuwa í kpɔ kpasɛ̃i Baam. Nɔ wee ǹ wa n koo bɛ n koo n ce nŋɛ sɔɔlui bi kuwa. Bii kù jɛ ntɔ, n kaa n sɔ̃ ŋɛ.

³ Bii ǹ koo ǹ ce nŋɛ bi kuwa ǹ tã an nyi wa má, n naa n gbã ŋɛ n bɔò ŋɛ bi tom ku ba iŋɛ mɔ i wa bii ǹ wa.

⁴ Nɔ bii ǹ wa n bɔu ì mà kpãau ŋa.

⁵ Ŋɔi Tomaa í ni, Lafɛ̃ɛ, a kù mà baa bii ì waa bɔ mɔm. Bɛirei aa ka ce ka mà kpãau.

⁶ Ŋɔi Jesu í jɛaa í ni, amui ǹ jɛ kpãa, do ntɔ, do kuwɛɛ. Inɛ kãma kaa bɔ bi Ilaaɔ̃ Baaba bii kù jɛ hai do bi tom.

⁷ Bii ì màm ŋa, aa mà Baam ŋa. Nɔ hai nsɛi ì màa ŋa ì nɔ ì yɔɔ ŋa.

⁸ Ŋɔi Filipu í ni, Lafɛ̃ɛ, nyisi wa Baaba, nŋu bɛ á to wa.

⁹ Ŋɔi Jesu í jɛaa í ni, Filipu, hai ku kpɛi ǹ wa inɔ nŋɛ ihɛ̃ nɔ i kù màm? Inɛ iyi í yɛm í yɛ Ilaaɔ̃ Baabai. To, na mii í ce ì waa ni, nyisi wa Ilaaɔ̃ Baaba má.

¹⁰ I kù dasi naanɛ iyi ǹ wa si Ilaaɔ̃ Baaba, nɔ Ilaaɔ̃ Baaba mɔ í wa sim ni? Ide iyi ǹ wa n sɔ̃ ŋɛ, n kù wa n fɔɔ do yiikoi amu takam. Amma Baaba í wa sim nɔ nŋui wa ce icɛɛ.

¹¹ I dasim naanɛ ŋa iyi ǹ wa si Baaba nɔ Baaba mɔ í wa sim. Walakɔ i dasi naanɛ ŋa baa na icɛu takaɛ iyi ì waa yɛ ŋa.

¹² Ntɔ ntɔ ǹ wa n sɔ̃ ŋɛi, inɛ iyi í dasim naanɛ, lafɛ̃ɛ mɔ á ce icɛ iyi ǹ wa n ce, nɔ á ce ku la ku re bɛɛbɛ mɔm, domi wee ǹ wa n bɔ bi Baaba.

¹³ Nɔ mii iyi aa tɔɔɛ do irim ŋa fei an coo ku ba amu Amau n nyisiò amboei Baaba.

¹⁴ Ntɔ ntɔ bii ì tɔɔm ngɔgɔ ŋa, an coo.

Jesu í ce kuwã nŋu ku bɛ Hundei Ilaaɔ̃ wa

¹⁵ Nɔ Jesu í ni má, bii ì bim ŋa aa jirima mii iyi ǹ ni i ce ŋa.

¹⁶ Nɔ an tɔɔ Ilaaɔ̃ Baaba ku mu nŋɛ Woo mua gbugbã mmuɛ wa, iyi á maa wɛɛ do iŋɛ hee do ajɔ fei.

¹⁷ Woo mua gbugbãu Hundei Ilaaɔ̃i, nŋui á jɔ̀ inɛ ŋa a mà ntɔu. Inɛi andunya ŋa a kaa yɔkɔ a gbaa si na iyi í jɔ̀ a kù waa yɔɔ, bɛɛbɛ mɔi a kù màa. Amma iŋɛ ì màa ŋa, domi í wɛɛ do iŋɛ, á nɔ ku wa si idɔ nŋɛ.

