Laabaau jiida iyi Zãa í kɔ 1 - Bibeli do fee

Inya kumá do idei kuwɛɛ

¹ Hee a maa taka andunya inɛ gɔ í wɛɛ à ya kpoo Ide. Ideu í wɛɛi do Ilaaɔ̃. Ideu takaɛ Ilaaɔ̃i.

² Ideu njɛ í wɛɛi hai sinte do Ilaaɔ̃.

³ Do nŋui Ilaaɔ̃ í taka mii baa yooma fei, nɔ nkãma kù wɛɛ iyi kù jɛ nŋui í takaɛ.

⁴ Nŋu takaɛi í jɛ irii kuwɛɛu, nɔ kuwɛɛu í máa inɛ ŋa inya.

⁵ Inya kumáu í mái do si ilu kuku fei, nɔ ilu kukuu kù yɔkɔ kù kãmiaɛ.

^6-7 Mɔkɔ gɔ í wɛɛ iyi à ya kpe Zãa. Nŋui Ilaaɔ̃ í bɛ wa ku naa ku jɛa inɛ ŋa sɛɛdai inya kumáu, nɔ inɛ fei ku dasiò inya kumáu naanɛ do saabuɛ.

⁸ Zãa takaɛ kù jɛ inya kumáu, amma à bɔɔ wai ku jɛ sɛɛdai inya kumáu.

⁹ Inya kumáu nŋu akãi í jɛ inya kumá ntɔ iyi í naa si andunya ku ba ku jɔ̀ inɛ fei ku yɛ ilu.

¹⁰ Inɛ iyi í jɛ Ideu í wa si andunya wo. Do saabuɛi Ilaaɔ̃ í takaò andunya. Do nŋu fei, inɛi andunya ŋa a kù màa.

¹¹ Bi inɛɛ ŋai í naa nɔ inɛɛ ŋau à kɔ̀siɛ.

¹² Amma inɛ ŋa iyi à gbaa nɔ à dasiɛ naanɛ í mu nŋa kpãa a jɛò amai Ilaaɔ̃ ŋa.

¹³ A kù jɛ amai Ilaaɔ̃ ŋa do yaase bɛi à ya ce a bíò amu ŋa si andunya. Kù jɛ do idɔɔbii amanɛ ŋa, ti Ilaaɔ̃i.

¹⁴ Ideui í baa í jɛ amanɛ. Í kɔ̃ò didɔ̃ nɔ bɛɛbɛ mɔi í kɔ̃ò ntɔ, nɔ í ba wa kuwɛɛ. À yɛ amboeɛ, à cɔɔ do laakai, dimii amboe iyi Ilaaɔ̃ Baaba í na Ama akãɛu.

¹⁵ Zãa í jɛa inɛ ŋa sɛɛdaɛ, í la í ni nŋu mbɛ inɛ iyi nŋu í fɔ ideɛu nŋu í ni á na ku naa si anyii nŋuu, amma í re nŋu domi í wɛɛ hai waati iyi a kù bí nŋu.

¹⁶ Si amani nlaɛu awa fei à ba andi baa nwa, nɔ à ba didɔ̃ si antaii didɔ̃u.

¹⁷ Hai bi Moizii Ilaaɔ̃ í na wa wooda, amma didɔ̃ do ntɔ í naai hai bi Jesu Kirisi.

¹⁸ Inɛ kãma kù yɛ Ilaaɔ̃ Baaba ajɔ kãma. Ama akãɛ iyi í wa bi tɛɛu nŋu takaɛ Ilaaɔ̃i. Nŋui í jɔ̀ à màa.

Idei Zãa woo dasi inyi

¹⁹ Ajɔ nŋu gɔ inɛ ngboi Zuifu ŋa iyi à wa Zeruzalɛmu à bɛ si Zãa woo weei Ilaaɔ̃ ŋa do inɛi Levii ŋa a koo a beeɛ a ni, awɔ yooi.

²⁰ Ŋɔi Zãa í jɛ nŋa í fɔ si bantuma í ni, n kù jɛ inɛ iyi Ilaaɔ̃ í cica.

