Ilaalu 2, 9 - Bibeli do fee

À cica Yehu ilaalu

¹ Elizee waliiu í kpe inɛ akãi inɛi igbɛi walii ŋau nɔ í sɔ̃ɔ í ni, dĩ kpakaɛ nɔ i so ama jɔlɔi ikpou ihɛ̃ i bɔò Ramɔti si ilɛi Galaadi.

² Bii ì to, koo yɛ Yehu amai Zozafati tɔkui Nimusiu. Nɔ i kpoo kɔkɔlɛ hai si inɔi kpaasiɛ ŋa i bɔòɛ hee ilaawa gɔ.

³ Nɔ i so ama jɔlɔi ikpou i tontooa ikpou si iri nɔ i sɔ̃ɔ i ni Aɔ̃ Lafɛ̃ɛ í ni nŋu í cicaɛ ku jɛ ilaalui Izirɛli. Bii ì tã nɔ i cĩ gambou i fita i sa i maà leekĩ.

⁴ Ŋɔi ama awaasũ woo ce icɛi waliiu í dasi kpãa í bɔ Ramɔti si ilɛi Galaadi.

⁵ Iyi í to ŋɔi í ba wee sooge inɛ ngbo ŋau à waa buba. Nɔ í ni, inɛ ngbo, ǹ nɛ ide gɔ ǹ wa n bi n sɔ̃ɛ. Ŋɔi Yehu í jɛaa í ni, inɛ ngbo yoomai ì waa fãa. Nɔ í ni, awɔ.

⁶ Ŋɔi Yehu í dede í lɔ inɔ ileu nɔ awaasũu í tontooa ikpou si iri í sɔ̃ɔò í ni, Aɔ̃ Lafɛ̃ɛi inɛi Izirɛli ŋa í ni nŋu í cicaɛ i jɛ ilaalui inɛi Izirɛli zamaai nŋu ŋau.

⁷ Nɔ Akabu mɛɛtu nwoɛu, awɔi aa kpa tɔkuɛ ŋa. Do bɛɛbɛi Aɔ̃ Lafɛ̃ɛ á jaa walii woo ce icɛi nŋu ŋau fei do inɛ ŋa iyi Zezabɛli í jɔ̀ à kpa ŋau.

⁸ Nyaanzei Akabu feii á ku. Nŋu á kpa irii inɛ iyi í jɛ titɛɛ fei, hai inɛ iyi í jɛ aru hee do inɛ iyi í nɛ araɛ si Izirɛli fei.

⁹ Nŋu á cea kpasɛ̃ɛu bɛi nŋu í cea ti Zeroboamu amai Nebati do ti Baesa amai Ahiya.

¹⁰ Aja ŋai aa ŋɔ Zezabɛli si ilui Yizireɛli, inɛ kãma kaa suu. Iyi awaasũu í fɔ ideu í tã ŋɔi í cĩ gambo í fita í sa.

¹¹ Iyi Yehu í fita ŋɔi í koo í ba kpaasiɛ ŋau má, nɔ à beeɛ à ni, bɛirei í ce. Na mii í ce sũmuu bɛ í naa bi tɛɛ. Ŋɔi í jɛ nŋa í ni, inɛ dimi bɛɛbɛ ì mà ide iyi á yɔkɔ ku fɔ tã ŋa.

¹² Ŋɔi à jɛaa à ni, ibo, sɔ̃ wa ide iyi í sɔ̃ɛ. Nɔ í sɔ̃ ŋa í ni, ide kasa do kasai í sɔ̃m, í ni Aɔ̃ Lafɛ̃ɛ í ni nŋu í cicam n jɛ ilaalui Izirɛli.

¹³ Bɛ gbakã ŋɔi à bɔ ibɔ nŋa ŋa à koo à tɔɔ si abɛi Yehu bii à ya tɛ à gũò leleu. Ŋɔi à fã kuu nɔ à ni, Yehu í jɛ ilaalu.

