Laabaau jiida iyi Zãa í kɔ 10 - Bibeli do fee

Mɔndai angudã ŋa do woo degbe

¹ Jesu í ni, ntɔ ntɔ ǹ wa n sɔ̃ ŋɛi, inɛ iyi í lɔ aroi angudã ŋa nɔ kù lɔ hai andɛɛ, bii í koo í gũ idĩ í bɛi í lɔò, lafɛ̃ɛ ile bata ngbai.

² Amma inɛ iyi wa lɔ hai do andɛi aroi angudã ŋau, lafɛ̃ɛi í jɛ woo degbe angudã ŋau.

³ Woo degbe arou í ya cĩaai, nɔ angudã ŋau à ya gbɔ imuɛ. Nɔ ku kpe angudãɛ ŋa do iri nŋa akã akã ku fitaò ŋa waduude.

⁴ Waati iyi í fitaò aŋa fei waduude nɔ ku cua nŋa a maa tooɛ domi à mà imuɛ.

⁵ A kaa jɛ a too inɛ njoo gɔ, amma aa saa ku jĩ domi a kù mà imuɛ.

⁶ Jesu í kpa nŋa mɔndau bɛ amma a kù gbɔ yaaseɛ.

Jesui í jɛ woo degbe jiida

⁷ Ŋɔi Jesu í sɔ̃ inɛ ŋa má í ni, ǹ wa n sɔ̃ ŋɛi, amui ǹ jɛ andɛi aroi angudã ŋau.

⁸ Baai amu baasi inɛ ŋa iyi à cuam wa fei ile bata ngba ŋai, amma angudã ŋau a kù gbɔ ide nŋa.

⁹ Amui ǹ jɛ andɛ. Inɛ iyi í lɔ wa do bi tom fei á ba faaba. Á lɔ, á nɔ ku fita, nɔ á ba bi ku jɛ.

¹⁰ Ile njɛ ci ya naa kaa ku ce ile nɔ ku kpa nɔ ku bɛjɛ. Amma amu ǹ naai ku ba inɛ ŋa a ba kuwɛɛ nɔ a nɔɔ jiida jiida.

¹¹ Amui ǹ jɛ woo degbe jiida. Woo degbe jiida í ya jɛsi nŋu ku kui na irii angudãɛ ŋa.

¹² Amma woo ce gaanɔɔma kù jɛ woo degbe jiida. Si bɛi angudã ŋau a kù jɛ titɛɛ, bii í hɔ̃nnɛ muusu nla wa naa á jɔ̀ angudã ŋaui ku sa, nɔ muusu nlau ku mu angudã ŋau nɔ iyi à gbe ŋau a fangaa.

¹³ Á sai domi na fiai wa ce icɛ, kaa nɛ araarei angudã ŋau.

^14-15 Amui ǹ jɛ woo degbe jiida. Si bɛi Baam í màm nɔ amu mɔ ǹ màa, bɛɛbɛ mɔi ǹ mà angudãm ŋa nɔ aŋa mɔ à màm, nɔ ǹ jɛsi n ku na iri nŋa.

¹⁶ Nɔ ǹ nɛ angudã gɔ ŋa má iyi a kù wa si arou ihɛ̃. Kù nɛ bɛi an ce iyi n kù naaò ŋa wa. Aa nɔ a gbɔ imum nɔ aŋaò ti tako ŋau fei a jɛ gaa akã, woo degbe mɔ akã.

¹⁷ Baaba í bim si na iyi í jɔ̀ ǹ jɛsi n ku. An ku nɔ an jĩ má.

¹⁸ Inɛ kãma kaa yɔkɔ ku nya hundem. Amma amu takam nii an nyaa. Ǹ nɛ gbugbã iyi an na hundem, nɔ ǹ nɛ yiiko iyi an gbaaò má. Bɛɛbɛi Baam í dasim ku ce.

¹⁹ Iyi í fɔ bɛɛbɛ, ŋɔi Zuifu ŋau à nyi à kpɛ̃ má na irii ideu.

²⁰ Inɛ gɔ ŋa à ni, í nɛ inɛi inɔɔkoi. Sũmui. Na mii í ce ì waa gbɔ ideɛ ŋa mɔm.

²¹ Nɔ inɛ gɔ ŋa mɔ à ni, inɛ iyi í nɛ inɛi inɔɔko ci ya fɔ ide bɛ ihɛ̃. Inɛ iyi í nɛ inɛi inɔɔko á yɔkɔ ku cĩ ijui fɛɛju ŋa?