²¹ Ŋɔi à beeɛ à ni, debɛi, awɔ yooi. Awɔi Elii walii nlai takou? Nɔ í ni, aawo. N kù jɛ Elii. Nɔ à beeɛ má à ni, awɔi ì jɛ walii iyi á na ku naau? Nɔ í ni, aawo.

²² Ŋɔi à beeɛ má à ni, debɛi, awɔ yooi. Sɔ̃ wa ku ba ka ba iyi aa kaa sisia inɛ ŋa iyi à bɛ wa wa. Bɛirei awɔ takaɛ ì waa nia araɛ.

²³ Ŋɔi Zãa í so ide iyi walii Ezai í tako í fɔu í jɛ nŋa do í ni, amui ǹ jɛ inɛ iyi wa dɔ̃ anu si gbaa wa ni, i teese kpãai Lafɛ̃ɛ kú tɛ ŋa.

²⁴ Wee inɛ ŋa iyi à bɛ wa ŋau, hai bi Farisi ŋai à naa.

²⁵ Ŋɔi à bee Zãa à ni, ì ni i kù jɛ inɛ iyi Ilaaɔ̃ í cicau, i kù jɛ Elii, i kù nɔ i kù jɛ walii iyi á na ku naau. To, na mii í jɔ̀ ì ya maa dasi inɛ ŋa inyi.

²⁶ Ŋɔi Zãa í jɛ nŋa í ni, amu inyii ǹ wa n dasi inɛ ŋa, amma inɛ iyi á na ku naau í wa anini nŋɛ nɔ i kù màa ŋa.

²⁷ Nŋui á naa si anyim. Nɔ n kù tosi n fũ baa ikũi baataɛ.

²⁸ Ide ŋau ihɛ̃ fei Betanii í ce. Betaniu do ikpa nunui daakɔi idoi Zuudɛ̃ɛi í wa. Tengi bɛi Zãa wa dasi inɛ ŋa inyi.

Jesui í jɛ ama angudãi Ilaaɔ̃

²⁹ Iju kumáɛ ŋɔi Zãa í yɛ Jesu wa naa siɛ, ŋɔi í sɔ̃ inɛ ŋa í ni, i cɔɔ ŋa. Inɛ ihɛ̃i í jɛ ama angudãi Ilaaɔ̃ iyi á nya dulum dii inɛi andunya ŋa ku nɛò.

³⁰ Ideɛi ǹ tako ǹ fɔ wo ǹ ni inɛ gɔ wa naa si anyim iyi í rem, domi njɛ í wɛɛ hai waati iyi a kù bím.

³¹ Amu takam n kù mà mà nŋui à ni á na ku naau wo, amma ǹ naa ku dasi ŋɛ inyii ku ba iŋɛ inɛi Izirɛli ŋa i màa ŋa.

^32-33 Ŋɔi Zãa í sɔ̃ ŋa má í ni, amu mɔ n kù mà mà nŋui à ni á na ku naau wo. Amma Ilaaɔ̃i í bɛm wa n naa n dasi inɛ ŋa inyi. Nɔ nŋui í sɔ̃m mii iyi á jɔ̀ n màa. Í ni an yɛ inɛ gɔ iyi Hundei nŋu á kita ku de siɛ wa nɔ ku maa wa bɛ. Nŋui á daa inɛ ŋa si Hundei nŋu. Ntɔ ntɔ ǹ yɛ Hundei Ilaaɔ̃u wa kita si Jesu wa hai lele. Hundeu í yɛi bɛi ankasiidi.

³⁴ Ǹ yɔɔ, nɔ ǹ wa n jɛa inɛ ŋa sɛɛda iyi nŋui í jɛ Amai Ilaaɔ̃.

Mɔcɔ sintei Jesu ŋa

³⁵ Iju kumáɛ Zãa í wa bɛ má, wa leekĩ do mɔcɔ minjiɛ gɔ ŋa.

³⁶ Ŋɔi à yɛ Jesu wa lɔ nɔ Zãa í ni, i cɔɔ ŋa. Inɛ ihɛ̃i í jɛ ama angudãi Ilaaɔ̃.