Yehu wa dɛ ku kpa Yoramu ilaaluu

¹⁴ Waati bɛɛbɛ Yoramu do inɛi Izirɛli ŋau à bɔ igũ si Hazaɛli ilaalui Siriu à waa jaa ilui Ramɔti si ilɛi Galaadi. Ŋɔi Yehu amai Zozafati tɔkui Nimusi í dedeò zamba, wa dɛ ku kpaa.

¹⁵ Wee si waati nŋu Yoramu nŋu í wa Yizireɛli à waa ceaa iwɔ na kumɛɛ iyi í ba si igũi aŋaò ilaalui Siriu. Ŋɔi Yehu í sɔ̃ kpaasi woo ja igũɛ ŋau í ni, bii ì jɛsi n jɛ ilaalu ntɔ ntɔ ŋa, i maà jɔ̀ baa inɛ akã ku fita hai inɔ iluu ŋa ku bɔ Yizireɛli koo sɔ̃ ilaaluu laabaaui bomma ku jɛm.

¹⁶ Ŋɔi Yehu í gũ sarɛtiɛ wa bɔ Yizireɛli bii Yoramu wa sũò bɔ̃ɔ nɔ Ahazia ilaalui Zudaau í bɔ ku cɔɔ.

¹⁷ Ŋɔi woo degbe iyi í wa antaii ile kugbokai Yizireɛliu í yɛ soogei Yehu ŋau à waa naa, nɔ í koo í sɔ̃ ilaaluu í ni, ǹ yɛ sooge gɔ ŋa wa. Ŋɔi Yoramu í ni, dɛ masa akã i bɛ, koo bee ŋa bii í jɛ do laakai ku sũi à waa naaò wa.

¹⁸ Ŋɔi masau í bɔ bi Yehu nɔ í beeɛ í ni, ilaalu í ni, do laakai ku sũi ì waa naaò wa ŋa? Ŋɔi Yehu í jɛaa í ni, yoomai í kãɛ. Too fitim wa. Ŋɔi woo degbeu í bɔ bi ilaaluu má í ni, masau í to hee bi tu ŋa, amma kù waa baa.

¹⁹ Ŋɔi Yoramu í bɛ masa minjisia si ŋa. Iyi í to nɔ í ni, ilaalu í ni, do laakai ku sũi ì waa naaò wa ŋa? Ŋɔi Yehu í jɛaa í ni, yoomai í kãɛ. Toom wa.

²⁰ Woo degbeu í koo í sɔ̃ ilaaluu má í ni, í to hee bi tu ŋa, nɔ kù waa baa. Amma woo mu sarɛtiu í jɔ Yehu tɔkui Nimusi, domi Yehu í ya maa mu sarɛtiɛi bɛi sũmu.

²¹ Ŋɔi Yoramu í ni a dĩ sarɛtii nŋuu. Nɔ Yoramu ilaalui Izirɛliu do Ahazia ilaalui Zudaau à gũ sarɛtii igũ nŋa ŋa à fita à bɔ Yehu ku ko. Nɔ à kòo ikoi Nabɔti inɛi Yizireɛliu.

Ikui Yoramu ilaalui Izirɛli

²² Iyi Yoramu í yɛ Yehu gbakã, ŋɔi í beeɛ í ni, do laakai ku sũi wa? Nɔ Yehu í jɛ í ni, do iwo laakai ku sũ, bii iyeɛ Zezabɛli í kɔ̀ í wasi iwɛ̃ ŋa ku tɔɔ do dobu dobu nkpɔ nkpɔ ku ce.

²³ Ŋɔi Yoramu í sinda wa sa wa sɔ̃ò Ahazia wa ni, ce laakai í zamba wai.

²⁴ Amma Yehu í so afaɛ í taa si aninii bãngaɛ hee afau í koo í ta akãaɛ í faata. Nɔ Yoramu í ku si inɔ sarɛtii igũɛu.