¹⁸ N kaa n jɔ̀ ŋɛ kɔyɔ. An na n nyi wa bi tu ŋɛ má.

¹⁹ Í gbe keeke nsɛi iyi inɛi andunya ŋa a kaa yɛm má, amma iŋɛ aa yɛm ŋa si na iyi í jɔ̀ ǹ wɛɛ, nɔ iŋɛ mɔ aa wɛɛ ŋa.

²⁰ Waati iyi ajɔu í to wa aa mà ŋa iyi ǹ wa si Baam nɔ iŋɛ mɔ ì wa sim ŋa nɔ amu mɔ ǹ wa si ŋɛ.

²¹ Inɛ iyi í mà woodam nɔ wa jirimaɛ, lafɛ̃ɛi í bim. Inɛ iyi í bim, Baam á bi nŋu mɔ, nɔ amu takam an bi lafɛ̃ɛ, nɔ an nyisiɛ aram.

²² Zudasi gɔ í wa bɛ, amma kù jɛ Zudasi Isikariɔti. Nŋui í beeɛ í ni, Lafɛ̃ɛ, bɛirei aa ce i nyisi wa araɛ nɔ i kaa nyisi inɛi andunya ŋa.

²³ Ŋɔi Jesu í jɛaa í ni, inɛ iyi í bim fei á gbɔ idem, nɔ Baam á bi lafɛ̃ɛ nɔ amu do Baam nɔu fei aa ka naa ka ce bi kuwa si idɔi lafɛ̃ɛ.

²⁴ Inɛ iyi kù bim, lafɛ̃ɛ kaa jirima idem pai. Nɔ ide iyi ì waa gbɔ ŋau ihɛ̃ ŋa, kù jɛ idei amu takam, amma idei Baabai. Nŋui í bɛm wa.

²⁵ Ide ŋau ihɛ̃ fei ǹ wa n sɔ̃ ŋɛi hai waati iyi ǹ wa inɔ nŋɛ ihɛ̃.

²⁶ Amma Hundei Ilaaɔ̃, Woo mua gbugbãu, á maa kɔ ŋɛ si mii fei, nɔ ku maa ye ŋɛ gigii ide ŋa iyi ǹ tako ǹ sɔ̃ ŋɛ fei. Nŋui Baaba á bɛ nŋɛ wa do irim nɔu.

²⁷ Laakai ku sũi ǹ wa n jɔ̀ nŋɛ. Bɛi amu takam ǹ wɛɛò laakai ku sũ, bɛɛbɛ mɔi an jɔ̀ iŋɛ mɔ i wɛɛò laakai ku sũ. Nɔ laakai ku sũ iyi an mu nŋɛu kaa jɛ bɛi ti andunya. Na nŋu, i maà wɛɛò inɔ kufɔ ŋa, nɔ i maà jɔ̀ zigi nŋɛ ku da.

²⁸ Ì gbɔ ŋa iyi ǹ sɔ̃ ŋɛ ǹ ni ǹ wa n kooi, amma an nyi wa bi tu ŋɛ má. Bii ì bim ŋa aa wɛɛ do inɔ didɔ̃ ŋa do iyi ǹ wa n bɔ bi Baaba, domi nŋui í rem.

²⁹ Na ŋɔi í ce ǹ wa n sɔ̃ ŋɛ hai nsɛi hee ide ŋau ku maa ce, ku ba bii ideu í na í ce i dasim naanɛ ŋa.

³⁰ N kaa n ba n sɔ̃ ŋɛ ide nkpɔ má si na iyi í jɔ̀ Seetam ilaalui andunyau wa naa, amma kù nɛ gbugbã kãma sim.

³¹ Ǹ wa n ce fei ndɛɛi si bɛi Baaba í nam woodaɛ ku ba inɛi andunya ŋa a mà iyi ǹ buu. To, i dede ka nɛ hai ihɛ̃ ŋa.