Laabaau jiida iyi Zãa í kɔ 11 - Bibeli do fee

Ikui Lazaa

¹ Mɔkɔ gɔ iyi à ya kpe Lazaa kù waa nɛ baani. Betanii í jɛ iluɛ, nɔ ilui Maari do Maata mɔm bɛ.

² Lazaau wecĩ nŋai. Maariui í jɛ inaabo iyi á na ku fãsi tuae si isɛi Jesu nɔ ku gbãa do ntoi iriɛ.

³ Ŋɔi wecĩ minjii Lazaa ŋau à samba si Jesu anu à ni, Lafɛ̃ɛ, kpaasi jiidaɛ kù waa nɛ baani.

⁴ Iyi Jesu í gbɔ ideu ŋɔi í ni, bɔ̃ɔu kaa kpaa, amma na irii bɔ̃ɔɛu inɛ ŋa aa yɛ amboei Ilaaɔ̃ do ti amu iyi ǹ jɛ Amaɛ.

⁵ Wee Jesu í bi Maata do ifɔɛ do wecĩ nŋa Lazaa.

⁶ Baa do iyi í gbɔ baani hai nɛi Lazaau fei, í ce ajɔ minji má ilu bii í wau.

⁷ Si anyiɛ nɔ í sɔ̃ mɔcɔɛ ŋa í ni, ka nyi ilɛi Zudee má.

⁸ Ŋɔi mɔcɔɛ ŋa à ni, Mɛɛtu, si ajɔ minjiu ihɛ̃ bɛi à bi a taɛ kuta, nɔ ì waa bi i nyi bɛ má?

⁹ Ŋɔi Jesu í bee ŋa í ni, ajɔ akã isɔ fɛloi í nɛ. Kù jɛ maateeji ba. Bii inɛ gɔ wa nɛ dasã kaa koosɛ domi wa yɛ inya kumái andunya.

¹⁰ Amma inɛ iyi wa nɛ idũ á koosɛ domi inya kumá kù wɛɛa.

¹¹ Bɛɛbɛi Jesu í sɔ̃ ŋa. Nɔ í fɔ má í ni, kpaasi nwa Lazaa wa sĩ njooi mɛɛ, amma an koo n jũu.

¹² Ŋɔi mɔcɔɛ ŋau à sɔ̃ɔ à ni, Lafɛ̃ɛ, bii í jɛ wa sĩ njooi í sĩa. Á ba iri.

¹³ Wee ikui Lazaai Jesu wa fãa, amma aŋa à tamaa bɛi idei njoo alalai wa fãa.

¹⁴ Na ŋɔi í jɔ̀ Jesu í sɔ̃ ŋa do yaaseɛ í ni, Lazaa kù wɛɛ.

¹⁵ Amma na iri nŋɛi ǹ wɛɛò inɔ didɔ̃ si na iyi í jɔ̀ n kù wa bɛ hee n jɔ̀ ku ba iri. Bɛbɛi nŋu bɛ á jɔ̀ i dasim naanɛ ŋa. I nɛ ka bɔ bi tɛɛ.

¹⁶ Ŋɔi Tomaa iyi à ya kpe Sìkàu í sɔ̃ mɔcɔ kpaasiɛ ŋa í ni, to, i jɔ̀ ka koo kaa ku do Mɛɛtu ajɔ.

Jesui í jɛ kujĩi iku ŋa nɔ nŋui í jɛ kuwɛɛ

¹⁷ Ŋɔi Jesu do mɔcɔɛ ŋau à bɔ Betani bɛ. Iyi à to, à koo à ba à si Lazaa tã hee í ce ajɔ mɛɛ.

¹⁸ Wee kujĩi Betani do Zeruzalɛmu kù re kiloo mɛɛta.

¹⁹ Nɔ hai Zeruzalɛmu bɛ Zuifu nkpɔ gɔ ŋa mɔ à naa bi Maata do Maari ku ba a ce ŋa fɔɔ na wecĩ nŋa iyi kù wɛɛ.

²⁰ Iyi Maata í gbɔ Jesu wa naa, ŋɔi í bɔ ku koɛ. Amma Maari wa buba kpasɛ̃.