Zuifu* ŋau à kɔ̀si Jesu

²² Waati í to iyi aa ce jingau gɔ Zeruzalɛmu iyi à ya ni Kpasɛ̃i Ilaaɔ̃ ku teese. Waati bɛɛbɛ sukui tũtũi.

²³ Nɔ Jesu í wa bantumai kpasɛ̃u wa nɛ ikpa akãi ileu iyi à ya kpe bantumai Salomɔɔ.

²⁴ Ŋɔi Zuifu ŋau à kaakoɛ à beeɛ à ni, hee waati yoomai aa jɔ̀ sika iyi à wɛɛò ku kpa iri. Bii awɔi ì jɛ inɛ iyi Ilaaɔ̃ í cicau ntɔ ntɔ, sɔ̃ wa sãa sãa.

²⁵ Ŋɔi Jesu í jɛ nŋa í ni, ǹ sɔ̃ ŋɛ tã, amma i kù dasim naanɛ ŋa. Icɛ iyi ǹ wa n cei wa jɛa inɛ ŋa sɛɛdam. Ǹ wa n cooi do irii Baam.

²⁶ Amma i ci ya dasim naanɛ ŋa domi i kù wa si inɔi angudãm ŋa.

²⁷ Angudãm ŋa à ya gbɔ imum. Ǹ mà ŋa nɔ à ya maa toom.

²⁸ Nɔ ǹ mu nŋa kuwɛɛ hai tã, a kaa ku ajɔ kãma, nɔ inɛ gɔ mɔ kaa yɔkɔ ku lakati ŋa hai si awɔm pai.

²⁹ Baam nii í muum nɔ í la í re inɛ fei. Inɛ gɔ kù wɛɛ iyi á yɔkɔ ku lakati ŋa hai si awɔi Baam.

³⁰ Nɔ amu do Baam fei akãi.

³¹ Iyi Zuifu ŋau à gbɔ bɛɛbɛ ŋɔi à tasi kuta à waa bi a taa má.

³² Ŋɔi Jesu í sɔ̃ ŋa í ni, do gbugbãi Baam ǹ ce icɛ jiida nkpɔ si waju nŋɛ. Na icɛ yoomai ì waa bi i tam kuta ŋa.

³³ Ŋɔi Zuifu ŋau à jɛaa à ni, a kù waa bi ka taɛ kuta na icɛ jiida ŋau, amma si na iyi í jɔ̀ ì waa bu Ilaaɔ̃i, domi awɔ amanɛi nɔ ì waa bi i ce araɛ Ilaaɔ̃.

³⁴ Ŋɔi Jesu í ni, à kɔ ide gɔ si tiai wooda nŋɛ. Ideu wa fɔ idei amanɛ ŋa, í ni, iŋɛ amanɛ ŋa, iŋɛ mɔ Ilaaɔ̃i.

³⁵ Nɔ Jesu í sɔ̃ ŋa má í ni, à mà iyi kukɔi idei Ilaaɔ̃ ntɔi wa fɔ do ajɔ fei. To, si ideu ihɛ̃ Ilaaɔ̃ takaɛ wa kpe inɛ ŋa iyi à gbɔ ideɛu Ilaaɔ̃, mà irei.

³⁶ Bii bɛɛbɛi, bɛirei í ce ì ni ǹ wa n bu Ilaaɔ̃ ŋa si na iyi í jɔ̀ ǹ ni amu Amai Ilaaɔ̃i. Nɔ amu takam mɔ Baabai í cicam nɔ í bɛm wa si andunya.

³⁷ Bii n kù wa n ce icɛi Baam i maà dasim naanɛ ŋa.

³⁸ Amma bii ǹ wa n coo, baa bii i kù dasim naanɛ ŋa, i dasi icɛm naanɛ ku ba i mà sãa sãa ŋa iyi Baaba í wa sim nɔ amu mɔ ǹ wa si Baaba.

³⁹ Iyi à gbɔ bɛɛbɛ ŋɔi à waa dɛ kpãa má a ba a muu, amma Jesu í gbã si ŋa,

⁴⁰ nɔ í nyi icei idoi Zuudɛ̃ɛ má bii Zãa í tako í dasi inɛ ŋa inyiu. Tengi bɛi í koo í wa,

⁴¹ nɔ inɛ nkpɔ í bɔ bi tɛɛ. Ŋɔi inɛ ŋa à ni, Zãa kù ce maamaake kãma, amma ide iyi í fɔ si gãmɛi inɛɛu ihɛ̃ fei ntɔi.

⁴² Nɔ inɛ nkpɔ nkpɔ í dasiɛ naanɛ tengi bɛ.