Ilaalu 2, 7 - Bibeli do fee

¹ Ŋɔi Elizee í ni, i sotĩ i gbɔ ide iyi Aɔ̃ Lafɛ̃ɛ í fɔ ŋa. Aɔ̃ Lafɛ̃ɛ í ni, ala suku bɛ ihɛ̃ kpɛkɛlɛ akãi aa ka raò iyafũ kiloo maateeji walakɔ ɔɔzu kiloo kɔnfia do mɛɛ si ajai Samari.

² Ŋɔi woo bɛ iyi ilaaluu í ya lɔkɔsiu í ni, baa bii Aɔ̃ Lafɛ̃ɛ í jɔ̀ amaajɛ wa ga wa hai lelei Aɔ̃, dimiɛ kaa ce pai. Nɔ Elizee í jɛaa í ni, aa na i yɔɔ do ijuɛ, amma i kaa jɔɔ pai.

Soogei Siri ŋa à sa à jɔ̀ asɔ nŋa

³ Dintɛ mɛɛ gɔ ŋa à wa do alalai anu koofai iluu nɔ à sɔ̃ njɛ à waa ni, bɛirei í ce à wa ihɛ̃ à waa degbeò iku nwa.

⁴ Bii à lasabu ka bɔ inɔ ilui aa ka ku, si na iyi í jɔ̀ sɔnda kù wɛɛ. Bii ihɛ̃ mɔi à wa, aa ka ku. Debɛi kaa dasi inɔ asɔi soogei Siri ŋau. Bii à jɔ̀ wa, nɔ ka wɛɛ, bii à kpa wai, nɔ ka ku.

⁵ Ŋɔi alɛ zakai inya wa kuku wa à nɛ à waa bɔ asɔi soogei Siri ŋau. Iyi à to kɔkɔi asɔu, ŋɔi à ba wee inɛ kãma kù wa bɛ.

⁶ Aɔ̃ Lafɛ̃ɛ í jɔ̀ soogei Siri ŋau à gbɔ ibai sarɛtii igũ ŋai wo do ibai acĩ ŋa do ti sooge nkpɔ nkpɔ gɔ ŋa, nɔ à ni, ilaalui Izirɛliu í koo í tɔɔ sobi wa hai bi ilaalui inɛi Hɛti ŋa do ti Ezibiti ŋa a naa a jɛ wa igũ.

⁷ Ŋɔi à dede à sa hai amɛɛbiiu, à jɔ̀ ilei acɔ nŋa ŋa bɛi à gũ ŋau do acĩ nŋa ŋa do gbankɛlɛ nŋa ŋa ku ba à saò hunde nŋa.

⁸ Si bɛi dintɛ ŋau à to bi asɔu, ŋɔi à koo à lɔ inɔi ilei acɔ akã nɔ à jɛ à mɔ. Nɔ à so isɔ fũfũ do wura do ibɔ ŋa à koo à singa ŋa. Ŋɔi à nyi wa nɔ à lɔ si inɔi mmuɛ à so mii ŋa à koo à singa ŋa.

Kɔɔi ariu

⁹ Si anyiɛ ŋɔi dintɛ ŋau à waa ni, mii iyi à waa ceu ihɛ̃ kù sĩa. Ajɔu ihɛ̃, ajɔi laabaau jiidai. Bii à coko nɔ à waa degbe iju ku mái, awai aa ka yɛ ijuukpãɛ. I nɛ wa kaa sisi ideu kpasɛ̃i ilaalu.

¹⁰ Ŋɔi à nɛ nɔ à koo à kpe woo degbe anu koofai bindii ilu ŋau à sɔ̃ ŋa à ni, awa à lɔ inɔ asɔi soogei Siri ŋau nɔ à ba wee inɛ kãma kù wa bɛ hee ka gbɔ imui inɛ gɔ. Acĩ ŋai à waa so bɛ do gbankɛlɛ ŋa do ilei acɔ nŋa ŋa si agbɛ nŋa bɛi à ce ŋa.

¹¹ Ŋɔi woo degbe koofai bindi ŋau à kpe inɛ gɔ wa à ni koo sɔ̃ inɛi kpasɛ̃i ilaalu ŋau.

¹² Ŋɔi ilaaluu í dede idũ laja nɔ í sɔ̃ woo ce icɛɛ ŋa í ni, ǹ bi n sɔ̃ ŋɛ mii iyi inɛi Siri ŋau à waa dɛ à ce nwa. Si bɛi à mà iyi à waa ce ari, nŋui í ce à jɔ̀ asɔ nŋa à koo à manji inɔ sako à waa ni bii à fita wa hai inɔ ilu nwa, aŋa aa mu wai njaawɛ nɔ a lɔ inɔ ilu nwa.

¹³ Ŋɔi inɛ akãi woo ce icɛi ilaaluu í ni, to, bii à bɛ inɛ ŋa á yɔkɔ ku jɛ aa kpa ŋa, amma bii à wɛɛ nwa inɔ iluu ihɛ̃ awa fei aa ka na ka ku. Na nŋu, ka so acĩ miiu si acĩ ŋa iyi à gbe, nɔ ka bɛ inɛ ŋa a koo a cɔ mii iyi wa ce wa.

¹⁴ Ŋɔi ilaalu í jɔ̀ à so sarɛtii igũ minji do acĩ ŋa, nɔ í bɛ ŋa a koo a too tuubai soogei Siri ŋau a cɔ.

¹⁵ Ŋɔi à too tuuba nŋa hee idoi Zuudɛ̃ɛu. Nɔ à ba wee andi kpãau fei í kɔ̃ do ibɔ ŋa do mii ŋa iyi inɛi Siri ŋau à nyɔ si saasa. Ŋɔi inɛ ŋau à baa à na à sisia ilaaluu.

¹⁶ Ŋɔi zamaau í fita í bɔ asɔi inɛi Siri ŋau amani ŋa ku ko. Nɔ à waa ta iyafũ kiloo maateeji kpɛkɛlɛ akã, ɔɔzu kiloo kɔnfia do mɛɛ mɔ kpɛkɛlɛ akã, si bɛi Aɔ̃ Lafɛ̃ɛ í fɔu.

¹⁷ Ilaaluu í kpe amaacɛ iyi í ya lɔkɔsiu í ni koo maa degbe anu koofau. Amma zamaau í tɔɔ í kpaa anu koofa bɛ si bɛi Elizee í fɔ waati iyi ilaaluu í koo siɛ.

¹⁸ Waati bɛɛbɛi, Elizee í sɔ̃ɔ í ni, ala suku bɛ ihɛ̃, kpɛkɛlɛ akã á ra iyafũ kiloo maateeji walakɔ ɔɔzu kiloo kɔnfia do mɛɛ si ajai anu koofai Samariu ihɛ̃.

¹⁹ Nɔ amaacɛu í jɛaa í ni, baa bii Aɔ̃ Lafɛ̃ɛ í jɔ̀ amaajɛ wa ga wa hai lelei Aɔ̃, dimiɛ kaa ce pai. Nɔ Elizee í sɔ̃ɔ í ni, aa yɔɔ do ijuɛ, amma i kaa jɔɔ.

²⁰ Nɔ bɛɛbɛi í na í ce. Kukpɔi zamaau í tɔɔ í kpaa anu koofa bɛ.