²¹ Ŋɔi Maata í sɔ̃ Jesu í ni, Lafɛ̃ɛ, bii í jɛ ì wa ihɛ̃ wo wecĩm kaa ku.

²² Amma ǹ mà baa nsɛi mii iyi aa tɔɔ Ilaaɔ̃ fei á muuɛ.

²³ Ŋɔi Jesu í sɔ̃ɔ í ni, wecĩɛ á jĩ wa má.

²⁴ Ŋɔi Maata í ni, ntɔi, ǹ mà iyi ajɔi ankãanyi iku ŋa aa jĩ hai si balɛ. Nŋu mɔ á jĩ ajɔ nŋu bɛ.

²⁵ Ŋɔi Jesu í sɔ̃ɔ í ni, amui ǹ jɛ kujĩi iku ŋa nɔ ǹ jɛ kuwɛɛ. Inɛ iyi í dasim naanɛ á maa wɛɛi baa bii í ku.

²⁶ Nɔ inɛ iyi í wɛɛ nɔ í dasim naanɛ kaa ku ajɔ kãma. Ì dasi ideu bɛ naanɛ?

²⁷ Nɔ Maata í jɛaa í ni, oo Lafɛ̃ɛ, ǹ dasi naanɛ iyi awɔi ì jɛ Kirisi, Amai Ilaaɔ̃, iyi à ni á na ku naa si andunya.

Jesu wa kpata

²⁸ Iyi Maata í fɔ bɛɛbɛ í tã ŋɔi í koo í kpe Maari ifɔɛ wa í sɔ̃ɔ do gundu í ni, Mɛɛtu í to wa, wa kpeɛ.

²⁹ Iyi Maari í gbɔ bɛɛbɛ ŋɔi í dede do saasa í bɔ bi tɛɛ.

³⁰ Wee Jesu kù lɔ wa inɔ ilu titã, amma í wa tengi bii Maata í kòou.

³¹ Zuifu ŋa iyi à bɔ Maari ku ce fɔɔ kpasɛ̃ɛ, à yɛ í dede í fita do saasa. Ŋɔi à tooɛ. À tamaa wa bɔ ku kpata bi balɛui.

³² Ŋɔi Maari í to bii Jesu í wau. Iyi í yɔɔ ŋɔi í sɛɛbata si wajuɛ í sɔ̃ɔ í ni, Lafɛ̃ɛ, bii ì wa ihɛ̃ wo wecĩm kaa ku.

³³ Iyi Jesu í yɛ wa kpata nɔ Zuifu ŋa mɔ iyi à tooɛ wau à waa kpata, ideu í fɔ inɔɛ jiida jiida hee wa yaya.

³⁴ Ŋɔi í bee ŋa í ni, iwoi ì suu ŋa. Nɔ à sɔ̃ɔ à ni, Lafɛ̃ɛ, naa i cɔ.

³⁵ Ŋɔi Jesu í kpata.

³⁶ Nŋui í jɔ̀ Zuifu ŋau à ni, i cɔ zaka bɛi í buu.

³⁷ Amma gɔgɔ ŋa à ni, inɛɛu ihɛ̃ í jɔ̀ fɛɛju ŋa à yɛ ilu. Kaa yɔkɔ ku ganji Lazaa ku maà ku wo?

Kujĩi Lazaa hai si balɛ

³⁸ Ŋɔi inɔ ku fɔu í jɔ̀ Jesu í yaya má, nɔ í bɔ bi balɛu. Wee balɛu si lɔɔmai iri kuta gɔi í wa nɔ à dĩ andɛɛ do kuta nla gɔ má.

³⁹ Ŋɔi Jesu í ni, i tale kutau hai bɛ ŋa. Amma Maata wecĩi inɛ iyi í kuu í sɔ̃ɔ í ni, Lafɛ̃ɛ, bii í wa í sãmi wa nu tã domi hai waati iyi à dasiɛ balɛ í to ajɔ mɛɛ wa nnyi.

⁴⁰ Ŋɔi Jesu í beeɛ í ni, í jɔ ǹ sɔ̃ɛ ǹ ni bii ì dasi naanɛ aa yɛ amboei Ilaaɔ̃ mɛɛ.

⁴¹ Si anyiɛ ŋɔi à tale kutau hai bɛ. Nɔ Jesu í wu iju lele í ni, Baam, ǹ wa n saabuɛ si na iyi í jɔ̀ ì gbɔ kutɔɔm.