²⁵ Ŋɔi Yehu í sɔ̃ Bidikaa inɛ ngboi soogeɛ ŋa í ni, nya i nyɔɔ si ikoi Nabɔti inɛi Yizireɛliu ihɛ̃. Jɔ̀ i ye gigi waati iyi awaɛ à tako à gũ acĩ à waa too Akabu baaɛu, Aɔ̃ Lafɛ̃ɛ í fɔ í ni,

²⁶ amu Aɔ̃ Lafɛ̃ɛ ǹ ni, ana ǹ yɛ do yaase bɛi ì jɔ̀ à kpa Nabɔti do amaɛ ŋa, bɛɛbɛi an cea awɔ mɔ si ilɛ akãu ihɛ̃. Na nŋu, soo i nyɔɔ si ilɛu si bɛi Aɔ̃ Lafɛ̃ɛ í fɔu.

Ikui Ahazia ilaalui Zudaa

²⁷ Iyi Ahazia í yɛ iyi bɛ, ŋɔi í sa wa nɛ Bɛti-Hagãa. Nɔ Yehu wa lele nŋu mɔ wa niò, i kpa nŋu mɔ si antaii sarɛtii igũu. Ŋɔi à koo à ta nŋu mɔ hee geetei Guu kɔkɔi ilui Yibileamu. Ŋɔi í sa í koo í manji Mɛgido, nɔ í ku bɛ.

²⁸ Ŋɔi woo ce icɛɛ ŋa à koo à soo wa si sarɛtii igũ à baaɛ wa Zeruzalɛmu. Nɔ à naa à suu si balɛ bi balaɛ ŋa ilui Davidi.

²⁹ Ahazia í jɛ bommai Zudaai wo si adɔ̃ maatakãsiai bomma ku jɛi Yoramu amai Akabuu.

Ikui Zezabɛli

³⁰ Si anyiɛ ŋɔi Yehu wa bɔ ku lɔ inɔ ilu Yizireɛli. Iyi Zezabɛli í gbɔ mii iyi í ce, ŋɔi í dasi ijuɛ cioo nɔ í sembu iriɛ í bɛi wa cɔ ilu hai do fɛrɛnti.

³¹ Waati iyi Yehu í lɔ inɔ iluu, ŋɔi Zezabɛli í beeɛ í ni, inɔɛ í dɔ̃ awɔ iyi ì yɛ bɛi Zimiri iyi í kpa lafɛ̃ɛɛ?

³² Ŋɔi Yehu í wu iju í cɔ fɛrɛntiu nɔ í ni, yooi í jɛ inɛm, yoo. Ŋɔi inɛ ngboi woo ce icɛi ilaalu ŋau aŋa minji walakɔ mɛɛta à waa cɔɔ wa hai do fɛrɛntiu.

³³ Ŋɔi í sɔ̃ ŋa í ni, i sɔɔ wa ilɛ ŋa. Ŋɔi à sɔɔ wa ilɛ í na í cuku nɔ njɛɛ í fangaa si bindiu do si acĩ ŋau. Nɔ Yehu í nɛ siɛ do sarɛtii igũɛ.

³⁴ Si anyiɛ ŋɔi Yehu í lɔ inɔ kabai ilaalu í jɛ nɔ í mɔ í bɛi í ni, i koo i so abo yaamɔu i suu ŋa, domi ama inaaboi ilaalui.

³⁵ Ŋɔi à fita à waa bɔ ku suu. Amma à koo à ba kokoi iriɛ do isɛɛ ŋa do ataawɔɛ ŋai í gbe bɛ.

³⁶ Ŋɔi à nyi à koo à sɔ̃ Yehu. Ŋɔi í ni, iyi Aɔ̃ Lafɛ̃ɛ í sɔ̃ Elii inɛi Tisibuu í ni ku fɔu mbɛ iyi í ni aja ŋai aa ŋɔ ikui Zezabɛli si ilui Yizireɛli.

³⁷ Nɔ ikɔ̃i araɛ ŋa iyi à gbeu fei aa fangaaɛi bɛi taasi si iko hee a kaa yɔkɔ a ni, balɛi Zezabɛlii ihɛ̃.