³⁷ Iyi mɔcɔ ŋau à gbɔ ideu ŋɔi à too Jesu.

³⁸ Ŋɔi Jesu í sinda í ba à waa too nŋu wa, nɔ í bee ŋa í ni, mii ì waa dɛ ŋa. Ŋɔi à ni do fee nŋa, Rabi, waatɔ mɛɛtu. Ŋɔi à beeɛ à ni, iwoi í jɛ kpasɛ̃ɛ.

³⁹ Ŋɔi í jɛ nŋa í ni, i naa i cɔ ŋa. Nɔ à tooɛ à koo à cɔ bii í wa nɔ à hoe bɛ. Ideu ihɛ̃ í cei alɛ zakai isɔ mɛɛ.

⁴⁰ Inɛ akãi amanɛ minji ŋa iyi à gbɔ idei Zãa nɔ à too Jesuu, nŋui í jɛ Anderee, ifɔi Simɔɔ Piɛɛ.

⁴¹ Iyi í sɛkɛɛ hai bi Jesu gbakã í koo í kpe Simɔɔ igbãɛ nɔ í sɔ̃ɔ í ni, à yɛ inɛ iyi Ilaaɔ̃ í cicau.

⁴² Ŋɔi í bɔò Simɔɔ bi Jesu. Iyi Jesu í cɔɔ nɔ í ni, ǹ mà iyi awɔi ì jɛ Simɔɔ amai Zãa, amma Sefasii aa ya kpeɛ bɛbɛi. (Iriu bɛ do Piɛɛ fei, yaaseɛi í jɛ kuta.)

Jesu í kpe Filipu do Nataniɛli

⁴³ Iju kumáɛ Jesu í dasi idɔ nŋu ku bɔ ilɛi Galilee. Iyi í to bɛ ŋɔi í ko Filipu nɔ í sɔ̃ɔ í ni, toom wa.

⁴⁴ Wee Filipu inɛi Bɛsaidai. Anderee do Piɛɛ ŋa mɔ inɛi ilu bɛ ŋai.

⁴⁵ Ŋɔi Filipu í koo í dɛdɛ Nataniɛli í sɔ̃ɔ í ni, à yɛ inɛ iyi Moizi í kɔ ideɛ si tiai wooda ŋau nɔ walii ŋau mɔ à fɔ ideɛu. Inɛɛu nŋui í jɛ Jesu inɛi Nazarɛti amai Zozɛfu.

⁴⁶ Ŋɔi Nataniɛli í beeɛ í ni, inɛ jiida gɔ á yɔkɔ ku fita hai Nazarɛti mbɛ? Ŋɔi Filipu í ni, naa i koo i cɔ.

⁴⁷ Ŋɔi à waa koo. Iyi Jesu í yɛ Nataniɛli wa naa bi tɛɛ ŋɔi í ni, i cɔ ŋa, amai Izirɛli takaɛi wa naa bɛ, kù nɛ takii kãma si idɔɛ.

⁴⁸ Ŋɔi Nataniɛli í beeɛ í ni, hai iwoi ì màm. Ŋɔi Jesu í ni, baa hee Filipu koo maa kpeɛ wa ǹ yɛɛ icui jĩi ndii figiu ihɔ̃.

⁴⁹ Ŋɔi Nataniɛli í ni, Mɛɛtu, awɔ Amai Ilaaɔ̃i, awɔ ilaalui Izirɛlii.

⁵⁰ Ŋɔi Jesu í jɛaa í ni, ì dasim naanɛ tã si na iyi í jɔ̀ ǹ ni ǹ yɛɛ abɛ jĩi ndii figiu ihɔ̃? Aa yɛ mii ŋa iyi à la à re iyi bɛ má.

⁵¹ Nɔ í ni má, ntɔ ntɔ ǹ wa n sɔ̃ ŋɛi, aa na i yɛ lelei Aɔ̃ í cĩ ŋa nɔ amalekai Ilaaɔ̃ ŋa aa gũ a maa kita si amu Amai Amanɛ.