⁴² Amu takam ǹ mà iyi waati kãma fei ì ya maa gbɔ idem, amma ǹ fɔ bɛɛbɛi na inɛ ŋa iyi à waa leekĩ ihɛ̃ ku ba a dasi naanɛ iyi awɔi ì bɛm wa.

⁴³ Iyi í fɔ bɛɛbɛ í tã ŋɔi í la hee lele í ni, Lazaa, fita wa hai bɛ.

⁴⁴ Ŋɔi í fita wa hai inɔ balɛu do acɔ iyi à woò awɔɛ ŋa do isɛɛ ŋa do iriɛ. Ŋɔi Jesu í ni, i fũu i jɔ̀ ku nɛ ŋa.

Inɛ ŋa à waa busi njɛ a ba a kpa Jesu

⁴⁵ Ŋɔi Zuifu ŋa iyi à naa bi Maariu, nkpɔ nŋa í dasi Jesu naanɛ iyi à yɛ mii iyi í ce.

⁴⁶ Amma gɔgɔ ŋa à nyi à koo à sɔ̃ Farisi ŋau mii iyi Jesu í ce.

⁴⁷ Ŋɔi inɛ ngboi woo weei Ilaaɔ̃ ŋau do Farisi ŋau à tɔtɔɔ inɛ ngboi woo ce kiiti ŋau mɔ à bee njɛ à waa ni, bɛirei aa ka ce. Inɛɛu wee í wasi maamaake nkpɔ nkpɔ ku ce.

⁴⁸ Bii à jɔ̀ wa ce bɛɛbɛ wa koo inɛ fei á na ku dasiɛ naanɛ. Nɔ inɛi Romu ŋa aa naa a lɛgɛ kpasɛ̃i Ilaaɔ̃, nɔ a ko dimi nwa.

⁴⁹ Amma Kaifu iyi í jɛ woo wee nla si adɔ̃ nŋu bɛ, í wa inɔ nŋa, nɔ í sɔ̃ ŋa í ni, i kù mà nkãma ŋa.

⁵⁰ I kù mà ŋa iyi aranfãani nwai inɛ akã ku ku si agbɛi dimi nwa ŋa? Si bɛɛbɛ dimi nwau fei kaa ce nfe má.

⁵¹ Wee ide iyi í fɔu bɛ, kù jɛ hai si lasabui nŋu takaɛi wa naa. Amma si na iyi í jɔ̀ í jɛ woo wee nla si adɔ̃ nŋu, na ŋɔi í jɔ̀ í ce walii Jesu ku ku si agbɛi dimii Zuifu ŋa.

⁵² Kù nɔ kù jɛ si agbɛi aŋa akãi á ku, amma á kui ku ba kú jɔ̀ amai Ilaaɔ̃ ŋa iyi à wa bii fei a jɛ akã.

⁵³ Ŋɔi í jɔ̀ hai ajɔ nŋu à waa busi njɛ a ba a kpa Jesu.

⁵⁴ Na ŋɔi í jɔ̀ Jesu ci ya maa dabii si inɔi Zuifu ŋau má si bantuma, amma í nɛ hai bɛ í bɔ ilɛ iyi í wa kɔkɔi gbaa gɔ si ilu gɔ iyi à ya kpe Efaraimu. Nŋu do mɔcɔɛ ŋa à koo à buba ilu bɛ.

⁵⁵ Wee jingaui Zuifu ŋa iyi à ya kpe Iku ku kua í maai wa. Nɔ hai ilɛɛko ŋa inɛ nkpɔ í bɔ kuwee ku ce Zeruzalɛmu ku ba a maaju hee jingauu ku maa to wa.

⁵⁶ Ŋɔi à waa dɛdɛ Jesu, nɔ à leekĩ bantumai kpasɛ̃i Ilaaɔ̃ à bee njɛ à waa ni, bɛirei ì waa lasabu ŋa. Mà kù waa naa jingaui ya.

⁵⁷ Wee inɛ ngboi woo weei Ilaaɔ̃ ŋa do Farisi ŋa à na wooda à ni bii inɛ gɔ í mà bii Jesu í wa ku sɔ̃ aŋa a koo a muu.